После Скопје и Крива Паланка, и Струмица добива „место на новата генерација“, кое ќе нуди можност за младите луѓе да земат активно учество во обликувањето сопствената, но и европската иднина на земјата. Делегацијата на Европската Унија во Македонија, утре во Струмица отвора „Europe House“. Церемонијата околу отворањето на Европската куќа, која се наоѓа спроти зградата на Општина Струмица, започна уште вечерва со светлосна инсталација во малиот Градски парк, музички настап на младите музичари, Стојан Стојанов на гитара и Магдалена Стојанова како вокал, во Европската куќа, како и изложба на младата сликарка Верица Арапова. Вечерва таму свој концерт во живо имаше и струмичкиот бенд „Диктили“.

Утре напладне, амбасадорот Дејвид Гир, шеф на Делегацијата на Европската Унија и премиерот Зоран Заев, ќе ја посетат Струмица за да ја отворат новата „Europe House“, заедно со градоначалникот Коста Јаневски. Сосема новата „Europe House“ е основана од Делегацијата на ЕУ за да им служи на младите луѓе од Струмица и да функционира како младински центар за поширокиот регион.

Официјалното отворање вклучува активности на отворено во малиот парк со учество на локални млади луѓе т.е. хип-хоп танцовото студио „One Way“, графити на уметникот Сашко Николовски, спортисти, уметници, како и младите европски амбасадори и аташеа од Македонија.

Градоначалникот  на Струмица, Коста Јаневски ќе го предаде клучот од „Europe House“ на младите луѓе од Струмица, а вечерта се планира „light аrt“ инсталација внатре во „Europe House“, како заокружување на денот на отворањето.