Млади одбојкарки од Македонија, Словачка и Србија, денеска и утре учествуваат на првиот Меѓународен турнир во одбојка за жени, во чест на професорот, поранешен одбојкар и тренер, Илија Караманов, што го организира Одбојкарскиот клуб „Наковски Волеј“ од Струмица.

Попладнево по официјалното отворање на турнирот во Спортската сала на СОУ „Димитар Влахов“, се одигра првиот натпревар помеѓу екипите, шампионот на Македонија, ОК „Работнички“ и ОК „Брусно“ од Словачка, а потоа и помеѓу домаќинот ОК „Наковски Волеј“ и ОК „Партизан“ од Белград, Србија. Турнирот продолжува и утре со финалното разигрување помеѓу најдобрите екипи.

Илија Караманов, кој почина на 9 август годинава на 58-годишна возраст, беше десет години одбојкар на некогашниот Одбојкарски клуб „Југославија“ од Струмица, тренер на некогашниот женски одбојкарски клуб „Македонија Траншпед“ од Струмица и помошник на тренерот Кире Ричлиев во ОК „Струмица“ од 1994 до 2004 година. Од 1992 година беше вработен во Општинскиот сојуз на спортови во Струмица, како одговорен за финансиското работење на оваа спортска организација.