Премиерот Зоран Заев и градоначалникот на Струмица, Коста Јаневски денеска го посетија опожарениот трговски центар „Глобал“ во Струмица, кој синоќа 5 часа беше во пламен.

Премиерот Заев упати апел за солидарна акција со финансиско помагање со сите можни аспекти кои ни стојат на располагање, пред се како држава, Влада, секако како општина, но и како граѓани во духот на солидарноста. Вели дека е убеден оти многу брзо ќе го вратат „Глобал“ во нормала и сите граѓани кои имаат уништено имот ќе им го вратат во првобитната состојба.

„Добро е што нема повредени, нема изгубено човечки животи и тоа е најважно, се друго се надоместува“ – кажа Заев, кој упати благодарност до Територијалната противпожарна единица на Струмица која со шест возила и со 38 луѓе го гаснеше пожарот, но и до Противпожарните единици на Радовиш, Штип, Кавадарци и Валандово, кои пристигнаа на помош и учествуваа во гасењето на пожарот.

„Пожарникари не само од Струмица, туку и од околните градови, покажаа солидарност на дело и неуморно се бореа со пожарот. Изразувам длабока благодарност за нивната професионалност во справувањето со пожарот и оддавам длабок наклон за пожртвуваноста која ја покажаа до раните утрински часови, без откажување и без колебање сѐ до гасење на последниот пламен јазик“ – кажа премиерот Заев.

ФОТОГАЛЕРИЈА