Интернационалната фудбалска ѕвезда, струмичанецот Горан Пандев доби уште едно големо признание во кариерата и од Агенцијата за Млади и Спорт (АМС), прогласен за најдобар спортист на изминатата 2020-та година во Македонија.

Фудбалерот на Џенова имаше незаборавна година со Македонија. Во полуфиналето од Лигата на нациите падна Косово, а потоа во големото финале беше совладана и Грузија. Токму Горан Пандев беше стрелец на победничкиот гол во Тбилиси и ја однесе Македонија за првпат во историјата на ЕП.

„Жал ми е што не можам да бидам присутен оваа прекрасна вечер, па морам преку видео да се заблагодарам на сите за оваа награда, за сите што гласаа за мене и за АМС. Мислам дека за оваа награда најзаслужни се сите во репрезентацијата почнувајќи од селекторот, моите колеги, лекарите, масерите, економите... Изградивме едно семејство, направивме успех кој многу генерации го посакуваа и сонуваа. Го остваривме сонот на сите. Оваа награда е поттик за понатаму и ми дава поголема верба во себе да продолжам со успех да го носам репрезентативниот дрес, бидејќи дресот на Македонија за мене е светост“, кажа Пандев во своето видео обраќање.

Поради отсуство на Горан Пандев кој има настапи во Италија, наградата од премиерот Зоран Заев ја прими неговиот брат Сашко Пандев. Во борбата за првото место, Горан Пандев беше подобар од Дејан Георгиевски (таеквондо) и Емил Павлов (карате).