На стрелиштето кај селото Водоча по 28-ми пат се одржа традиционалниот Меморијален турнир во стрелање на летачки мети „Ване Арапов 2022“, во организација на Ловното друштво „Беласица“ од Струмица и стрелачките клубови „Беласица Шат“ и „Рефлекс Шат“ од Струмица.

Меѓу учесниците на турнирот, кој ги имаше од повеќе ловни друштва и стрелачки клубови во Македонија, беа и градоначалникот на Струмица, Костадин Костадинов и претседателот на Македонската Спортска Стрелачка Федерација, Јордан Тасевски.

Марјан Даскаловски, претседател на Ловното друштво „Беласица“ ги поздрав учесниците на турнирот посакувајќи им успеси во ова 28-мо натпреварување, а на гостите да уживаат во турнорот на најдобрите стрелци во Македонија.

Стартот го означи внукот на Ване Арапов, младиот Ване, кој прв испука во глинените плочки. Потоа следуваше и натпреварувачкиот дел, екипно и поединечно, а стрелците се натпреваруваа во дисциплината „трап“.

Поединечно, првото место го освои Иван Атанасовски, второто Блажо Митев, додека третото место го освои синот на Ване Арапов, Димитар.

Во екипна конкуренција првото место го освои ЗССК „Рефлекс Шат“ од Струмица, второто екипата на Стрелачкиот клуб „Стрелец“ од Скопје, а третото место ЗЛР „Гоце Делчев“ од Босилово.

Инаку претходно, претставници на ЛД „Беласица“, заедно со семејството на Ване Арапов го посетија неговото вечно почивалиште на Градските гробишта во Струмица.

ФОТОГАЛЕРИЈА