Струмичанецот Васил Гарванлиев синоќа го одржа концертот во Скопје во прекрасниот амбиент на Куршумли Ан, во Старата чаршија.
Уникатна концертна вечер како вистинска магија, перформанс со пеење, танцување, свирење, глума и интерактивен контакт со публиката, која ја имаше во голем број од сите страни на објектот, а музичарите во централниот дел, при што се создаде интимна атмосфера и блискост меѓу Васил и сите што дојдоа да го слушнат во живо.
Џез, етно, класика, поп, со гласот на Васил Гарванлиев се слушаше во Куршумли Ан, прв концерт од планираната турнеја која продолжува утревечер во неговата родна Струмица, а потоа и неколку концерти во Канада и САД.
„Во Куршумли Ан, поточно во моето сакано Скопје вчера нѝ се случи магија, долго ќе го паметам овој концерт, вашите насмевки, солзи, и вашата поддршка. Овој проект неслучајно го започнав од „дома“ пред да го претставам утре во мојата родна Струмица, а потоа и во светот. Македонската музика секогаш била и ќе остане дел од мојот уметнички идентитет како автор и изведувач, а вчера се уверив дека има и жедна публика за нашата музика“, објави по концертот на социјалните мрежи Васил Гарванлиев.
