ФК Беласица официјално го соопшти новиот шеф на стручниот штаб кој ќе го замени Раде Цицмиловиќ кој деновиве ја напушти функцијата поради непоседување на Про УЕФА диплома. Новиот тренер кој ќе ги предводи сениорите на струмичкиот прволигаш е српскиот тренер Марјан Живковиќ.

Живковиќ е родум од градот Пирот, сместен во југоистокот на Србија. Тој своите фудбалски и менаџерски кариери ги започнува во ФК Раднички, клуб од родниот му град. Фудбалската кариера ја започнува во 1990 година и има играно во српски, бугарски, црногорски и кинески клубови меѓу кои и белградска Црвена Ѕвезда.

Во 2006 година ја започнува и менаџерската кариера и работи во неколку српски клубови, а оваа година менаџираше и со кинескиот клуб Шенјан Дунчин, за сега повторно да се врати на Балканот и да започне да го води новиот прволигаш во Македонија, ФК Беласица.

Живковиќ ќе мора што е можно побрзо да се прилагоди затоа што Беласица веќе утре ќе ги знае противниците, а новата сезона започнува за две недели, сепак според сликите кои ги објави порталот Спортмедиа неколку часа пред официјалното соопштение на клубот, Живковиќ веќе започна да работи со сениорите на стадионот Младост во Струмица.