Некаде на пладне коњаницата составена од пет млади луѓе од Радово, дојдоа во Струмица за да се поклонат пред споменикот на претседателот Борис Трајковски во големиот парк и пред споменикот на македонскиот револуционер Гоце Делчев на плоштадот од каде го продолжија патот кон Бигорскиот манастир, а таму ќе се приклучат на традиционалниот коњички марш, поминувајќи го патот долг околу 200 километри до Крушево на одбележувањето на големиот национален празник, 2-ри Август.

Пред тргнувањето тие присуствуваа на света литургија во Католичката црква „Свети Пророк Илија“ во Радово, на која служеше отец Зоран И. Стојанов и добија благослов за успешен и мирен пат. По црквата се упатија кон Босилово, каде пред општинската зграда беа пречекани од градоначалникот на општина Босилово, Ристо Манчев и градоначалниците на општините Ново Село и Василево, кои со голем број граѓани ја испратија коњаницата кон славното Крушево.