Општина Струмица денеска со пригодна свеченост пред споменикот на Гоце Делчев на плоштадот во Струмица ги одбележа двата Илиндена, 119 години од Илинденското востание и 78 години од Првото заседание на АСНОМ.

Свежо цвеќе пред споменикот положија претставници на Советот на општината, на Општинскиот одбор на Сојузот на борците и нивните следбеници, на политичките партии и локални институции.

За значењето на празникот говореше Елена Маѓеровска Паликарова, член на Советот на општина Струмица.

„Во тоа мноштво од празници испишани со црвено, сепак постои еден кој стожерно е исправен над сите останати. Тоа е денот над деновите, тоа е празникот над празниците, тоа е квасецот на нашата гордост. За Денот на Републиката станува збор, за тој преголем Илинден кој се задомил во нашите срца за да ги растреперува од возбуда на секој 2 Август“ - кажа Маѓеровска Паликарова.

Во чест на празникот, револуционерна поезија рецитираа членови на рецитаторската секција во Домот за деца и млади „Благој Мучето“.