Завршена е реобдукцијата на телото на починатиот 26-годишен Јован Витанов кое беше пронајдено кај Ново Село. Се чека уште на дополнителните резултати од токсиколошките анализи, кои сѐ уште се работат, објави порталот НоваТВ.

Струмичкото Јавно обвинителство завчера издаде наредба за дополнителна тимска реобдукција на телото кое беше пронајдено на 7 овој месец, во местото Ореш, во атарот на струмичко Ново Село.

Резултатите од реобдукцијата се очекува да бидат доставени до Основното Јавно обвинителство во Струмица во текот на денешниот ден или утре.

Според информациите на НоваТВ, на телото на 26-годишното момче, освен што имало видливи модринки, немало траги од нож, гребаници, убодни или прострелни рани.

Од Обвинителството во Струмица и денеска појасниле дека „повторната обдукција била наложена за да се расчистат сите дилеми околу причините за смртта“.