Во Струмица денеска пристигнаа 600 дози вакцини „AstraZeneca“, а вакцинацијата на првата група пријавени граѓани постари над 77-годишна возраст започнува од утре, среда, 31 март во 07:00 часот, информираше директорката на ЈЗУ „Здравствен дом“ Струмица, Љубица Митева.

Вакцинирањето ќе се спроведува во Службата за спортска медицина која работи во рамките на ЈЗУ „Здравствен дом“ Струмица, согласно пријавувањето кај матичните лекари, преку „Мој термин“.

Националниот систем „Мој термин“ од синоќа од 19:00 часот ги отвори термините преку кои матичните лекари закажуваат вакцинација на гараѓани што се опфатени во првата фаза и спаѓаат во групата 1Б од Националната стратегија за ковид-имунизација.

Матичниот лекар не секој граѓанин кога му закажува тремин за вакцинација, должен е да му каже во колку часот треба да се вакцинира и на кој пункт во здравствената установа во која се спроведува вакцинација против Ковид-19.

Граѓаните кои имаат термин и ќе ја примат вакцината потребно е со себе да понесат здравствена книшка и лична карта, за да бидат внесени во системот кој води грижа и за нивната ревакцинација.