Повеќе од 10 години Македонците од дијаспората кои потекнуваат од регионот на општината Босилово, во овој период се собираат на заедничко дружење и забава на традиционалната „Иселеничка средба 2022“, која се одржа синоќа во дворот на училиштето „Гоце Делчев“.

Добредојде и пријатен престој во родниот крај на синоќешната „Иселеничка средба“ им посака градоначалникот на општина Босилово, Ристо Манчев, а за доброто расположение со традиционални, но и новосоздадени македонски песни се погрижија нашите естрадни уметници Стојне Николова и Марјан Коцев.

„За жал судбината сакала Македонците низ вековите, низ годините и до ден денес да бидат распространети ширум светот. Македонската песна и македонската музика е таа која ја одржува врската помеѓу нашиот народ во дијаспората и родниот крај. Целта на овие средби е да се обноват пријателствата и дружбите помеѓу Македонците кои останаа овде и Македонците ширум светот“ – кажа во изјавата за медиумите градоначалникот Манчев.

Годинава „Иселеничката средба“ е во рамките на манифестацијата „Босилово – Културно лето“ кое започна минатиот месец и ќе трае до крајот на август со дваесеттина настани, меѓу кои се концерти, ликовни изложби и работилници, поезија и литературно читање.