Владимир Ристов: Една клупа 94.000 денари, а една жардинерија 106.000 денари

„Градоначалникот Костадин Костадинов потпишал договор за јавна набавка за урбана опрема каде една клупа граѓаните на општина Струмица ги чини 94.000 денари, а една жардинерија 106.000 денари“, кажа на денешната прес конференција Владимир Ристов, член на Советот на општина Струмица од редовите на ВМРО-ДПМНЕ.

Интегрален текст од прес конференцијата:

„Додека жителите на Банско се жалат дека немаат квалитетна вода за пиење, Куклиш 5 дена е оставен без вода поради дефекет на водоводна мрежа, а неколку населби во градот се жалат на лошата атмосферска канализација, градоначалникот Костадинов потпишал договор со фирма од Скопје за купување на 39 клупи и 5 жардинерии во вредност од приближно 4 милиони денари.

Костадинов набавил 24 клупи по единечна цена по клупа од 94.400 денари. Во голема економска криза каде сериозни компании се борат да го заштедат секој денар, менаџментот на Општина Струмица плаќа по 1.500 евра за една клупа.

Другите општина во државата, но и претходните раководства во Струмица клупите на плоштад ги набавувале за 5 до 10 пати поевтино од јавната набавка потпишана од Костадинов.

Минатиот месец државниот завод за ревизија изрази неповолно мислење за вистинитоста и објективноста на финасиските извештаи, а дел од неправилностите во извештајот беа забележани и во јавните набавки.

Хаосот со раководењето на општина Струмица продолжува. По лошите разултити на општината како: нетранспарентноста, негативниот извештај од Државниот завод за ревизија, поништувањето на постапката за ГУП и нереализирани ветување, во листата се впишува и овој скандалозен договор за јавна набавка со кој Костадинов со парите на граѓаните на Струмица една клупа ја плаќа за 94.000 денари“ – кажа советникот Ристов.