Сениорскиот тим на Кошаркарскиот клуб „Струмица“ попладнево го одигра третиот натпревар од новата сезона на Втората лига. Тимот на „Струмица“ во спортската сала на СОУ „Никола Карев“ беше домаќин на КК „Шкупи“ од Скопје, кој успешно беше надигран од младите струмичани со краен резултат од 84:51.

На денешната средба шанси да се докажат имаа сите млади кошаркари во струмичкиот тим. Најефикасен беше Димитриев со 14 погодоци, а веднаш зад него е Георгиев со 13 кошеви и Николов со 11, Божинов и Пиперевалиев постигнаа по 10 погодоци, Абрашев и Пелтековски 8, Динев 6, а Ахтаров и Вучков 2.

Сезонава тимот на „Струмица“ е најмлад во Втората лига со просек од 18,3 години. По своето реформирање струмичкиот тим ја започна оваа сезона со домашна победа над „Куманово“ од 67:63, но беше поразен во второто коло на гости од велешки „Борец“. Наредното коло струмичките кошаркари ќе ѝ гостуваат на „Риниа“ во Куманово.