Ансамблот за народни игри и ора „Тримери“ од Струмица во сабота (14 декември) од 19:00 часот во големата сала на Домот на АРМ, ќе го одржи традиционалниот Годишен концерт.

Покрај стотината струмички играорци на концертот, кои ќе се претстават со новиот репертоар, а ќе презентираат и традиционални народни носии од Македонија, како гости ќе настапат КУД „Сушевски бисери“, оркестарот на ООУ „Никола Вапцаров“ од Струмица, под раководство на наставничката Милена Ристовска и талентираниот вокал, струмичанката Славица Ангелова.

Ансамблот „Тримери“ кој постои повеќе од 12 години, со своите концерти низ Европа го претставува македонското фолклорно творештво и ги негува традиционалните обичаи од Струмичкиот регион, со што го доби епитетот амбасадор на Струмица и Македонија насекаде низ Европа каде настапува.

Покрај негувањето на фолклорното творештво, народните обичаи, игри, Ансамблот „Тримери“ ги презентира и традиционалните македонски носии, од кои располага со огромен број, кои ги има од најмалото, па до највозрасниот член на „Тримери“.

Сабота, 14 декември | 19:00 часот | Дом на АРМ Струмица