„Академија Пандев“ и „Работнички“ ремизираа (1:1) во првиот натпревар од 13-то коло во Првата фудбалска лига. Струмичкиот состав не успеа да слави без двајцата најдобри фудбалери, Љупчо Дориев и Ѓорѓи Стоилов кои се повредени, а „Работнички“ ја прекина серијата првенствени порази.

Многу шанси и за двете екипи на стадионот „Благој Истатов“ во Струмица, кои на крај сепак ги поделија бодовите. Стрелец на голот за „Академија Пандев“ беше Кристијан Стојкоски, а за гостите, Николче Шаркоски.

Следниот викенд струмичани гостуват во Тетово кај „Ренова“.

Граѓаните кои ќе вградат плински уред во возилата ќе може да добијат субвенција од Министерството за економија во висина до 300 евра. Станува збор за владина мерка со која се очекуваа да се намалат возилат на нафтени деривати, а со тоа и да се намали аерозагадувањето во државата. Со ребалансот на буџетот за оваа намена се одвоени 15 милиони денари или 250.000 евра. Тоа значи дека субвенции ќе има за 900 пријавени граѓани чии возила не се постари од 2005 година.

„За да добијат субвенции, сопствениците на возила произведени од 2005 година па наваму, откако ќе го вградат уредот треба да се упатат во Техничка служба која ќе ја констатира преправката и потоа да се пријават во Министерството за внатрешни работи. МВР треба да издаде нова сообраќајна во која е евидентирана поправката, односно дека е монтиран плински уред. Постапката од моментот на доѓање во техничката служба до издавањето на новата сообраќајна дозвола не трае повеќе од 2 до 3 дена“ - рече министерот Крешник Бектеши.

За добивање субвенција, до Министерството за економија треба да се поднесе фискална сметка со сметко-потврда или фактура, копија од сообраќајната дозвола за возилото заверена на нотар во која е евидентирана промената, фотокопија од лична карта и број на трансакциска сметка. Огласот ќе трае 30 дена и ќе се одвива по принципот прв дојден, прв услужен.

„Потсетете се само која беше првата асоцијација за Струмица пред 20 години – „чушки и френки“. Денес асоцијациите за Струмица се многубројни, Струмица е позната и по лица и по производи и по идеи и по настани. Дали познавате некој друг град кој создал толку производи, толку ѕвезди? Дали познавате некој друг град кој е со слична големина на Струмица и кој е пожив, подинамичен и позабавен од Струмица? Струмица се споредува со многу поголеми градови од неа и успешно се натпреварува. Токму затоа треба да се зацврсти позитивната слика за Струмица со обединувачки слоган, претпознатливи пораки и креативен дизајн“ – кажа Ѓоко Ристовски, од Општина Струмица, промовирајќи го Брендот Струмица како „Ѕвезда под небото“, со кој ќе се зајакнува позитивната слика за Струмица и со кој Струмица ќе се натпреварува на пазарот на градови со цел да привлече повеќе инвестиции, туристи и посетители.

Комерцијалниот бренд Струмица е создаден да го користат жителите, претпријатија и производи од Струмица за заеднички да се постигне подобро позиционирање и препознавање на Струмица.

Ристовски вели дека во првата фаза ќе се промовира генералната слика на Струмица, нејзините природни убавини, карневалот, а во втората фаза ќе се промовираат производи, компании, настани и идеи произлезени од градот и населените места.

Според градоначалникот на Струмица, Коста Јаневски, Брендот „Ѕвезда под небото“, ќе ја заинтригира човековата љубопитност, ќе го примами секој посетител, потенцијален инвеститор, деловен соработник, уметник или патник, да ги прими со сите сетила спецификите на градот и да го рашири добриот глас на долго и на широко по белиот свет.

„Ѕвезда под небото“ е идентитетот на Струмица со своето надворешно опкружување. „Ѕвезда под небото“ е порака која треба да ја слушнат сите и да сфатат дека Струмица е Град – Ѕвезда кој создава и производи и луѓе и вредности. Од Астраион до денешни дни, градот созрева со секоја нова генерација и градејќи ја скалата на успехот, се претвора во ѕвезда која се повеќе сјае. Брендот „Ѕвезда под небото“ ќе ја заинтригира човековата љубопитност, ќе го примами секој посетител, потенцијален инвеститор, деловен соработник, уметник или патник, да ги прими со сите сетила спецификите на градот и да го рашири добриот глас на долго и на широко по белиот свет. За нас Струмица има СЕ, и тоа нејзино СЕ треба токму ние струмичаните да го промовираме“ - кажа градоначалникот Јаневски, обраќајки се пред многубројната публиката во хотелот „Вила Парк“, каде освен граѓани, претставници на компании, институции, невладини организции, присуствуваа и гости од соседните земји Грција и Бугарија.

Автори на промотивните материјали се Марјан Ѕингаров, Никола Маџиров и Александар Дончев, а брендот Струмица е создаден во рамките на спроведувањето на проектот „Промоција на туризмот и културата“, финансиран од ЕУ во рамки на ИПА програмата за прекугранична соработка меѓу Република Грција и Република Македонија.

ФОТОГАЛЕРИЈА

Претседателот на Општинската организација на СДСМ во Струмица, Марјан Даскаловски упати јавна покана до граѓаните на Струмица и струмичко, членовите и симпатизерите на неговата партија, да дојдат на јавната трибина што ќе се одржи во недела од 19:00 часот во Спортската сала „Парк“ во Струмица.

Интегрален текст од прес конференцијата:

„Нашата Струмица од 2005 година чекори по правиот пат, по патот на слободата, демократијата и прогресот. Во изминативе 14 години докажавме дека чекориме исправени и горди, бидејќи такви не прави единствената цел кон која се стремиме-да направиме општина по мерка на сите и општина која секогаш е прва, а сега и држава членка на НАТО и земја која цврсто чекори кон евроинтеграциите, по пат кој носи раст на платите, градежна офанзива и пари назад кај граѓаните.

Затоа, Ве повикувам во што поголем број да дојдете на граѓанската трибина в недела во Салата „Парк“ со почеток во 19 часот и уште еднаш да потврдиме како и многу пати досега дека Струмица знае и може, Струмица мобилизира, Струмица памти, Струмица е на правиот пат!

Почитувани граѓани,

Ние немаме друга алтернатива освен членството во НАТО и ЕУ и не прифаќаме квази сојузи како што најавуваат некои од ВМРО-ДПМНЕ, кои прават се да се врати времето кога државата беше заробена и сите институции беа ставени во функција на сегашната опозиција.

СДСМ започна караван на отворени, јавни трибини со граѓаните под слоганот „На прав пат“ на територијата на целата држава. Задутре караванот ни доаѓа во нашата Струмица и ќе бидеме горди што меѓу нас ќе се премиерот и претседател на Социјалдемократскиот сојуз на Македонија, Зоран Заев, потпаролот на партијата и пратеник, Костадин Костадинов и градоначалникот на општина Струмица, Коста Јаневски.

Дојдете сите заедно да продолжиме по трасираниот прав пат и сите заедно да докажеме дека цврсто чекориме по него.

Дојдете да дадеме поддршка за политиката и заложбите кои Република Северна Македонија ја движат по прав пат, пат на слободата, правдата, еднаквоста и сигурноста, пат кон ЕУ и НАТО“ – кажа Даскаловски.

Првачиња од ООУ „Даме Груев“ од Куклиш, заедно со одделенскиот наставник Роберт Котевски, денеска имаа едукативен час во Стоматолошката ординација на д-р Родне Шенова - „Dental studio Estetik“ во Струмица.

Во пријатна и забавна атмосфера, доктор Родне на децата им говореше, но и ги испрашуваше за орално здравје и здрави заби, за хигиената и одржување на забите, потпомогнато од „Lаcalut“ и здрава храна.

По посетата на оваа Стоматолошка ординација, првачињата добија паста за заби на „Lаcalut“ и јаболко, бидејќи како што вели д-р Родне, јаболкото е многу здраво да се консумира за забите, а посебно кај младата популација.

ФОТОГАЛЕРИЈА

Синоќа во организација на Општина Струмица се одржа третата Форумска сесија во рамките на Буџетскиот форум во општина Струмица 2019/2020 година на кој учествуваат граѓани, претставници од месните и урбаните заедници, невладини организации, институции од различни области.

Како што информираат од општината, на синоќешната Форумска сесија беше направен преглед на планираните расходи по дел од буџетската програма „Ј“ за 2020 и потпрограми - развојни програми: Урбана опрема, Нови зелени површини, Нов парк - АТШ Берово, Нови канализации во Општина Струмица, Уредување на канал Крушевска Република, Канализациони системи во село Вељуса, Изградба на мрежа за гас и Енергетско ефикасни фасади. На сесијата се утврдуваа и граѓанските приоритети.

Нова песна, нов видео спот на струмичанецот Васил Гарванлиев. „Патувам“ е насловена песната на Васил и вечерва премиерно е објавена на YouTube.

„Патувам, за мене претставува средба и сеќавање со љубопитното дете во сите нас кое со душа чека да му се отвори вратата за да погледне во еден поубав и посветол свет. Овој проект, е голем чекор напред на мојата патека што потврдува дека кога имаме искрена желба, љубов, и приказна со вистински тим секогаш ќе најдеме и вистински начин на изразување. Сите заедно и во сите бои, со спонтана енергија, мислам дека создадовме уште една поп приказна на која сум особено горд. И да, патувам каде јавето е исполнет сон“ – вели Васил.

Неговиот најнов проект е во соработка со Давор Јордановски – продуцент, кој живее и твори во Торонто, Тања Брковска – текст, додека пак за видео записот повторно се погрижи екипата од претходните проекти Ѓорѓи Вацев - камера и постпродукција, креативен директор Јелмаз Дервиши, а кореографијата на Иван Ангелковски.

Од Противпожарната единица на Струмица информираат дека денеска околу 13:30 часот избувнал пожар во куќа на улицата „5-ти ноември“ во Струмица.

Пожарот избувнал во една од просториите на куќата и благодарение на брзата интервенција на пожарникарите не е дозволено да се прошири кон останатите простории.

Четири пожарникари со едно противпожарно возило учествувале го гаснењето на пожарот. Направена е голема материјална штета, а причината за настанувањето на пожарот дополнително ќе се утврдува.

Од утрово граѓани од реонот кај Транзитниот пат во Струмица на социјалните мрежи споделуваат статуси дека се горат гуми, пластика, а објавено е и видео...

Познатиот струмички бенд „Болеро“ со вокалниот солист, валандовчанецот Христијан Кико Божинов промовираат уште една песна насловена „Земјо ти благодарам“.

Музиката е на Христијан Кико Божинов, текстот на Иле Илиев, аранжманот го напиша Фимчо Костов, а е снимена во XL Produkcija In TV. Снимањето на видео спотот е во реонот околу Охрид, односно во населбата Лескоец.

Во Банско започна асфалтирањето на четири улици, а градоначалникот на Струмица, Коста Јаневски денеска направи увид во градежните активности.

Тој најави дека догодина ќе ги решаваат проблемите со квалитетот на водата за пиење и канализациониот систем, што ги имаат жителите од оваа населено место со кои градоначалникот ги има договорено во директните средби со нив.

„Тоа се навистина опсежни и скапи проекти кои тие неколку пати ми ги спомнаа и можам да ги уверам дека сработивме комплетна техничка документација за канализациониот систем со одобрение за градење, значи, се што е подготвителна работа од страна на општината го завршивме. Проектот за Филтер станицата за подобрување на квалитетот на водата, кој исто така е скап проект, го завршивме и цела наша енергија ќе ја впрегнеме во обезбедување средства за да ја затвориме комплетно финансиската конструкција за овие два важни капитални проекти и се надевам дека во текот на наредната година ќе започнеме со активности во тој правец и тоа ќе биде едно големо задоволство за мене и затоа можам да ветам дека тука ќе потрошиме се што може од енергија и врски за да можеме да го решиме овој проблем“ - кажа градоначалникот Јаневски.

Општината Струмица на сите ученици од прво одделение во основните училишта на територијата на општина Струмица им обезбеди бесплатна училишна униформа, односно маици и дуксерки со логото на училиштето каде посетуваат настава.

Втора година по ред учениците од прво одделение во деветте општинските основни училишта добија училишни униформи. За учебната 2019/2020 година на 628 првачиња им се обезбедени униформи купени со пари од општинскиот буџет во вредност од 650.000 денари.

Советот на општина Струмица донесе одлука, 5-те милиони денари од Министерството за животна средина да ги префрли на ЈПЕД „Струмица Гас“ со кои пари ќе го замени котелот на мазут во ЈЗУ „Општа болница“ во Струмица со котел на гас и ќе ја приклучи болницата на градската гасоводна мрежа.

Според директорот на ЈПЕД „Струмица Гас“, Благој Милановиќ целата активност би требало да заврши до крајот на годината, односно во почетокот на новата година болницата ќе биде приклучена на гасоводната мрежа, се зависи од роковите со тендерската постапка. Нема да има никаков прекин на греењето во болницата.

Согорувањето на мазутот во системот за греење на Струмичката болница е причината за енормното загадување на воздухот во Струмица, според мерењата на Автоматската мониторинг станица, која е поставена во дворот на болницата. Во непосредна близина од околу 25-30 метри, на висина од околу 15 метри, се наоѓа ложиштето и оџакот од системот за загревање на болницата. На растојание од 20 метри од станицата се наоѓаат првите станбени згради и куќи.

Од ЈПКД „Комуналец“ информираат дека поради дефект на водоводна цефка во прекин е водоснабдувањето на корисниците од улиците „Гоце Делчев“ од куќен број 120 до 170 и „Охридска“ во градот Струмица.

Екипи на комуналното претпријатие се на терен и работат на отстранување на дефектот. Нормализирање на водоснабдувањето се очекува до 12:00 часот.

Поранешното приватно средно училиште „Јахја Кемал“ во Струмица е пренаменато во простор на Детска градинка со целодневен престој за деца на возраст од 6 до 10 години. Од понеделник почнува со работа. Ова го најави претседателот на Советот на општина Струмица, Марјан Даскаловски по завршувањето на денешната 28-ма седница, каде советниците донесоа едногласна одлука за отпочнување со работа на нов Клон 5 на улица „Гоце Делчев“ бб во Струмица, во состав на ЈОУДГ „Детска радост“ Струмица.

„На радост на родителите, Детската градинка или Клон 5 од понеделник, 4 ноември ќе почне со работа. Комисијата од Министерството за труд и социјална политика даде позитивно мислење. Веќе има пријавено деца за целодневен престој во оваа градинка, за нив ќе се грижи соодветен стручен кадар. Оние родители кои имаат потреба нивното дете да престојува таму, можат да го пријават во ЈОУДГ „Детска радост“ – кажа Даскаловски.

СВР Струмица информира дека вчера во периодот од 08:00 до 14:00 часот на подрачјето што го покрива Секторот за внатршни работи - Струмица била спроведена акциска контрола со цел откривање на прекршоци сторени од страна на пешаци. Притоа, биле констатирани 18 прекршоци, кои се соодветно санкционирани.