Денеска се палат коледарски огнови, коледарските огнови се предвесник на Бадник. Ова е стара македонска традиција, вечерта пред Бадник да се дочека надвор, крај оган, со чашка греена ракија во рацете, со погача, со македонски песни, со желби за здравје и бериќет.
Иако според толкувањата на црквата овие обичаи се пагански, граѓаните ги практикуваат како можност за дружење пред божиќните празници.
„Огновите имаат голема симболика во народното одбележување на голем број празници, почнувајќи од коледарските огнови, па оние за Василица и Прочка. Огнот е неизбежен дел од обредното празнување, симболиката на огнот е многузначна“, вели за ТВ канал ВИС познатиот фолклорист Иван Котев, кој пет децении е меѓу струмичани и се интересира за начинот на кој тие го празнуваат Бадник и Коледе, какви обичаи почитуваат и што знаат за нивното значење.
Македонската Православна црква е против начинот на кој се слави Коледе. Сметаат дека јадењето мрсна храна и пеењето еротски песни во очи на Божиќ не доликува на православното одбележување на празникот Бадник. Котев, пак, вели дека тоа се остатоците од паганизмот кои имале за цел да се поттикне плодноста во семејството, на добитокот, но и родот на нивите.
