Лидерот на СДСМ, Зорна Заев со сопругата Зорица, утрово традиционално на првиот ден од Божиќ, беа во Манастирот „Св. Леонтиј“ во Водоча“, каде имаа и кратка средба со Владиката на Струмичката Епархија, г. Наум.

„Секој од нас лично ја има можноста да го послуша гласот на совеста. Секој може да се надрасне себеси и уште поопределено да дејствува за доброто на заедницата, за доброто на децата и родителите, за семејството, за себе и секако за доброто на нашата земја во којашто живееме, работиме, твориме, учиме. Христовото раѓање потсетува на одговорноста пред којашто сме исправени, да стоиме искрено и храбро на страната на вистината, правдата, мирот и љубовта. Затоа, на Божиќ секој нека го почувствува огнот на светлината и топлината, што водат кон радоста и солидарноста. Христос се роди“ – напиша Заев на Фејсбук.

„BU Coffee House“ најавува Фан зона за следење на македонските ракометари на Европското првенство во Австрија.

Македонската ракометна репрезентација претстојниот викенд ги стартува натпреварите од Европското првенство кое годинава се одржува во повеќе држави.

Четата на Кире Лазаров се падна во „групата Б“ во Австрија, каде ќе играме со домаќините и со селекциите на Чешка и Украина.

Според програмата походот за пласман во втората фаза македонските ракометари ја започнуваат во петок на 10-ти јануари против Украина со почеток во 20:30 часот. Два дена подоцна се среќаваме со Чесите, а на 14-ти јануари со домашната Австрија.

„BU Coffee House“ од Струмица ја отвори првата Фан зона за сите љубители и навивачи на македонската ракометна репрезентација за организирано и заедничко следење на натпреварите и навивање за нов успех на македонската ракометна селекција.

Од „BU Coffee House“ истакнуваат дека за сите присутни ќе има и изненадувања, но и одлични услови за навивање како Фан зона.

Петок, 10 јануари | 20:30 часот | BU Coffee House Струмица

Христово рождество е исполнување на сите човечки копнежи, пророштва и очекувања, реализирање на севкупната и неуништлива жед на човекот кон доброто.

„Христос се роди“ - „Навистина се роди“!

Со овие зборови православните верници денеска си го честитаат празникот Божиќ, раѓањето на синот божји, Исус Христос.

Ова се денови кога се најпотребни мир и спокојство меѓу луѓето. Единство кај македонскиот народ и меѓу Македонците што живеат надвор од државата. Христос да биде единствената смисла на нашиот живот, да го љубиме секого како самите себе, да го почитуваме човечкото достоинство и правото на живот, на слобода и на име.

Божиќ или Божик е денот на христовото раѓање според христијанската традиција. Тоа е втор најголем празник во христијанството, по Велигден. Црквите кои го користат Грегоријанскиот календар, вклучувајќи ги сите католички, протестантски и повеќето православни цркви, го прославуваат на 25 декември. Црквите кои го користат Јулијанскиот календар, вклучувајќи ја и Македонската православна црква, го прославуваат Божиќ на 7 јануари. Со вечерата на денот пред Божиќ (Бадник) завршуваат предбожиќните пости.

Портпаролот на СВР Струмица, Хризантема Рендевска информира дека во попладневната сообраќајна несреќа која се случила во 13:20 часот на локалниот пат за Добрашинци, кај местото викано „Шапкар“, загинал 63-годишниот В.А. од село Пиперево, кој управувал автомобил „Шкода“, а возачот на другиот автомобил „Шаран“ со кој се судриле, Е.М. од Градашорци и неговиот сопатник, се здобиле со телесни повреди и се префрлени во болницата во Струмица.

Увид на самото место извршила екипа од СВР Струмица и Јавен обвинител од ОЈО во Струмица.

Попладнево околу 13:30 часот во близина на селото Добрашинци, струмичко се случи сообраќајна несреќа помеѓу „Шкода Октавија“ и „Фолкцваген Шаран“.

Едно лице загина, а двајца се повредени. Повредените се префрлени на Хируршкото одделение во Струмичката болница. Засега нема информации за нивната здравствена состојба.

Според информациите од Противпожарната единица на Струмица, кои интервенирале на извлекување на починатото лице од автомобилот, ангажирани биле седум пожарникари со две противпожарни возила, бидејќи истовремено имало и пожар покрај патот, се претпоставува настанал од силниот судар меѓу двете возила, а гореле суви гранки и трева.

Полицијата е на терен и ги утврдува причините за сообраќајката.

ФОТО: ТППЕ Струмица

Градоначалникот на општина Струмица, Коста Јаневски, во пресрет на големиот христијански празник Христовото Рождество, со честитка до граѓаните кои го слават Божиќ.

Почитувани сограѓани,

Вам, кои го славите Божиќ, според Грегоријанскиот календар, Ви посакувам овој голем христијански празник да ги осветли и огрее Вашите домови и да Ви дарува љубов, семејно спокојство и неизмерна радост. Славењето на Бадник и Христовото раѓање нека Ви помине во духот на простувањето, добрината и човечноста. При секој Ваш поздрав „Христос се роди“ или отпоздравување со „Вистина се роди“, на љубовта нека Ви биде возвратено со љубов. Благословено и вековито нека Ви биде празнувањето. ЧЕСТИТ БОЖИЌ! – напиша во Божиќната честитка струмичкиот градоначалник, Коста Јаневски.

Стотина млади коледарчиња продефилираа низ улиците на Струмица, пеејќи ја „Вечниот Бог“ во чест на Христовото раѓање.

Тие беа дел од 10-те илјади деца на најмасовната Бадникова поворка под мотото „Бадник за сите – Радост за сите“, која денеска се одржа во 40-тина градови и населени места во Македонија.

Околу 10:30 часот по Свечената Литургија тргнаа од црквата „Св. Димитриј и Св. Григориј Палама“ во Струмица. Продолжија низ булеварот „Маршал Тито“, преку плоштадот „Гоце Делчев“, покрај зградата на општината, низ старата Струмичка чаршија, па се до храмот „Св. Петнаесет Тивериополски Свештеномаченици“.

Таму децата ги пречека Викарниот Епископ Стобиски г. Јаков од кој добија благослов, но и пакетчиња со слатки производи.

„Секогаш децата се предвесници и ги пејат Божиќните песни по улиците на нашите градови, заради тоа што во детските срце нема ништо друго освен радост. И детството и тој период од животот на човекот е всушност образец и показател на онаа зошто Бог го создал човекот и во каква атмосфера замислил Бог да живее човекот. Тоа е истата онаа атмосфера во којашто живеете вие и го поминувате детството. И затоа овој радосен настан на Раѓањето Христово никој друг не може поафтентично да го посведочи од децата“ – рече во своето обраќање пред децата, г. Јаков.

Пеејќи ја Божиќната песна децата се гласници, како некогаш ангелите, на радосната вест за Христовото раѓање, објавувајќи ја на целиот град.

ФОТОГАЛЕРИЈА

Православните христијани денеска го слават Бадник, ден пред големиот празник Рождество Христово - Божиќ.

Вечерва, семејството се собира на заедничка вечера и според обичајот оваа вечер не се оди на гости. Се прави богата, посна трпеза. На масата се става риба, гравче, посна сарма, лепче со паричка. Се верува дека кај оној член од семејството каде што „ќе се падне“ паричката ќе има среќа цела година.

Денеска во утринските часови во многу куќи се слушаат гласови на деца коледари, кои со коледарските песни за здравје и бериќет пеат пред вратите. Домаќините им даваат костени, ореви, јаболка, колачиња, за да го зачуваат овој обичај кој се пренесува од колено на колено.

Деведесеттина поранешни ученици во Струмичката гимназија кои во изминатите девет години беа дел од Новогодишниот-Божиќен концерт, со сегашни ученици членови на хорот на училиштето, вечерва ја заокружија деценијата од овој хуманитарен концерт, кој го започнаа „некогашните“ младинци, а го продолжуваат сегашните генерации ученици од СОУ „Јане Сандански“.

Александра Јанева, Јовче Пандев, Ивана Василева, Ристе Гавровски, Ангела Илиева и други имиња кои се веќе професионално дел од македонската естрадна сцена, изведоа прекрасни композиции од повеќе жанрови на музика, рок, поп, џез…

Концертот е со поддршка на Општина Струмица, а меѓу публиката го следеа и градоначалникот Коста Јаневски со дел од советници, пратеници... Концертот, како и изминатите години наназад, вечерва го следеше и Зорица Заева, сопругата на поранешниот градоначалник и довчерашен премиер, Зоран Заев, кои десет години се вклучуваат и учествуваат во хуманоста на концертот за помош на млади луѓе.

Парите од влезниците ќе бидат наменети за лекување на 21-годишниот Стојче Јовановски, а дел од нив за збогатување со инструменти на Кабинетот по музика во СОУ „Јане Сандански“.

ФОТОГАЛЕРИЈА

Струмица ќе биде дел од најмасовната бадникова поворка под мотото „БАДНИК ЗА СИТЕ – РАДОСТ ЗА СИТЕ”, која во 39 градови и населени места во Македонија ќе ја пејат „Вечниот Бог“ во чест на Христовото раѓање.

Утре (понеделник, 6 јануари) на ден Бадник, во 10:00 часот од црквата „Св. Димитриј и Св. Григориј Палама“ во Струмица ќе почне најрадосната бадникова манифестација „Бадникови поворки 2020-та“, од каде голем број деца, но и повозрасни граѓани ќе се упатат кон Црквата „Свети Петнаесет Тивериополски Свештеномаченици“ и ќе ја пејат божиќната песна „Вечниот Бог“.

Ќе поминат низ булеварот „Маршал Тито“, преку плоштадот „Гоце Делчев“, низ старата чаршија до храмот „Св. Петнаесет Тивериополски Свештеномаченици“.

Таму децата ќе бидат пречекани и ќе добијат благослов од Викарниот Епископ Стобиски г. Јаков.

Пеејќи ја божиќната песна децата ќе станат гласници, како некогаш ангелите, на радосната вест за Христовото раѓање, објавувајќи ја на целиот град.

Струмичанката Драгана Костова, која има само 14 години, сними видео „ковер“ на песна од Илма Карахмет – „Ништа твоје“. Снимено е во студиото „Анастасија“, а во песната со своите инструменти се вклучени и Енис Папазов на кларинет и Мите Костов на пијано.

Младиот талентиран глас Драгана е позната од натпреварувачкото музичко шоу „Неки нови клинци“ на ГРАНД ТВ од сезоната 2018/2019. Во финалето стигна до второто место со 9500 освоени гласови.

Утре (недела) и во понеделник Грција забранува влез на товарни моторни возила на сите гранични премини, поради најави за обилни врнежи од снег.

Македонското МВР соопшти дека забраната ќе започне во недела на 5 јануари во 05:00 часот, па се до понеделник (6 јануари), до полноќ.

„Според добиените информации од грчките погранични служби, се воведува забрана за влез за сите товарни моторни возила во Република Грција, и тоа на граничните премини „Богородица“, „Стар Дојран“ и „Меџитлија“, со можност за нејзино продолжување“ – информираат од Министерството за внатрешни работи.

Како што е наведено во известувањето од грчките служби, причина за забраната е најавата за лоши временски услови во споменатиот период, со можност за невреме проследено со обилни врнежи на снег.

Лидерот на СДСМ, довчерашниот премиер Зоран Заев, присуствуваше на Предбожиќен хуманитарен базар, организиран од Форумот на жени на СДСМ во Струмица, кој заедно со сопругата Зорица си купија слатки производи за Божиќ, а донираа и финансиски средства во кутијата наменета за донации.

„Прекрасно е да бидеш повторно дома за празниците, со семејството, со пријателите. Овој хуманитарен базар во предвечерието на големиот христијански празник Божиќ, му приличи и верувам ја испраќа пораката на солидарноста, на топлината на домот, на можноста да помагаме на секој, секаде кадешто можеме и во секое време“ – кажа Заев.

Тој од Струмица го честита изборот на новата преодна Влада, верува дека министрите кои се предложени од опозицијата во ова Влада професионално ќе ја извршуваат својата работа.

„Верувам дека новите министри кои се на предлог на опозицијата ќе ја вршат совесно и солидно својата работа, заради тоа прво што рековме секој месец, секоја недела, секој ден се важни и зошто овој просперитет и прогрес да не го искористиме за да го унапредиме растежот да биде уште поголем. Слободата и демократијата се вгнездени во нашата земја и верувам дека под окото на граѓаните на кои им служиме и за кои што постоиме сериозно и посветено ќе ја извршуваат својата функција сите министри“ - рече денеска од Струмица претседателот на СДСМ, Зоран Заев.

Форумот на жени при Општинската организација на СДСМ во Струмица, денеска во фоајето на Центарот за култура „Антон Панов“ организираше Предбожиќен хуманитарен базар, на кој жените од оваа партија подготвија солени и слатки производи за продажба, а со парите ќе обезбедат пакети за сиромашни семејства од општината, во пресрет на Бадник и Божиќ.

И лидерот на СДСМ, довчерашниот премиер Зоран Заев присуствуваше на овој базар, кој заедно со сопругата Зорица си купија слатки производи за Божиќ, а донираа и финансиски средства во кутијата наменета за донации. Со нив беше и градоначалникот на Струмица, Коста Јаневски, пратениците Катерина Кузмановска и Коста Костадинов.

„Прекрасно е да бидеш повторно дома за празниците, со семејството, со пријателите. Овој хуманитарен базар во предвечерието на големиот христијански празник Божиќ, му приличи и верувам ја испраќа пораката на солидарноста, на топлината на домот, на можноста да помагаме на секој, секаде кадешто можеме и во секое време“ – кажа Заев.

ФОТОГАЛЕРИЈА

Во недела во големата сала на Центарот за култура во Струмица по 10-ти пат ќе се одржи хуманитарниот Новогодишен-Божиќен концерт на СОУ „Јане Сандански“, насловен „Деценија“.

Поранешни и сегашни ученици од оваа струмичко училиште, 90-тина ќе бидат на сцената, ќе пејат и свират музика за различни генерации. Влезниците се распродадени уште и кога беа пуштени во продажба пред новогодишните празници. Парите од концертот ќе бидат наменети за помош на 21-годишниот Стојче Јовановски, а дел од парите ќе бидат за збогатување со инструменти на Кабинетот по музика во СОУ „Јане Сандански“.

Професорката Анита Станковска вели дека годинашниот концерт, на кој учествуваат повеќето учесници од изминатите 9 години, ќе го направат поинаков, посебен од претходните.

„Со нивното искуство, со нивната енергија, со нивната убавина којашто ја носат со себе, публиката ќе ужива во она што ќе го понудат на сцената“ – вели Станковска.

Професорката е горда на своите поранешни ученици, кои настапувале на овој традиционален хуманитарен концерт, дел од нив се веќе и познати имиња на македонската естрадна сцена.

„Наградата од сите овие концерти и вредноста од сите овие концерти се имињата на учениците коишто остануваат после нас, на сите оние кои продолжуваат да пејат и професионално и аматерски, енергијата е неверојатна, позитивна на најубав начин, сите меѓусебе тие комуницираат, и приватно и професионално на музичката сцена, како во Струмица така и надвор од неа, и мислам дека тоа ќе се види во недела на 5-ти јануари“ – вели професорката Станковска.

Професорот Денис Кирчанов, кој е задолжен за оркестарот составен од ученици, исто така поранешни и сегашни и ќе свират во живо на концертот во недела, вели дека се подготвени за оваа специјално издание на традиционалниот концерт, годинава со наслов „Деценија“.

„Она што ќе го слушнеме на концертот е различно, ќе има повеќе жанрови на музика, рок, поп, имаме елементи и од џез музика на неколку композиции, ќе има и убави македонски композиции кои веќе влегуваат во евергрин музиката“ – вели Кирчанов, ветувајќи одличен концерт како и изминатите години што беа.

Ќе има два концерти. Првиот е во 18:00 часот, а вториот започнува во 20:00 часот, во недела во НУЦК „Антон Панов“ во Струмица. /Р.Ѓ./

Предновогодишно се делеа хуманитарни пакети на околу 200 сиромашни семејства од Струмичкиот регион кои живеат во субстандардни услови.

Како што не информираше Ајати Ибраимов, претседател на Здружението „DOST ELI DERNEĞİ“ од Банско, струмичко, со помош на Здружение „AKSI ACET“ од Индонезија пред Новогодишните празници беа подготвени разновидни пакети со облека и храна за сиромашни семејства без домови и за сирачиња од муслиманска вероисповед и волантерите на Здружението помошта ја поделија на семејства во Струмица и селата Банско, Еднокуќево, Иловица, Пиперево, Василево, Градашорци, Добрашинци и Нова Маала.

Од оваа здружение најавија дека ваква хуманитарна помош планираат и во текот на Новата 2020 година, се со цел во празнични мигови да им се помогне на сиромашни семејства кои речиси се без домови и основните потреби за живот.