Од денеска до 15-ти Август во Струмица петнаесеттина уметници од Македонија, Бугарија, Србија, Црна Гора, Хрватска и Чешка создаваат нови ликовни дела за меѓународната Струмичка ликовна колонија, која синоќа по 59-ти пат беше отворена во Центарот за култура „Антон Панов“.

Ова најстара ликовна колонија во Македонија и една од најстарите на Балканот ја отвори градоначалникот на Струмица, Костадин Костадинов кој е и покровител на ликовната колонија.

Со започнување на стартот на работата на уметниците, во фоајето на Центарот за култура беше отворена и изложба на избрани дела од познати и еминентни автори од земјава и странство, кои учествувале на Струмичката ликовна колонија и кои оставиле голем белег не само на колонијата, туку и за развојот на современото македонско ликовно творештво, како што се Трајче Јанчевски, Стојан Пачоов, Танас Луловски, Глигор Чемерски, Ана Темкова, Менде Ивановски, Владимир Ѓоргиевски и уште многу други автори.

И годинава во рамките на ликовната колонија ќе работи мозаичката работилница, која е основана пред 29 години од страна на професорот Газанфер Бајрам.

Делата што ќе ги создадат петнаесеттината уметници, струмичани ќе имаат можност да ги видат на изложбата која ќе биде отворена на 11-ти Септември, денот на ослободувањето на градот Струмица.

Во изминатите 58 години, Струмица и Струмичката ликовна колонија беле домаќини на над 1200 уметници од целиот свет и тие создале над 3000 дела кои се чуваат во депото на Центарот за култура „Антон Панов“, кој е и организатор на ова меѓународна манифестација.