Еден час, со транспарент во раката, со залепена уста, на плоштадот во Струмица, познатиот актер и еден од најгласните говорници против отворањето на рудникот за злато и бакар „Иловица-Штука“, Стојан Велков Трн, го изрази својот револт поради ситуацијата со рудникот или како што напиша тој на Фејсбук, нефункционалноста на сите чинители во овој процес.

Ова лично незадоволство, како што најави Велков, ќе го прави секој ден од 20:00 до 21:00 часот на струмичкиот плоштад со различен слоган во раце. Во својата објава на Фејсбук тој напиша дека овој чин е негов личен крик против како што вели, нерешавањето на прашањето со рудникот. Тој порача дека неговата акција нема политички цели и кампањи.

„Ова ќе биде мој личен бунт против сите чворови кои ги ствараат политичките чинители кои, и покрај сите правни и еколошки недоследности за сулудиот потенцијален проект рудникот за злато и бакар „Иловица - Штука“, не најдоа за сходно да стават точка и да го решат еднаш засекогаш тоа прашање“, напиша Велков. 

Нему му се приклучија уште неколку активисти кои дојдоа со свои транспаренти, меѓу кои и неговата колешка, актерката Оливера Аризанова Мансбарт.

Инаку, од Еколошкото здружение „Здрава котлина“ побараа објаснување од државата зошто се уште ја нема обжалено пресудата на Управниот суд во врска со рудникот. Со неа, се поништува решението на Второстепената комисија за одлуката на Министерството за економија за одбивање на издавање на дозвола за експлоатација на концесионерот „Еуромакс Ресурси“. Тие се сомневаат дека никој досега не направил жалба, ниту пак планира да достави жалба до Виш управен суд.