Здружението за локална демократија Центар на заедницата на општина Струмица, во рамките на проектот „Младите - клуч за иднината на бизнис секторот“, денеска во 17:00 часот на третиот кат во Трговскиот центар „Глобал“ во Струмица ќе отвори Инфо пункт за млади невработени и бизнис секторот.

Станува збор за канцеларија во која младите ќе можат да се обратат и да добиваат информации за тоа што нуди бизнис секторот во Струмица, во делот на вработување, практична работа и волонтерство.

Инфо пунктот ќе го користат и бизнисмените, кои преку него ќе дојдат до млади кадри за вработување според потребите во сопствените бизниси.

Инфо пунктот ќе дава и услуги на кариерно советување, профилирање на личноста и помагање во избирање на професија за младите невработени.

Проектот „Младите - клуч за иднината на бизнис секторот“ се спроведува во партнерство со Здружението за заштита на бизнис интересите на компаниите во Струмичкиот регион – Струмичка бизнис заедница, а во рамките на „Регионалната програма за локална демократија во Западен Балкан – ReLOaD“, која е финансирана од Европската унија (ЕУ), а ја спроведува Програмата за развој на Обединетите нации (УНДП).

Проектот работи во насока на подобрување на положбата на пазарот на трудот на младите невработени лица и лица кои се дел од маргинализирани групи, првично преку детерминирање на компетитивните предности со кои што тие лица располагаат.