Денеска во Босилово премиерот Зоран Заев, министерката за труд и социјална политика, Јагода Шахпаска и градоначалникот на општина Босилово, Зоран Зимбаков, ја пуштија во употреба првата Детска градинка за згрижување на деца од предшколска возраст „Среќни насмевки“.

Детската градинка во Босилово е изградена од темел на местото на поранешната амбуланта која беше во руинирана состојба. Парите за изградба на градинката во висина од 15 милиони денари беа обезбедени од буџетот на Министерството за труд и социјална политика, а опремата и ентериерот се обезбедени со пари од буџетот на Општина Босилово. Капацитетот на градинката е за 55 деца, од кои 12 деца во јасли.

„Детската градинка „Среќни насмевки“ денеска не импресионира со шаренилото на множество кое ги нуди за секое дете. Можности за добро воспитување, за добра дружба, за учење, за развивање емпатија, но и за општествена одговорност кај најмалите, кај оние за кои градиме подобра иднина“ – кажа градоначалникот Зоран Зимбаков.

Премиерот Зоран Заев, потенцираше дека ова соработка помеѓу општината и Владата за изградба на Детска градинка е резултат на заедничкиот интерес на локалните власти и централната власт, се со цел да се реализира програмата за изградба на Детски градинки како приоритет на Владата и населението и услови за обезбедување правилен ран детски развој како влог во човечкиот капитал на нашата земја.

„Со изградбата и реконструкцијата на квалитетна инфраструктура за предучилишно образование ги јакнеме и професионалните компетенции на кадарот во градинките, кој има одговорна задача во процесот на градење на личноста на идните наши генерации. Од почетокот на мандатот на оваа Влада до денеска, отворени се 8 градинки со вкупен капацитет од 551 дете, а до крајот на 2021 година, во план е отворање на уште 13 градинки со вкупен капацитет од 1.384 деца“ - кажа Заев.