Планинари на Планинарскиот клуб „Ентузијаст“ од Струмица, придружени од планинари од Валандово, утрово од пред споменикот „Македонија“ во Градскиот парк во Струмица, тргнаа кон вечното почивалиште на трагично загинатиот претседател Борис Трајковски во Скопје, одбележувајќи ја 17-годишнината од смртта на вториот претседател на независна Македонија, кој загина во авионска несреќа на 26-ти февруари 2004-та во Босна.

Овој планинарски марш на релација Струмица – Скопје, по 16-ти пат го организира ПАОК „Ентузијаст“ од Струмица, се со цел да не се заборави ликот и делото на Трајковски, како што велат планинарите, на човекот кој неизмерно ја сакаше Македонија и граѓаните.

Поради пандемијата од Ковид-19 планинарите ќе пешачат до село Дедино, Радовишко, а на 26-ти февруари ќе поминат уште една етапа во Скопје до гробот на Борис Трајковски на гробиштата Бутел во Скопје, каде ќе се приклучат на одбележувањето на годишнината од смртта.

Пред тргнување планинарите положија цвеќе пред споменикот на Борис Трајковски, а среќен пат им посака градоначалникот на Струмица, Коста Јаневски.

Освен до Скопје, триесет планинари од Струмица и Валандово денеска пешачат и по падините на планината Беласица. Тие треба да се искачат на врвот „БоТра“ кој го носи името на Трајковски, на надморска височина од 1.880 метри.