Вечерва во градот под Царевите кули, во градот на музиката и расадникот на најдобрите вокали, по пауза од две години ќе се одржи Фестивалот на староградски песни и серенади „Под кулите на Струмица“.

Традицијата продолжува како што продолжува и желбата за староградската песна и серенада, кои во минатото се задоволувале преку постоење на мали пејачки групи, хорови, ансамбли и културно уметнички друштва.

На 12-то издание „Под кулите на Струмица“, кое ќе се одржи на големата сцена во Центарот за култура „Антон Панов“, покрај домаќините „Распеани Струмичани“ ќе учествуваат и „Распеани Радовишани“, „Распеани Валандовчани“, „Распеани Гевгеличани“ и групата „Орнаменти“ од Штип.

Фестивалот кој симболично е насловен „Под кулите на Струмица“, по една од најпознатите струмички песни е од ревијален карактер, а е со поддршка на Министерството за култура и Општина Струмица.

Петок, 13 мај | 20:00 часот | НУЦК „Антон Панов“ Струмица | Влез слободен