На 13-ти и 14-ти мај (сабота и недела) во Струмица ќе се одржат танц натпревари на кој учество ќе земаат над 2000 танчери од земјата и странство. Според информациите од организаторот „One Way Dance Studio“ од Струмица, на 13-ти мај во Спортската сала „Парк“ ќе се одржи Државното првенство во Модерни танци на Македонија, на кое најдобрите ќе се квалификуваат и ќе ја претставуваат Македонија на претстојното Европско и Светско првенство. Веднаш по прогласувањето на победниците, Клаудиа Ларучиа, кореограф од Италија ќе одржи свој семинар и ќе биде отворен за сите танчери. По завршувањето на семинарот од 20:30 часот на плоштадот „Гоце Делчев“ ќе се одржат танц битки во три категории.
На 14-ти мај повторно во Спортската сала „Парк“ ќе се случува интернационалниот натпревар „Artist Hub Dance Competition“, каде што учество ќе земаат танчери од Македонија, Србија, Бугарија и Грција, а најдобрите 20 кореографии ќе обезбедат пласман во Гала вечерта која што ќе се случува од 19:00 часот во Спортската сала „Парк“. Покрај натпреварувачкиот дел, во недела во Домот на АРМ во Струмица ќе се одржи и контемпорери семинар на кој ќе говори Рикардо Кампос Фреире, кореограф од Португалија.
