Струмичани денеска им се поклонуваа на своите заштитници, Светите Петнаесет Тивериополски Свештеномаченици.
Празникот посветен на Петнаесетте светители, кои го положиле животот за христијанската вера, беше одбележан со Света Божествена литургија со која чиноначалствуваше Митрополитот Дебарско-кичевски Тимотеј, во сослужение на Митрополитот Тетовско-гостиварски Јосиф и Митрополитот Кумановско-осоговски Јосиф. На Литургијата молитвено и евхаристиско учество имаа Митрополитот Струмички Наум и за прв пат во Струмица како гостин на литургијата, пратеникот на патриархот на Бугарската православна црква Нофит, Епископот Велички Сиониј.
Тој на крајот од службата им се обрати на присутните верници и го прочита писмото со поздрави од врвот на Бугарската Православна црква, потенцирајќи дека петнаесетте светители се многу почитувани и во Бугарија.
На новинарско прашање околу актуеланата тема со писмото кое МПЦ-ОА го упати до бугарската православна црква, бугарскиот епископ изрази надеж дека многу брзо и тоа ќе биде решено.
За отец Јаков од Струмичката Епархија, присуството на бугарскиот епископ и поздравното писмото кое денеска беше упатено од нивната црква е многу значајно. Тој се надева дека МПЦ што побргу ќе стапи во канонско и ефхаристиско единство, бидејќи како што рече, тоа го очекува и БПЦ и е заедничка желба на двете страни.
„Писмото коешто е упатено и неговото обраќање е во духот на сестринска црква, а она што велиме мајка црква се однесува исклучиво во однос на останатите православни цркви и ако веќе го толкуваме поимот мајка црква, тоа е пред се акт на љубов отколку некаква позиција на власт“ - вели отец Јаков.