Активистите од „Здрава котлина“, „Младите од Иловица – Штука“, „Еко долина“ и поддржувачите во недела, 26 мај од 15:00 часот организираат протестен моторизиран караван против рудникот Иловица-Штука низ улиците на Струмица и населените места во струмичко.

Како што најавуваат, караванот ќе се состои од автомобили и мотори кои ќе поминат приближно 60 километри по определена патека, движејќи се во колона со намалена брзина на движење.

„Ова е предупредувачки протест и показна вежба што евентуално би можела да се трансформира во целосна децентрализирана блокада на цел Југоисток во блиска иднина, доколку владата на премиерот Заев не ги уважи законите и јасно изразената воља на граѓаните за стопирање и одземање на истечената концесија за рудникот Иловица-Штука. Знаеме за притисоците врз Владата од Трафигура, новиот сопственик на Еуромакс, но им порачуваме дека ова не е Африка за да можат како таму нечујно да иструјат илјадници луѓе притоа подмитувајќи политичари за да си играме на куклен театар“ - стои во повикот за караванот.

Според активистите, сите треба да бидат свесни дека ако нема закони и правда тогаш, како што велат, борбата за живот и анархијата ќе го изгори куклениот театар.

„Апелираме до Владата и премиерот Заев да постапат по законите и да го спречат ова масовно зло што не познава граници во трка за профит“ - велат иницијаторите на протестниот караван.

Маршрута: Струмица (Агрокор-Десно кон кружен тек кај силоси-Десно кон кружен тек пред Добрејци-ул. Ленинова-Центар-Десно под плоштад-Лево на раскрсница кај училиште Сандо Масев-Лево кон кружен тек кај Бурчо-Лево кон бул. Маршал Тито-Десно кон ул. Балканска-Лево на раскрсница пред Техничкото училиште-Транзитен пат-Лево кон Силоси-Десно кон)-Дабиље-Робово-Муртино-Моноспитово-Бориево-Турново-Секирник-Зубово-Ново Село-Сушица-Секирник-Турново-Штука-Иловица-Турново-Босилово-Дабиље-Агрокор.