Од утре со почеток во 12:00 часот пред маркетот на „Тинекс“ во Струмица, ВМРО-ДПМНЕ почнува со собирање потписи за поништување на Законот за попис, најави Владимир Ристов, секретар на Општинскиот комитет на ВМРО-ДПМНЕ во Струмица.

Интегрален текст од прес конференцијата:

ВМРО-ДПМНЕ започнува со граѓанска иницијатива за Закон за поништување на Законот за Попис. Од утре, сабота 20-ти февруари со почеток во 12:00 часот струмичани имат можност да го дадат својот потпис на локацијата пред „Тинекс“ маркет. Со нашите потписи даваме поддршка на вистински Попис - статистичка операција која е потребна на Македонија наместо политички договор.

Власта на Зоран Заев овој закон го направи на брзина со Европско знаме без да прифати ниту еден од 40 амандмани на опозицијата. При што, Законот ги нема европските стандарди. Имено нерезидентните граѓани може да се попишуват само со приложување на единствен матичен број, додека исходот е зависен од некаков врзан потпис, а веќе политичарите лицитират со проценти и бројќи и потоа се демантираат и извинуваат, па дополнително се девалвира овој важен процес.

Почитувани, Пописот на една земја е најважниот настан за една економија, од која зависи планирање во стопанството, образованието, земјоделието и другите гранки и од која зависи кредитниот рејтинг на државата кој конечно удира по џебот на нас граѓаните. Да потсетиме дека во Европа поради пандемијата пописот се одложи за наредната година. За да се зачува здравјето на граѓаните власта има можност и сега да реализира електронски попис. Постојат повеќе разумни аргументи на нас граѓаните во ова наше барање. Затоа ги покануваме граѓаните ја поддржат оваа иницијатива и да го дадат својот потпис за вистински попис за Македонија!