„Струмичката кошарка во сениорска конкуренција последниве години стагнира. Од град со своевремно два клуба, град со кошаркарска титула не е во ред да нема сениорски клуб каде децата ќе можат да се докажуваат. Тоа ме боли како струмичаенц и затоа сакам да помогнам“ – вели за порталот www.drnka.mk, струмичката кошаркарска легенда Владо Илиевски, по веста дека тој лично влегува во КК „Струмица“ за да општина Струмица како спортски град има тим во сениорска конкуренција.

„Едноставно почуствував обврска и одговорност како личност која потекнува од струмичката кошарка, да се вклучам и бидам фактор на обединување. Сакам Струмица повторно да се врати на кошаркарската мапа, бидејќи има потенцијал. Со мојот кредибилитет ќе се обидам да тргнат работите на подобро и Струмица да се врати на старите кошаркарски патеки, пред се за децата кои тренираат, оти не е во ред да се нема сениорски клуб каде ќе можат да градат кариери и да се усовршуваат“ – изјави Илиевски за „Дрнка.мк“

Повеќе на следниот линк>>>

Од Министерство за земјоделство, шумарство и водостопанство информираат дека картичките за зелена нафта за земјоделците од општините Струмица, Василево, Босилово и Ново Село, се изготвени и пристигнати во Подрачната единица на Министерството во Струмица и истите можат да се подигнат секој работен ден од 08:00 до 16:00 часот.

Картички има за сите кои обработуваат земјоделски површини и имаат поднесено (и исплатено) барање за субвенции за 2018 година. Пресметката за одобрен износ е извршена врз основа на барањата од 2018 година.

Картичките се подигаат лично и со себе задолжително потребно е да имате документ за идентификација (лична карта или пасош).

Вчера околу 16:30 часот било на магистралниот пат Струмица – Граничен премин „Ново Село“, кај селото Дабиље се случила сообраќајна незгода помеѓу патничко моторно возило „Шкода Фабиа“ со струмички регистарски ознаки, управувано од Б.Д. (58) од Струмица и патничко моторно возило „БМВ“ со германски национални ознаки управувано од Т.М.(30) од село Владевци, струмичко.

Според информациите од СВР Струмица, во незгодата со тешки телесни повреди се здобила сопатничката во возилото „Шкода Фабиа“ З.Ѓ. (64), а со телесни повреди се здобила сопатничката во возилото „БМВ“, Н.М. (58).

Извршен бил увид на местото на настанот од увидна екипа од СВР Струмица.

По повод 116 години од Илинденското востание и 75 години од Првото заседание на АСНОМ, денеска во Струмица беше одбележан Денот на Републиката - 2 август.

Утринава на Градскиот плоштад во Струмица, пред Споменикот на апостолот на македонската револуционерна борба за слобода и самостојност, Гоце Делчев, градоначалникот и членови на Советот на општина Струмица, претставници на СВР Струмица, на Сојузот на борците, на политички партии, положија свежо цвеќе.

За двата Илиндена говореше градоначалникот на општина Струмица, Коста Јаневски, истакнувајќи дека денешниот ден не е налик на ниту еден од останатите 364 денови во годината, дека овој празничен ден е различен и од сите други празници одбележани со црвена боја во нашите календари, дека 2-ри август е своевидно тројство на нашето празнување, затоа што денес христијаните го чествуваат Свети Илија – Громовникот, а граѓаните на нашата татковина го слават Денот на Републиката во кој свое место нашле, не еден, туку два Илиндена.

„Денес се слави и на „Мечкин камен“ во Крушево и во Меморијалниот центар „АСНОМ“ во Пелинце, но и во сите македонски градови и села. Славиме и ние овде во нашата Струмица, затоа што Илинден 1903 и Илинден 1944 се дел од нашите битија и од нашето постоење. Тоа што ја испишува историјата на нашето битисување е вкоренето токму во значењето на овие два грандиозни настана. И затоа, кога одбележуваме 116 години од Илинденската епопеја и 75 години од Асномската државотворност, треба да бидеме среќни, одважни и горди на нераскинливоста на двете „состојки“ кои ја сочинуваат есенцијата на нашата лична и колективна идентификација. Денес, повеќе од потребно е да си подадеме рака и да бидеме единствени во нашето патување низ новото време прифаќајќи ги сите предизвици кои ги носи со себе. Премостувањето на минатото и иднината е наша заедничка задача“ – рече во своето обраќање градоначалникот на Струмица, Коста Јаневски.

Со едноминутно молчење им беше оддадена почит на сите Илинденци и Асномци, а членови на рецитаторската секција при Домот за деца и млади „Благој Мучето“ од Струмица изведоа револуционерна поезија.

Чествувањето на големиот празник беше заокружено пред Спомен бистата на илинденскиот војвода Ристоман Кочев Попчевски во селото Попчево, со полагање на свежо цвеќе.

На чествување на патрониот празник на Манастирот „Свети Илија“, која се наоѓа на околу 4 километри над градот Струмица, струмичани, традиционално секоја година го посетуваат уште од вчера попладнето, ден пред празникот.

И денеска на самиот ден, на оваа прекрасно живописно место на планината Еленица, голем број верници дојдоа да му оддадат почит на патронот, но и да присуствуваат на традиционалниот празничен ручек, кој во чест на патронот го подготвуваат волантерите на Црковниот одбор, а го благослови отец Григориј Јакимов, старешина на манастирите „Св. Илија“ и „Св. Петнаесет“.

На благословениот ручек присуствуваше и годинашниот кум, струмичанецот Митко од Перт, Австралија, кој дојде токму за оваа пригода, а за нов кум, за наредното одбележување во 2020 година, Црковниот одбор ја избра, Стојна Јовова од Струмица, со желба догодина сите здрави и живи повторно да се соберат на патрониот празник на Манастирот „Свети Илија“.

Празникот Илинден во дворот на Манастирот се славеше со многу песни, ора и дружење. По заедничката братско-сестринска трпеза на љубовта и радоста, верниците во дворот на Црквата се веселеа до доцна попладнето.

Во Струмица синоќа беше отворена една од најстарата ликовна колонија на Балканот, 56-тата меѓународна Струмичка ликовна колонија, а свеченоста беше збогатена со изложба на цртежи и графики создадени во изминатите педесеттина години токму во Струмица на оваа ликовна колонија од уметници од повеќе земји од Европа и светот.

Петнаесеттина ликовни уметници од земјава, но и од САД, Русија, Грција, Полска, Бугарија, Србија ќе творат во наредните десеттина дена, односно до 12 август, кога ќе биде затворена ликовната колонија. Се очекува да создадат педесеттина нови дела во повеќе ликовни техники и да го збогатат и онака богатиот фонд на ликовни дела кои брои над 2600, создавани од 1963-та година до денес.

„Им посакав добредојде во Струмица на 15-те учесници на колонијата со надеж дека ќе имаат плодна творечка атмосфера. Убеден сум дека Струмица со своите специфики ќе биде доволно инспиративна за да бидат создадени нови квалитетни дела со кои ќе биде збогатена богатата ликовна ризница на колонијата“ – рече во своето обраќање градоначалникот на Струмица, Коста Јаневски, кој ја отвори 56-тата Струмичка ликовна колонија и на учесниците им посака плодна и успешна работа и убав престој во градот под Царевите кули.

ФОТОГАЛЕРИЈА

Македонските православни верници денеска го слават Денот на Свети Илија. Свети Илија или Громовник, проповедал 25 години. Се слави во денот кога се менува времето: до пладне е лето, од пладне есен, па затоа на неговиот ден не се капат (бањат) во реката. Неговото име на еврејски значи сила Господова.

Празникот Свети Илија е најславен ден во македонската национална историја и најголем празник за македонската нација. Пред се, тука се славењето на Илинден преку Илинденското востание, како и современата држава Македонија преку заседанието на АСНОМ на овој светол, празничен православен ден.

Општина Струмица утре ќе ги одбележи двата Илиндена, 116 години од Илинденското востание и 75 години од Првото заседание на АСНОМ.

Утре во 09:00 часот, пред споменикот Гоце Делчев на истоимениот плоштад, ќе се одржи мала свеченост на која ќе се говори за историографијата на двата Илиндена, по што ќе биде положено свежо цвеќе, а членови на рецитаторската секција при Домот за деца и млади „Благој Мучето“ ќе рецитираат револуционерна поезија.

Од Струмица, чествувањето ќе продолжи во селото Попчево, пред Спомен – бистата на илинденскиот војвода, Ристоман Кочев Попчевски.

Илинден или денот на Свети Илија е голем македонски национален и православен празник, кој се одбележува на 2-ри август. Илинден има посебно значење за историјата на македонскиот народ, поради тоа што на 2-ри август започнало Илинденското востание во 1903 година, а во 1944 година е одржано Првото заседание на АСНОМ.

Денес, илинденската традиција е испреплетена со патриотски, фолклорни и религиски симболи, што го прави Илинден еден од најважните празници во Македонија.

Со изложба на цртежи и графики, вечерва во 20:00 часот започнува со работа 56-тата меѓународна Струмичка ликовна колонија.

Петнаесеттина ликовни творци од десеттина држави меѓу кои Македонија, САД, Русија, Грција, Бугарија, Полска и Србија ќе бидат дел од најстарата ликовна колонија на Балканот.

Во следните 12 дена, колку што ќе трае колонијата, се очекува да бидат создадени околу педесеттина нови дела во повеќе различни ликовни техники со кои ќе се  збогати големата збирка, која веќе брои над 2600 дела.

Струмичката ликовна колонија е една од најзначајните меѓународни културни содржини кои се одржуваат секоја година во Струмица и е една од најзаслужните за мапирањето на Струмица во земјава и надвор од неа, како исклучително важен културен центар.

Инаку на вечерашната изложба, ќе бидат презентирани цртежи и графики кои во изминатиот половина век во Струмица ги создале значајни имиња на македонската, но и светската ликовна уметност.

Фолклорниот ансамбл „Тримери“ од Струмица, кој по неколкумесечната пауза повторно заигра на сцена, годинава на фестивалот „Илинденски денови“ во Битола, доби две значајни награди.

Оркестарот на овој струмички ансамбл, под раководство на етнокореологот Симе Стоилов од Струмица, беше прогласен за „најуспешен изворен оркестар“, а етнокореологот Александар Арсов го доби признанието за „најдобра практична сценска презентација, практична методска анализа на сцена“ со младите играорци од Струмица.

На синоќешното свечено затворање на фестивалот што се одржа во археолошкиот локалитет Хераклеа, стручното жири ги соопшти најдобрите на годинашниот 49-ти фестивал на народни песни и игри „Илинденски денови”, а во чест на наградените, целовечерен концерт одржаа македонскиот гитарист, Влатко Стефановски и американскиот гитарист од српско потекло, Мирослав Тадиќ.

Годинава на овој фестивал на народни песни и игри настапија над илјада учесници, членови на културно уметнички друштва, фолклорни групи и ансамбли од три континенти во светот, чиј домаќин беше НУ Центар за култура во Битола.

Во организација на Општинската организација на Црвен крст од Струмица и Службата за трансфузиона медицина, денеска во фоајето на Центарот за култура во Струмица се одржа Крводарителска акција насловена „Биди нечиј херој, спаси живот, дарувај крв“.

До 13:00 часот триесеттина граѓани ја даруваа својата драгоцена течност за да спасат нечиј живот, најмногу млади струмичани, а дел од нив и за прв пат даруваа крв, и влегоа во големото хуманитарно семејство на крводарители.

Маријана Тошева од ОО на Црвен крст - Струмица вели дека се задоволни од одзивот на денешната акција во пресрет на празникот Илинден, но и се пресреќни што најголемиот број од крводарителите беа млади луѓе.

„Наша цел со оваа акција е и да ги информираме луѓето за важноста на крводарувањето, колку е тоа битно, колку тоа е хумано, колку тоа е корисно, а од друга страна да го подигнеме бројот на крводарители, посебно во нашата Општинска организација, затоа што долги години ние го немаме исполнето планот за крводарување и да ги поттикнеме младите крводарители, затоа што имаме тенденција на опаѓање на нивниот интерес за вклучување во крводарителските акции“ – вели Тошева.

Струмичкото јавно комунално претпријатие „Комуналец“, заедно со општината Струмица обезбедија 8500 канти за отпад на домаќинствата кои живеат во индивидуални станбени објекти и од денеска ќе бидат поделени бесплатно.

Станува збор за канти за комунален отпад со зелена боја со зафатнина од 120 литри и се наменети за домаќинствата, како во градот Струмица, така и во населените места на територијата на општина Струмица.

Денеска дел од кантите ќе бидат распоредени во населените места Баница, Водача и Велјуса. На 6-ти август канти ќе добијат домаќинствата во Добрејци, Просениково и Дабиље.

„Важно е да напоменеме дека кантите ќе се делат бесплатно и истите ќе бидат на товар на ЈПКД „Комуналец“ и Општина Струмица. До граѓаните апелираме на домаќинско користење на кантите за отпад. Исто да напоменам дека секоја друга канта за отпад освен овие кои ќе бидат поделени, нема да се подигаат. Aцијата ќе продолжи во текот на цел месец август, каде ќе бидат поделени сите 8500 канти и ќе бидат опфатени сите населени места, како и градот Струмица“ – вели Бранко Ѓоргиев, раководител на Одделението „Комунална хигиена“ при ЈПКД „Комуналец“.

За набавката на кантите за отпад, Општина Струмица и „Комуналец“ потрошија околу 8 милиони денари. Со распределбата на кантите се очекува значително да се подобри хигиената, како во градот така и во населените места, бидејки во моментот, металните канти се дотраени.

ЈПКД „Комуналец“ од Струмица согласно годишниот план за генерално чистење на населените места на територија на општина Струмица за 2019 година, деновиве работеше на чистење на населените места Добрејци и Градско Балдовци.

Како што информираат од оваа јавно претпријатие, вработените од Одделението „Комунална хигиена“, рачно и машински ги метеле улиците, а е подигнат разновиден отпадо од јавните површини.

Македонската интернационална фудбалска ѕвезда и капитен на репрезентацијата, Горан Пандев од Струмица, кој се уште активно игра фудбал и ги брани боите на италијанскиот калчолигаш „Џенова“, за својот 36-ти роденден, кој го прослави на 27 јули, доби ново специјално видео посветено токму на 36-от роденден, изработено од прилепчанецот Мартин Пресилски.

Видеото е насловено како „Легендата”, a во него се само мал дел од ѕвездените моменти на Пандев во дресовите на Лацио, Интер и Џенова.

Со изложбата на делата направени од учесниците на ликовната работилница со професор м-р Митко Тошев, пред библиотеката „Благој јанков Мучето“, синоќа, заврши културно-уметничката програма на „Струмица ОПЕН фестивал 2019“.

Учесниците на оваа бесплатна работилница имаа можност да совладаат неколку техники на сликање со кои во иднина ќе може подобро да ја покажат својата креативност и да ја преточат во нивни дела.

Овој настан е 17-ти по ред од богатата програма на „Струмица ОПЕН фестивал 2019“. Досега се одржаа спортски натпревари, како и вечери на поезија и афоризми, кино на отворено, board games и неколку концерти.

Од 9 до 15 август настаните ќе се префрлат на малата музичка сцена кај „чешмичката“ на влезот од големиот Градски парк во Струмица.

ФОТОГАЛЕРИЈА

Волонтери на Црвен крст од Македонија, Бугарија и Србија учествуваа на меѓународната едукативна работилница „Спасување на планина“, што се одржуваше од 22 до 25 јули на планината Беласица.

Работилницата беше во организација на Општинската организација на Црвен крст од Струмица, а во соработка со Планинарскиот клуб „Ентузијаст“ од Струмица, но и Дирекцијата за заштита и спасување и Регионалниот центар за управување со кризи.

Педесеттина млади лица имаа можности да се едуцираат како да дадат прва помош при несреќа во планина. Паралелно имаше и предавања на тема „Ризици и опасности во планински предели“, но и како да направат ориентација за побрзо симнување од планина до првата најблиска урбана средина, се со цел да се помогне или спаси одреден човечки живот.

„Учествуваа  вкупно 54 млади волонтери на Црвениот крст од Струмица, Битола, Валандово, Велес, Виница, Гази Баба, Гостивар, Куманово, Кочани, Кичево, Неготино, Охрид, Пробиштип, Свети Николе, Тетово, Чаир и Штип. Беа поканети и учествуваа волонтери од Црвен крст на Благоевград, Бугарија и од Црвен крст на Раковица, Србија. Работилницата се одвиваше на планината Беласица во Планинарскиот дом „Шарена чешма“ на надморска височина од 1276 метри, каде младите се сплотија, стекнаа нови пријателства и научија вештини за спасување на планина“ – информираат од Општинската организација на Црвен крст во Струмица.

Освен што стекнуваа нови знаења и вештини младите од Македонија, Бугарија и Србија имаа можност преку четиридневното дружење да ги откријат и запознаат убавините на Беласица, но и да го искачат Ѕвездениот врв.