Министерката за труд и социјална политика, Јованка Тренчевска заедно со амбасадорот на Британија во Република Северна Македонија, Метју Лосон, градоначалникот на oпштина Струмица, Костадин Костадинов, претставничката на УНФПА, Афродита Плавјанска Шалја го посетија Здружението на граѓани „Скај плус“ во Струмица, кое покрај засолниште има воспоставено и советувалиште за жени жртви на семејно насилство и нивните деца во Општина Струмица.
„Скај Плус“ како засолниште за жртви од насилство, е пример за модел на соработка кој ги вклучува сите клучни чинители, Министерството за труд и социјална политика, локалната самоуправа, полицијата, граѓанското општество и приватниот сектор. Владата на Република Северна Македонија, со поддршка од Британската амбасада, презеде цврсти чекори во заштитата на жртвите на Семејно Насилство и Родово базирано насилство и овозможување на соодветни услуги за заштита и поддршка на жртвите на насилство и нивните деца“, кажа министерката за труд и социјална политика, Јована Тренчевска.
Таа посочи дека потребно е следење на текот на живот на жртвата со цел повторно интегрирање во општеството.
Амбасадорот Метју Лосон, го истакна значењето на поддршката на жените и девојките кои претрпеле семејно насилство.
„Тоа е неверојатно важно прашање и навистина мислам дека фактот да се биде во Струмица заедно со граѓанскиот сектор, заедно со локалната самоуправа е навистина добар пример за соработка помеѓу партнерите во оваа земја и меѓународните партнери и заедничката поддршка насочена кон жените и девојките и ова прашање останува да биде приоритет за британската Влада преку нашата работа во оваа земја“, кажа амбасадорот Лосон.
„Заедно со нашите партнерски институции и организации работиме на неколку полиња во унапредување на сервисите за жртвите и преживеаните. Помогнавме да се заокружи законската рамка преку сите подзаконски акти, да се изработи Протоколот за мултисекторско постапување и соработка и да се дизајнира модел на интегрирано собирање и анализа на податоци за родово базирано и семејно насилство. Преку заедничките кампањи и локални средби, интензивно работиме услугите да бидат достапни особено до ранливите категории на жени и девојки. Не застануваме тука, бидејќи само заеднички можеме да ги подобриме услугите, а воедно и да му ставиме крај на насилството“, порача Афродита Плавјанска Шаља пред присутните.
Градоначалникот на општина Струмица Костадин Костадинов ја изрази поддршката на општината во борбата против родово базираното насилство и заштита на жените од семејно насилство.
„Општина Струмица, го држи врвот и нема намера да се симне од него. Така е во многу области, така е и во областа на згрижување на жените – жртви на семејно насилство и нивните деца. Струмичкиот „Шелтер центар“, како позитивен пример за соработка на Здружението на граѓани „Скај Плус“ и Општина Струмица, е вистински доказ за тоа“, кажа Костадинов.
Стојне Митева од здружението „Скај Плус“ изрази огромна благодарност и од име на „Скај Плус“ и од Општина Струмица кон Британската Амбасада и УНФПА.
„Навистина без нивната поддршка немаше ниту да се создадат услови за напредок на организацијата и сите внатрешни документи коишто и се потребни на организацијата со цел комплетна заштита на жртвите на семејното насилство но и изработката на прирачникот, секако повторно под капата на УНФПА и Британската амбасада. Јас сум бескрајно благодарна за тоа што амбасадата дозволи прирачникот да се појави и да биде достапен и онлајн па така Букварот како до шалтер центар односно до реплицирање на моделот, во којшто ќе бидат вклучени сите чинители во општеството зошто само така можеме да се избориме со болката којашто ја чувствуваат за жал многу жени во Струмица, во земјава, во регионот“, кажа Митева.
