Вечерва струмичани ќе одлучуваат кои мерки да се финансираат за подобар квалитет на воздухот во Струмица

Денеска (четврток, 24 октомври) од 18:00 часот во хотелот „Вила Парк“ во Струмица ќе се одржи втората форумска сесија од проектот „Справување со загадувањето на воздухот“ што Општина Струмица и Програмата за развој на Обединетите Нации (УНДП) го спроведуваат.

Ќе бидат презентирани мерките за подобрување на квалитетот на воздухот во општина Струмица, а присутните граѓани ќе гласаат за којa мерка да се трошат парите од околу 340.000 американски долари.

„Ќе се претстават неколку конкретни мерки, со цел да се одберат најсоодветните кои општината заедно со УНДП ќе може да ги спроведе во текот на 2025 година. Тие мерки може да се фокусираат на зголемување на енергетската ефикасност на училиштата, замена на нееколошките системи за греење во јавните општински објекти, поставување на системи за производство на струја од обновливи извори, изградба на велосипедски патеки, креирање на парк-шуми и слично. Фондот кој е на располагање за спроведување на мерките изнесува околу 340.000 американски долари. Општина Струмица се очекува да кофинансира половина од средствата за оваа намена“, соопштија организаторите.

На првата форумска сесија беа презентирани резултатите од мониторингот што го правеше лабораторијата Амбикон од УГД Штип при што беше констатирано дека најголем загадувач е горење на биомаса, односно горењето дрва.