На Мокринските извори, Општина Ново Село го чествуваше празникот Илинден. Општината заедно со здруженијата „Иван Василевски“ и „Кво Вадис Ад Астра“ организираа книжевно-уметнички настан за да се одбележи најсветлиот и најсветиот македонски национален празник.

Напладне на Мокринските Извори се одржа книжевно-уметничкиот настан „Илинден е љубов“ со богата уметничка програма во која се читаа стихови од најголемите македонски поети, во интерпретација на членовите на ЗГ „Иван Василевски“. Беседа за Илинден имаше д-р Ана Витанова-Рингачева, а музичкиот дел го направија Елисавета Бончева, Боби Ѓошиќ и бендот „Фортуна“ од Скопје. Програмата беше збогатена со настапот на играорците од КУД „Јане Сандански“ од Ново Село, под раководство на Александар Шопов, а младите сликари од ликовната секција од општинска установа Дом на културата „Јане Сандански“, под менторство на академскиот сликар и директор, Ѕвонко Тилев создадоа нови дела.

За двата Илиндена говореше градоначалникот на општина Ново Село, Ѓорѓе Божинов.

„Љубовта на обесправениот народ кон Македонија и природниот стремеж за слободна држава, придонела да десетици херои и народни борци, ги положат своите животи, за слобода и човечки правдини. Токму Илинден е крикот на поробениот Македонец, чија столетна борба за слобода и човечки правдини трае и до ден денешен. Македонецот низ историјата, бил исправен пред бројни предизвици, понижувања, прогони, но идеата за сопствено парче земја и независност од страни окупатори, никаква тортура не ја избришала од генот на Македонецот“ – кажа во своето обраќање градоначалникот Божинов.