На Универзитетот „Аристотел“ во Солун, Грција е поставена изложбата „Самогласки во лет“ на Кристина Зимбакова од Струмица, како дел од целодневниот симпозиум „Силвија Плат и трансатлантизмот“, каде излагања имаа десеттина најзначајни светски проучувачи на американската поетеса Силвија Плат.

Настанот беше поддржан и од Фондацијата „Фулбрајт“ и Универзитетот „Стоктон“ од САД. Присуствуваа и бројни професори и студенти од Институтот за англиски јазик, како и многу гости, а имаше и пренос во живо преку интернет за ограничен аудиторум.

„Ова е втора моја самостојна изложба во склоп на светски симпозиум за Силвија Плат, кој се одржува на секои пет години, а двапати сум учестувала на групни изложби во креативниот дел на симпозиумите, така што моето учество беше на покана на организаторите. Изложбениот простор беше извонреден, а делата мислам дека наидоа на одличен прием поради тоа што се прилично експериментални, заради сложената текстура и стиховите или извадоците од писмата на Плат испишани со лишаи“, ни кажа Кристина.

ФОТОГАЛЕРИЈА од изложбата во Солун >>>