Импровизирана модна писта, а околу неа многу народ од различни возрасти, возбудени деца, пресреќни што беа во улога на манекени, некои за прв пат, а некои по втор пат на втората манифестација, или модна ревија на деца со попреченост, насловена „Убави сме, свои сме“, што ја организираше Здружението за помош и поддршка на лица со Даунов синдром „Вера“ од Струмица.

Сите беа облечени во креации од различни бутици од Струмица, но и од градовите од каде доаѓаа, а ги имаше од цела држава. И нивните придружници, познати фаци ги имаше од секаде. Сите тие испратија порака дека под оваа небо сите сме исти и еднакви и посакаа свет без различности.

Годинава домаќин беше хотелот „Вила Парк“. Во големата свечена сала се одржа манифестацијата, и таа беше претесна за толку народ кој дојде да ја даде поддршката на овие деца, но и на нивните родители.

Догодина, веќе традиционална, придружници на децата-манекени ќе бидат нивните родители, така најави организаторката, Анче Туфекчиева, упатувајќи голема благодарност до сите учесници, но и до компании и општините Струмица и Валандово за големата поддршка, оти децата со попреченост заслужуваат внимание и простор да ги истакнат своите квалитети, но потребна е поддршка и подадена рака.

ФОТОГАЛЕРИЈА