Учениците Славе Мирчовски и Зоран Колев од СОУ „Никола Карев“ од Струмица изработија мебел за потребите во канцеларии на Министерството за образование и наука. Тие денеска беа во Скопје каде го монтираа мебелот. При монтажата ги посети и министерката за образование, Мила Царовска која го изрази звоето задоволство што се запозна со младите „мајстори“ ученици во дрвопреработувачка струка на СОУ „Никола Карев“.

„Тие се веќе вешти мајстори кои изработија и ни подарија мебел за нашите канцеларии. Славе и Зоран се трета година, но веќе го имаат „испечено“ занаетот, а нивите професори Никола Узунов и Јане Танев може да бидат горди на своите ученици“ – кажа министерката Царовска.

Двајцата средношколци велат дека се многу среќни што одлучиле да учат средно стручно, бидејќи се сигурни што ќе работат по завршувањето. Задоволство им било што изработиле мебел за Министерството за образование и наука.

Министерката Царовска најави дека од следната година ќе се отвораат многу нови стручни смерови во училиштата и ги охрабрува сите млади луѓе кои се заинтересирани да учат стручно образование.

„Со стекнување на овие вештини тие ќе бидат конкурентни за вработувања и соодветно образовани согласно потребите на пазарот и компаниите“ – кажа Царовска.