Викендот во Москава на големата сцена во Кремљ палатата се одржа традиционалниот 10-ти „Меѓународен ден на руската романса во Кремљ“, каде настапија најдобрите вокали на светот. Меѓу нив свој настап имаше и струмичанката Јаворка Витанова, која во дует со Сергеј Обабкин изведоа познато дело од руската класика.
„Чувството е неопишливо, а одговорноста огромна. Овој концерт е дел од најспектакуларните музички настани во Москва, се одржува секоја година и има претставници од цел свет. Бев поканета од организаторите како победник на натпреварот „Романсијада“ во Москва во 2018 година. За мене секој концерт е посебен и давам се од себе. Годинава ми е во план да повторно одржам солистички концерт во Струмица, дома, пред мојата омилена публика, што значи се гледаме наскоро со убава музика“, вели за Радио СтрумицаНет младата оперска певица Јаворка Витанова.
Како дел од јубилејната програма, на сцената настапија изведувачи од Русија, Кина, Јужна Кореја, Бугарија, Македонија, Кипар, Ерменија, Киргистан и Узбекистан. Романсите беа изведени во придружба на големиот оркестар под диригентство на почесниот уметник на Русија, Дмитриј Дмитриенко.
Одржувањето на уникатен романтичен фестивал е долга традиција, во првата сабота од февруари редовно се одржуваат концерти, привлекувајќи ги водечките романтични уметници на планетата. Проектот се спроведува под покровителство на Светската организација УНЕСКО.
Значаен придонес во зачувувањето и развојот на жанрот има Меѓународниот натпревар за млади изведувачи „Романсијада“, кој открива многу нови имиња, меѓу кои беше и Јаворка Витанова од Струмица, која во 2018-та година на „Романсијада“ ја освои првата награда и доби златен медал.
