Хрватскиот гитарист, Андреј Грозданов, кој е со македонско потекло, утре (сабота, 9 ноември), во 19:00 часот во НУЦК „Антон Панов“ ќе одржи концерт насловен „Gospel on Guitar“.

Грозданов е еден од најпознатите гитаристи во Хрватска, кој имал соработка со познати светски музичари меѓу кои е и Влатко Стефановски.

На концертот, струмичани ќе имат можност да го слушнат репертоарот од неговиот најпродаван албум, кој е обработка на познати госпел песни.

Гости на концертот на Андреј Грозданов со својот инструмент ќе бидат, професорот Васко Пиличев, како и младиот гитарист од Струмица, Таќи Дробаров.

Инаку, Андреј Грозданов има издадено голем број албуми, а има учено и свирено со голем број светски познати гитаристи. Ментор за гитара му бил ексцентричниот англиски виртуоз на гитара Pete Langman – долгогодишен колумнист на магазинот „Guitar Player”, додека другите учители му биле: John Abercrombie, Frank Gambale, Michael Angelo, Hugh Burns (George Michael), Pierre Bensusan i Eric Roche. Како гитарист на современата христијанска музика, тој сними над 200 песни на албуми, изведби во живо и студиски снимки, а со своето меѓународно искуство овозможи да се развие овој жанр во Хрватска. Оставајќи вистински белег како еден од пионирите во оваа област. Андреј често соработувал со добитниците на греми наградите во ЦЦМ жанрот како што се Hillsong, Matt Redman, Delirious, Michael W. Smith, London Community Gospel Choir и многу други, а на својот последен албум свиреше со: Philom Keaggyem, Влатко Стефановски, Martinom Morom и Johnom Stowellom.