Делегацијата на Европската Унија во Македонија, денеска напладне во Струмица ја стави на користење на младите од струмичкиот регион третата Европска куќа во Македонија, по Скопје и Крива Паланка.

Сосема новата „Europe House“ е основана од Делегацијата на ЕУ за да им служи на младите луѓе од Струмица и да функционира како младински центар за поширокиот регион.

На денешното отворање присуствуваа премиерот Зоран Заев, амбасадорот на Европската Унија во Македонија, Дејвид Гир и градоначалникот на општина Струмица, Коста Јаневски.

„Европската куќа ќе биде исклучително „жив“ простор во кој младите од општина Струмица, па и пошироко, ќе ги чуваат и негуваат европските вредности, преку разни форми на дружење, инфо-услуги, ЕУ-дискусии, реализација на проекти, промоции на ЕУ-настани, изложби, филмски, музички и мултимедијални настани, работилници и слично. Убеден сум дека оваа куќа ќе биде омилена дестинација за младите и дека сите настани кои ќе бидат реализирани ќе ги дадат посакуваните резултати“ – кажа во своето обраќање градоначалникот Коста Јаневски, кој на младите им го предаде клучот од ова ЕУ куќа, која се наоѓа спроти малиот Градски парк.