Општина Струмица и општина Серец, Грција во наредните 18 месеци ќе го реализираат проектот „Мрежа на велосипедски градови“, финансиран од Интеррег-ИПА Програмата за прекугранична соработка меѓу Република Северна Македонија и Република Грција 2014-2020.

Советот на општина Струмица денеска даде зелено светло за негова реализација со вкупен буџет за општина Струмица од 184.185 евра, од кои 85% ќе бидат финансирани од фондовите на Европската Унија, додека останатите 15% ќе бидат финансирани од Владата на Република Северна Македонија.

Станува збор за проект кој има за цел создавање на рекреативна велосипедска инфраструктура во градот, како што се: Вело Зона во Градски парк Струмица - изградба на велосипедска адреналинска патека („Pump track“ патека), Вело Полигон за деца во Градски парк, Уредување на планински велосипедски патеки на месноста Чам Чифлик, поставување на Станици за поправка на велосипеди во Градски парк, Подготовка на мастер-план за идни проекти на општина Струмица од областа на велосипедизмот, велосипедската инфраструктура и безбедноста во сообраќајот, како и активности за прекугранична соработка помеѓу проектните партнери.