Градоначалникот на општина Струмица, Коста Јаневски, во пресрет на големиот христијански празник Христовото Рождество, со честитка до граѓаните кои го слават Божиќ.

Почитувани сограѓани,

Вам, кои го славите Божиќ, според Грегоријанскиот календар, Ви посакувам овој голем христијански празник да ги осветли и огрее Вашите домови и да Ви дарува љубов, семејно спокојство и неизмерна радост. Славењето на Бадник и Христовото раѓање нека Ви помине во духот на простувањето, добрината и човечноста. При секој Ваш поздрав „Христос се роди“ или отпоздравување со „Вистина се роди“, на љубовта нека Ви биде возвратено со љубов. Благословено и вековито нека Ви биде празнувањето. ЧЕСТИТ БОЖИЌ! – напиша во Божиќната честитка струмичкиот градоначалник, Коста Јаневски.

Стотина млади коледарчиња продефилираа низ улиците на Струмица, пеејќи ја „Вечниот Бог“ во чест на Христовото раѓање.

Тие беа дел од 10-те илјади деца на најмасовната Бадникова поворка под мотото „Бадник за сите – Радост за сите“, која денеска се одржа во 40-тина градови и населени места во Македонија.

Околу 10:30 часот по Свечената Литургија тргнаа од црквата „Св. Димитриј и Св. Григориј Палама“ во Струмица. Продолжија низ булеварот „Маршал Тито“, преку плоштадот „Гоце Делчев“, покрај зградата на општината, низ старата Струмичка чаршија, па се до храмот „Св. Петнаесет Тивериополски Свештеномаченици“.

Таму децата ги пречека Викарниот Епископ Стобиски г. Јаков од кој добија благослов, но и пакетчиња со слатки производи.

„Секогаш децата се предвесници и ги пејат Божиќните песни по улиците на нашите градови, заради тоа што во детските срце нема ништо друго освен радост. И детството и тој период од животот на човекот е всушност образец и показател на онаа зошто Бог го создал човекот и во каква атмосфера замислил Бог да живее човекот. Тоа е истата онаа атмосфера во којашто живеете вие и го поминувате детството. И затоа овој радосен настан на Раѓањето Христово никој друг не може поафтентично да го посведочи од децата“ – рече во своето обраќање пред децата, г. Јаков.

Пеејќи ја Божиќната песна децата се гласници, како некогаш ангелите, на радосната вест за Христовото раѓање, објавувајќи ја на целиот град.

ФОТОГАЛЕРИЈА

Православните христијани денеска го слават Бадник, ден пред големиот празник Рождество Христово - Божиќ.

Вечерва, семејството се собира на заедничка вечера и според обичајот оваа вечер не се оди на гости. Се прави богата, посна трпеза. На масата се става риба, гравче, посна сарма, лепче со паричка. Се верува дека кај оној член од семејството каде што „ќе се падне“ паричката ќе има среќа цела година.

Денеска во утринските часови во многу куќи се слушаат гласови на деца коледари, кои со коледарските песни за здравје и бериќет пеат пред вратите. Домаќините им даваат костени, ореви, јаболка, колачиња, за да го зачуваат овој обичај кој се пренесува од колено на колено.

Деведесеттина поранешни ученици во Струмичката гимназија кои во изминатите девет години беа дел од Новогодишниот-Божиќен концерт, со сегашни ученици членови на хорот на училиштето, вечерва ја заокружија деценијата од овој хуманитарен концерт, кој го започнаа „некогашните“ младинци, а го продолжуваат сегашните генерации ученици од СОУ „Јане Сандански“.

Александра Јанева, Јовче Пандев, Ивана Василева, Ристе Гавровски, Ангела Илиева и други имиња кои се веќе професионално дел од македонската естрадна сцена, изведоа прекрасни композиции од повеќе жанрови на музика, рок, поп, џез…

Концертот е со поддршка на Општина Струмица, а меѓу публиката го следеа и градоначалникот Коста Јаневски со дел од советници, пратеници... Концертот, како и изминатите години наназад, вечерва го следеше и Зорица Заева, сопругата на поранешниот градоначалник и довчерашен премиер, Зоран Заев, кои десет години се вклучуваат и учествуваат во хуманоста на концертот за помош на млади луѓе.

Парите од влезниците ќе бидат наменети за лекување на 21-годишниот Стојче Јовановски, а дел од нив за збогатување со инструменти на Кабинетот по музика во СОУ „Јане Сандански“.

ФОТОГАЛЕРИЈА

Струмица ќе биде дел од најмасовната бадникова поворка под мотото „БАДНИК ЗА СИТЕ – РАДОСТ ЗА СИТЕ”, која во 39 градови и населени места во Македонија ќе ја пејат „Вечниот Бог“ во чест на Христовото раѓање.

Утре (понеделник, 6 јануари) на ден Бадник, во 10:00 часот од црквата „Св. Димитриј и Св. Григориј Палама“ во Струмица ќе почне најрадосната бадникова манифестација „Бадникови поворки 2020-та“, од каде голем број деца, но и повозрасни граѓани ќе се упатат кон Црквата „Свети Петнаесет Тивериополски Свештеномаченици“ и ќе ја пејат божиќната песна „Вечниот Бог“.

Ќе поминат низ булеварот „Маршал Тито“, преку плоштадот „Гоце Делчев“, низ старата чаршија до храмот „Св. Петнаесет Тивериополски Свештеномаченици“.

Таму децата ќе бидат пречекани и ќе добијат благослов од Викарниот Епископ Стобиски г. Јаков.

Пеејќи ја божиќната песна децата ќе станат гласници, како некогаш ангелите, на радосната вест за Христовото раѓање, објавувајќи ја на целиот град.

Струмичанката Драгана Костова, која има само 14 години, сними видео „ковер“ на песна од Илма Карахмет – „Ништа твоје“. Снимено е во студиото „Анастасија“, а во песната со своите инструменти се вклучени и Енис Папазов на кларинет и Мите Костов на пијано.

Младиот талентиран глас Драгана е позната од натпреварувачкото музичко шоу „Неки нови клинци“ на ГРАНД ТВ од сезоната 2018/2019. Во финалето стигна до второто место со 9500 освоени гласови.

Утре (недела) и во понеделник Грција забранува влез на товарни моторни возила на сите гранични премини, поради најави за обилни врнежи од снег.

Македонското МВР соопшти дека забраната ќе започне во недела на 5 јануари во 05:00 часот, па се до понеделник (6 јануари), до полноќ.

„Според добиените информации од грчките погранични служби, се воведува забрана за влез за сите товарни моторни возила во Република Грција, и тоа на граничните премини „Богородица“, „Стар Дојран“ и „Меџитлија“, со можност за нејзино продолжување“ – информираат од Министерството за внатрешни работи.

Како што е наведено во известувањето од грчките служби, причина за забраната е најавата за лоши временски услови во споменатиот период, со можност за невреме проследено со обилни врнежи на снег.

Лидерот на СДСМ, довчерашниот премиер Зоран Заев, присуствуваше на Предбожиќен хуманитарен базар, организиран од Форумот на жени на СДСМ во Струмица, кој заедно со сопругата Зорица си купија слатки производи за Божиќ, а донираа и финансиски средства во кутијата наменета за донации.

„Прекрасно е да бидеш повторно дома за празниците, со семејството, со пријателите. Овој хуманитарен базар во предвечерието на големиот христијански празник Божиќ, му приличи и верувам ја испраќа пораката на солидарноста, на топлината на домот, на можноста да помагаме на секој, секаде кадешто можеме и во секое време“ – кажа Заев.

Тој од Струмица го честита изборот на новата преодна Влада, верува дека министрите кои се предложени од опозицијата во ова Влада професионално ќе ја извршуваат својата работа.

„Верувам дека новите министри кои се на предлог на опозицијата ќе ја вршат совесно и солидно својата работа, заради тоа прво што рековме секој месец, секоја недела, секој ден се важни и зошто овој просперитет и прогрес да не го искористиме за да го унапредиме растежот да биде уште поголем. Слободата и демократијата се вгнездени во нашата земја и верувам дека под окото на граѓаните на кои им служиме и за кои што постоиме сериозно и посветено ќе ја извршуваат својата функција сите министри“ - рече денеска од Струмица претседателот на СДСМ, Зоран Заев.

Форумот на жени при Општинската организација на СДСМ во Струмица, денеска во фоајето на Центарот за култура „Антон Панов“ организираше Предбожиќен хуманитарен базар, на кој жените од оваа партија подготвија солени и слатки производи за продажба, а со парите ќе обезбедат пакети за сиромашни семејства од општината, во пресрет на Бадник и Божиќ.

И лидерот на СДСМ, довчерашниот премиер Зоран Заев присуствуваше на овој базар, кој заедно со сопругата Зорица си купија слатки производи за Божиќ, а донираа и финансиски средства во кутијата наменета за донации. Со нив беше и градоначалникот на Струмица, Коста Јаневски, пратениците Катерина Кузмановска и Коста Костадинов.

„Прекрасно е да бидеш повторно дома за празниците, со семејството, со пријателите. Овој хуманитарен базар во предвечерието на големиот христијански празник Божиќ, му приличи и верувам ја испраќа пораката на солидарноста, на топлината на домот, на можноста да помагаме на секој, секаде кадешто можеме и во секое време“ – кажа Заев.

ФОТОГАЛЕРИЈА

Во недела во големата сала на Центарот за култура во Струмица по 10-ти пат ќе се одржи хуманитарниот Новогодишен-Божиќен концерт на СОУ „Јане Сандански“, насловен „Деценија“.

Поранешни и сегашни ученици од оваа струмичко училиште, 90-тина ќе бидат на сцената, ќе пејат и свират музика за различни генерации. Влезниците се распродадени уште и кога беа пуштени во продажба пред новогодишните празници. Парите од концертот ќе бидат наменети за помош на 21-годишниот Стојче Јовановски, а дел од парите ќе бидат за збогатување со инструменти на Кабинетот по музика во СОУ „Јане Сандански“.

Професорката Анита Станковска вели дека годинашниот концерт, на кој учествуваат повеќето учесници од изминатите 9 години, ќе го направат поинаков, посебен од претходните.

„Со нивното искуство, со нивната енергија, со нивната убавина којашто ја носат со себе, публиката ќе ужива во она што ќе го понудат на сцената“ – вели Станковска.

Професорката е горда на своите поранешни ученици, кои настапувале на овој традиционален хуманитарен концерт, дел од нив се веќе и познати имиња на македонската естрадна сцена.

„Наградата од сите овие концерти и вредноста од сите овие концерти се имињата на учениците коишто остануваат после нас, на сите оние кои продолжуваат да пејат и професионално и аматерски, енергијата е неверојатна, позитивна на најубав начин, сите меѓусебе тие комуницираат, и приватно и професионално на музичката сцена, како во Струмица така и надвор од неа, и мислам дека тоа ќе се види во недела на 5-ти јануари“ – вели професорката Станковска.

Професорот Денис Кирчанов, кој е задолжен за оркестарот составен од ученици, исто така поранешни и сегашни и ќе свират во живо на концертот во недела, вели дека се подготвени за оваа специјално издание на традиционалниот концерт, годинава со наслов „Деценија“.

„Она што ќе го слушнеме на концертот е различно, ќе има повеќе жанрови на музика, рок, поп, имаме елементи и од џез музика на неколку композиции, ќе има и убави македонски композиции кои веќе влегуваат во евергрин музиката“ – вели Кирчанов, ветувајќи одличен концерт како и изминатите години што беа.

Ќе има два концерти. Првиот е во 18:00 часот, а вториот започнува во 20:00 часот, во недела во НУЦК „Антон Панов“ во Струмица. /Р.Ѓ./

Предновогодишно се делеа хуманитарни пакети на околу 200 сиромашни семејства од Струмичкиот регион кои живеат во субстандардни услови.

Како што не информираше Ајати Ибраимов, претседател на Здружението „DOST ELI DERNEĞİ“ од Банско, струмичко, со помош на Здружение „AKSI ACET“ од Индонезија пред Новогодишните празници беа подготвени разновидни пакети со облека и храна за сиромашни семејства без домови и за сирачиња од муслиманска вероисповед и волантерите на Здружението помошта ја поделија на семејства во Струмица и селата Банско, Еднокуќево, Иловица, Пиперево, Василево, Градашорци, Добрашинци и Нова Маала.

Од оваа здружение најавија дека ваква хуманитарна помош планираат и во текот на Новата 2020 година, се со цел во празнични мигови да им се помогне на сиромашни семејства кои речиси се без домови и основните потреби за живот.

Двајцата познати струмички вокали, Јовче Пандев и Ивана Василева снимија дуетска песна и видео спот насловен „Медот отровен“.

Ова е четврта песна на Јовче Пандев кои ја одбележуваат 2019-та година во неговата музичка кариера, а на Ивана прва песна и тоа со нејзиниот пријател од средношколските денови, кои беа и дел од хорот на гимназијата „Јане Сандански“ во Струмица.

За Јовче 2019-та беше доста успешна и плодна година на музички план, четири спота за неполна година, како што вели одржавме некаков континиутет во работата наречена „авторска музика“.

„Истата екипа од претходните аудио и видео изданија работеше и на оваа песна и спот, овој пат засилени со Зоран Трендов, кој е заслужен за дел од музиката и другарка ми Ивана Василева која ја донесе интерпретацијата онака како што бара сентиментот на песната“ – ни кажа Јовче.

Јовче вели дека песната „Медот отровен“ е сублимат на четири жанрови, рок, поп, класика и ориентална музика, и само по себе е предизвик да се стават сите во ист контекст и  функција.

Во 2020-та Јовче Пандев сака да ја сними својата осма авторска песна и да се промовира ЦД, албум од неговите песни, „ништо друго нема да ги задоволи моите апетити“…

„Одиме понатаму… „Медот отровен“ е четвртата, таман сме на пола пат. Среќни празници на сите од мене и Ивана. Имајте среќна и од Бога благословена 2020 година. Да сме живи и здрави и да слушате македонска музика“, е пораката на Јовче Пандев. /Р.Ѓ./

СВР Струмица поднесе кривична пријава против К.К. (38) и Х.М. (19), двајцата од село Банско и против М.Т. (27) од Струмица, поради постоење основи на сомнение за сторено кривично дело „неовластено производство и пуштање на промет на наркотични дроги, психотропни супстанци и прекурсори“.

Имено, во април минатата 2019-та година на регионалниот пат Струмица - Банско, полициски службеници извршиле преглед над пријавените, кои биле во патничко возило „Форд Фиеста“, при што пронашле и одзеле марихуана – информираат од СВР Струмица.

Македонската фолк ѕвезда, струмичанката Сузана Гавазова ја почна Новата 2020 година со промовирање на новиот видео спот за песната „Бум, Бум“, објавена денеска на „YouTube“ каналот. Со него на сите свои фанови им посака Среќна Нова година, да се живи, здрави и весели.

Музиката и аранжманот на песната „Бум, Бум“ се на Минтас Мемедов од Струмица, на текст од познатиот текстописец Орце Зафировски. Спотот е снимен на неколку локации во Охрид од страна на „IN Production“, а во самата песна учествуваат клавијатуристот Сандрито Даниелов од Бугарија, познатите музичари на зурли и тапани од Дебар, браќата Мијовци.

Сузана преку песната со порака дека само песната не обединува, и дека не е важно кој од каде е, треба сложно да се живее... „Никој ништо не ни може, само песна дај ни Боже, бум, бум, бум, бум“...

Од МВР информираат дека вчера во 14:50 часот на магистралениот пат Штип – Кочани, во селото Чардаклија, штипско, се случила сообраќајна незгода помеѓу патничко возило „Мерцедес Спринтер комби“, со струмички регистарски ознаки, управувано од А.А. (32) од Струмица и трактор „ИМТ-539“, со штипски регистарски ознаки, управуван од С.Н. (78) од село Чардаклија.

Во незгодата со тешки телесни повреди се здобил С.Н., кој бил пренесен во Клиничката болница во Штип за укажување на лекарска помош. Увид на местото на настанот извршила увидна екипа од СВР Штип.

Градоначалникот на Струмица, д-р Коста Јаневски, кој беше познат лекар-специјалист по интерна медицина пред да стане градоначалник, по пауза од две години повторно го облече белиот докторски мантил. Со него синоќа го посети бебето прво родено во Новата 2020 година на Одделението за гинекологија и акушерство во ЈЗУ „Општа Болница“.

Првороденото бебе во Струмица е девојче кое на свет го донесе мајката Сандра Тошева од Муртино со тежина од 2,900 грама и должина 50 сантиметри. Породувањето по „природен пат“ го изврши д-р Дончо Москов. Градоначалникот Јаневски на бебето му подари штедна книшка со 20.000 денари, а на мајката свежо цвеќе и слатки производи. /Р.Ѓ./