Претседателката на Инспекцискиот совет Магдалена Филиповска-Грашкоска, на денешната прес-конференција во Владата ги презентираше наодите од инспекциски надзори од повеќе инспекциски служби во надлежност на Советот, кои интензивно се спроведуваат на терен, со цел да гарантираат целосно почитување на мерките на Владата за заштита од КОВИД-19.

За период од 2 до 5 април годинава од страна на шест инспекторати се направени вкупно 3.908 надзори. Иако општата констатација на инспекторатите е дека поголемиот дел од субјектите ги почитуваат владините мерки за превенција од корона вирусот, за жал, еден дел од угостителските објекти посебно во руралните средини продолжуваат да ги прекршуваат владините мерки.

„Во таа насока и најголемиот дел од вкупно 3.233 контроли спроведени од Државниот пазарен инспекторат се однесуваат на работењето на угостителските објекти. При тоа се затворени вкупно 48 угостителски објект во повеќе градови и населени места низ државата. Истовремено инспекторите во повеќе градови низ државата направија визуелни контроли при што констатацијата е дека поголемиот дел од угостителите ги почитуваат мерките. Државниот пазарен инспекторат изминатата недела интензивно ги контролираше и кафематите на бензинските пумпи и на други локации по градовите и при тоа во периодот од 2 до 5 април се забранети за употреба над 215 кафемати“, рече Филиповска-Грашкоска.

Претседателката на Инспекцискиот совет истакна дека Државниот пазарен инспекторат покрај контролите на угостителските објекти и на трговците со одлука на Влада е задолжен да ги контролира и замрзнатите цени на одредени производи. Во периодот од овие 4 дена направени се вкупно 423 контроли за замрзнатите цени на одредени производи. При што утврдени се помал број зголемувања на цените на цитрусното овошје и други производи но по укажувањето се вратени старите цени од 11 март.

Филиповска-Грашкоска рече дека Агенцијата за храна и ветеринарство во периодот од 2 до 5 април спроведе вкупно 208 надзори во повеќе градови низ државата во маркети, угостителски објекти, месарници, производствени објекти, зелени пазари.

„При тоа изречени се две глоби, едната за непочитување на претходна наредба од инспектор, а втората за држење производ без декларација. Исто така издадени се вкупно 7 казнени мерки едукации поради неспроведени обуки за основни знаења за безбедност на храна, како и не водење на записи за добра хигиенска пракса (ДХП). Исто така издадени се 15 решенија на месарници и маркети за констатирана лоша општа хигиенска состојба и е состојба и е наредено веднаш спроведување на дезинфекција, дератизација и дезинсекција. Агенцијата за храна и ветеринарство апелира до граѓаните да не ги користат кафематите и апаратите за вода, бидејќи тие може да се потенцијален преносител на заразата“, рече Филиповска-Грашкоска.

Државниот инспекторат за транспорт во периодот од 2-5 април направи вкупно 70 надзори. При тоа констатира дека меѓуопштинскиот сообраќај е речиси целосно редуциран, односно неговиот интензитет е намален за околу 90% и продолжува да се редуцира. Од направените контроли на автобуските станици во неколку градови низ државата е утврдено дека се почитува владината одлука за 50% намален капацитет, односно за преполовен број на патници. Меѓународниот линиски превоз на патници е во целосен прекин и нема постојан престој на граничните премини.

Државниот инспекторат за труд реализираше вкупно 290 контроли при што се донесени 1 решение и 13 укажувања за работодавачите кои не постапиле по препораките на Владата. Поголемиот дел од овие надзори биле поврзани со постапување по претставки за платено отсуство на родител на дете до 10 години, самохран родител, бремени жени и хронички болни.

Трудовиот инспекторат констатира дека поголемиот дел од работодавачите ги почитуваат препораки за заштита на вработените од КОВИД-19.

Државниот здравствен и санитарен инспекторат во периодот од 2-5 април спроведе вкупно 66 надзори. Исто така, во овој период издадени се 164 дозволи на транспортери професионални возачи. Овие дозволи се неопходни за непречено спроведување на транспортот во услови на епидемија од коронавирус.

Малмед во периодот од овие пет дена изврши вкупно 41 контрола. Нема специфични отстапувања, секторот ги почитува препораките, се одржува ред во аптеките, се дозволува влез на ограничен број на лица во аптеките.

„Инспекциските служби продолжуваат интензивно со сите свои капацитети да работат на терен, се со цел да се гарантира почитувањето на владините мерки.Уште еднаш порачуваме дека секој кој нема да се придржува до мерките на Владата ќе биде санкциониран, без исклучок. Овие мерки се донесени во интерес на здравјето на граѓаните и на јавното здравје и мора да се почитуваат. Повикувам на одговорност од секое правно лице, од секоја индивидуа во нашето општество. Јавното здравје зависи од сите нас“, рече Магдалена Филиповска-Грашкоска.

Иринка Сотирова, Директорка на Државен санитарен и здравствен инспекторат им го честиташе светскиот ден на здравствените работници и апелираше на поголема свесност за носење на заштитната опрема.

„Секој од нас доктор, сестра, техничар, лаборанти, болничари и останатиот технички персонал е неопходен, безусловно е потребен и исправен пред голем предизвик. Испраќам апел за максимални почитување на протоколите за употреба на средствата за лична самозаштита бидејќи со носењето на заштитната опрема прво се штитите себе си, ги штитите своите најблиски и останувате способни да се борите за животите на пациентите. Апелирам и до граѓаните да им веруваат на докторите и медицинските лица. Во овие тешки моменти тие го даваат максимумот од себе во борбата со коронавирусот“, рече Иринка Сотирова.

По повод светскиот Ден на здравјето, 7-ми април, министерот за здравство Венко Филипче со честитка до здравствените работници.

Здравствени работници,

Ви оддавам посебно признание за клучната улога која ја имате во здравствената нега и грижата за нашето здравје. Вашиот труд и пожртвуваност спасуваат животи и токму заради вас луѓето веруваат дека ќе бидат безбедни и здрави.

Сега, здравството и здравствените работници се клучниот столб во државата. Верувам дека секој од вас знае колку е важно да издржиме, да останеме посветени, сконцентрирани и да дадеме се од себе да им помогнеме на нашите сограѓани. Да издржиме со справувањето со коронавирусот во земјава.

Овој ден е ваш ден, вие сте на пиедесталот. Бидете горди на тоа што го работите, на тоа кои сте и колку сте значајни за секој од нас. Ви го честитам денот на здравјето и здравствени работници искрено ви благодарам за се што правите да ја надминеме кризата.

Регулаторната комисија за енергетика и водни услуги донесе одлука со која се врши намалување на малопродажните цени на нафтените деривати во прoсек за 2,67 %, во однос на малопродажните цени на нафтените деривати утврдени согласно одлуката од 30.03.2020 година.

Од денеска малопродажната цена на бензините ЕУРОСУПЕР БС-95 и ЕУРОСУПЕР БС-98 се намали за 0,50 денари за литар и ќе изнесува 48,00 ден/литар за ЕУРОСУПЕР БС-95, додека малопродажната цена на ЕУРОСУПЕР БС-98 ќе изнесува 50,00 ден/литар. Малопродажната цена на ЕУРОДИЗЕЛ (Д-Е V) се намалува за 1,00 денар за литар и ќе изнесува 45,00 ден/литар.

Намалување има и кај малопродажната цена на Екстра лесното масло за домаќинство (ЕЛ-1) за 1,50 денари/литар и ќе изнесува 33,50 ден/литар.

Малопродажната цена на мазутот М-1 НС се намалува за 0,921 ден/кг и ќе изнесува 17,970 ден/килограм.

Од 07.04.2020 година максималните цени на нафтените деривати ќе изнесуваат:

- Моторен бензин ЕУРОСУПЕР БС – 95 48,00 (денари/литар),

- Моторен бензин ЕУРОСУПЕР БС -98 50,00 (денари/литар),

- Дизел гориво ЕУРОДИЗЕЛ БС (Д-Е V) 45,00 (денари/литар),

- Масло за горење Екстра лесно 1 (ЕЛ-1) 33,50 (денари/литар),

- Мазут М-1 НС 17,970 (денари/килограм).

Денеска е Светски ден на здравјето. Овој ден е посветен на подигање на свеста за здравјето на луѓето ширум светот кој се одбележува на 7 април секоја година, под покровителство на Светската здравствена организација (СЗО).

Во 1948 година СЗО го одржала своето Прво Здравствено собрание, на кое е решено 7 април секоја година да се одбележува како ден на здравјето, почнувајќи од 1950 година. Овој ден е датумот кога е основана СЗО и таа пригода се смета за прилика да се привлече меѓународно внимание на здравствените проблеми со кои се соочува светот. 

Светската здравствена организација приредува меѓународни, регионални и месни настани со извесна тематика која е важна за таа година.

Денеска е Свето Благовештение – Благовец, Празник на радосната вест и на пролетната убавина.

Празникот Свето Благовештение, меѓу народот познат како Благовец, Благоец, Блошчојне... се смета за тежок празник. Некои дури го сметаат за голем празник како Велигден, поради што се вели: „Благовец, прв Велигден“.

Денеска именден празнуваат: Благоја, Блаже, Благојка, Благица, Блага, Благун...

Свето Благовештение е празник на Пресвета Богородица, но некои го сметаат и за празник Господов. Празникот Благовештение на Богородица е воедно и Господов и Богородичен празник. Господов е бидејќи се однесува на Христа Господа, затоа што беше зачнат во утробата на Богородица, а Богородичен бидејќи се однесува на онаа личност којашто придонесе за зачнувањето и вочовечувањето на Синот Божји.

Благовец – празник на мајките

Благовец е празник на Божјата Мајка, а според старата црковна традиција е и празник на сите мајки – Денот на мајките. Тоа е ден на мајката која дала нов живот. Тогаш децата и благодарат на мајката, а мајките пак, ги благословуваат децата и тие да имаат свои рожби и радости.

Празникот Свето Благовештение се вбројува во постојаните празници и секогаш е на 7 април според новиот, (или на 25 март според стариот календар). На овој ден се покажува особена сострадалност и помош кон сирачињата, кон бедните и кон унесреќените.

Волонтери на Општинскиот кризен штаб при Општина Струмица подготвуваат 700 прехранбени пакети за сиромашни семејства во кризните подрачја, односно општините кои се ставени под карантин поради ширењето на коронавирусот, Куманово и Дебар.

Хуманитарните прехранбени пакети се донација од семејството на Зоран Заев, и утре ќе бидат транспортирани до Куманово и Дебар, а Општинскиот кризен штаб на овие две општини ќе ги доставуваат до семејствата. Помошта ќе се испорача на претходно договорено време и локација.

„Сега е време на општествена одговорност, сега е време на солидарност и само постапувајќи така сите заедно можеме да го победиме коронавирусот“ - вели Александра Митева, која е дел од тимот на волонтери на Општина Струмица.

ЈПКД „Комуналец“ во соработка со специјализирана фирма за дезинфекција од Скопје изврши целосно чистење и дезинфекција и на Трговскиот центар „Глобал“ во Струмица, кој е затворен од средината на минатиот месец, информираат од претпријатието.

„Покрај редовното чистење и дезинфекција на улиците низ општина Струмица, како и на зелените пазари, а следејќи ги најновите препораки на Владата за преземање дополнителни и заострени мерки и активности за превенција од ширење на коронавирусот извршивме темелно чистење и дезинфекција на најголемиот Трговски центар во градот“ – стои во соопштението од ЈПКД „Комуналец“.

Регистрирани се 15 нови случаи на коронавирус во земјава, по градови: Скопје – 4, Куманово – 8, Тетово – 1, Струга – 1 и Штип – 1. Со ова, вкупната бројка на дијагностицирани пациенти со КОВИД-19, денеска изнесува 570 лица.

На Клиниката за инфективни болести и фебрилни состојби починаа тројца пациенти. Почина пациент од Кочани на возраст од 40 години, хоспитализиран на 29 март на клиниката, без познати коморбидитети, пациент од Тетово на возраст од 69 години со претходни коморбидитети и уште еден пациент од Тетово на возраст од 65 години.

Од оваа клиника денеска се испишани четири оздравени пациенти, а Институтот за јавно здравје информира за уште три лица во Дебар, кои по два контролни теста се негативни и истите се сметаат за оздравени.

Според местото на живеење, досега случаи на КОВИД-19 се регистрирани во: Скопје – 239, Куманово – 121, Дебар – 49, Штип – 20, Прилеп – 33, Тетово – 29, Струга – 25, Велес – 10, Битола – 6, Охрид – 3, Кавадарци – 2, Гостивар – 4, Гевгелија – 4, Струмица – 2, Крива Паланка- 3, Радовиш – 4, Крушево – 2 и Кочани – 14.

СВР Струмица вчера до Основно јавно обвинителство во Струмица има поднесено кривични пријави против 15 лица, кои во претходниот период ја прекршиле забраната за движење, односно сториле кривично дело „непостапување според здравствените прописи за време на епидемија“ по чл. 206 од КЗ на РСМ.

Синоќешниот полициски час на подрачјето на СВР Струмица го прекршиле 17 граѓани од кои две малолетни лица, информираат од СВР Струмица. Сите тие не ја почитувале наредбата од страна Владата и Министерството за здравство за време на епидемија, односно ги прекршиле предвидените забрани за движење во определен период.

Според полицискиот билтен, 13 лица се затекнати на подрачјето на Полициска станица Струмица, 3 на подрачјето во Гевгелија и едно на подрачјето на Полициска станица Радовиш. Во просториите на Полициските станици се приведени 5 лица.

На подрачјето на Секторот за внатрешни работи Струмица се евидирани 6 нови лица во самоизолација.

Секторот за внатрешни работи Струмица, апелира до сите правни лица и компании на подрачјето кои работат во 3-та и 4-та смена на своите вработени да им обезбедат Дозвола за движење на вработен поради вршење на сменска и ноќна работа, донесена врз основа на Одлука на Владата за утврдување на постоење на вонредна состојба, објавена во Службен весник на РСМ бр.68/2020 од 18.03.2020 година, а во врска со Одлука на Влада за забрана и посебен режим на движење на територијата на Република Северна Македонија објавена во Службен  весник бр. 72/2020 од 21.03.2020 година.

СВР Струмица ги повикува правните лица - компаниите до Полициските станици од општа надлежност Струмица, Радовиш, Гевгелија и Валандово, веднаш да  достават Списоци на компании кои работат во 3-та и 4-та смена со издадени Дозволи за движење на вработени поради вршење на сменска и ноќна работа. 

Владата на Република Северна Македонија на предлог на Комисијата за заразни болести во рамки на Министерството за здравство и Генералниот кризен штаб, донесе дополнување на Одлуката за забрана за движење на граѓаните во целата територија на државата, односно за продолжување на полицискиот час на целата територија на Северна Македонија.

Се забранува движењето за сите граѓани на ниво на целата територија, секој работен ден, од понеделник до петок, од 16:00 часот до 05:00 часот наредниот ден.

Дополнително за лицата над 67 годишна возраст се забранува движењето во текот на сите работни денови, од понеделник до петок, освен во периодот од 10:00 до 12:00 часот.

За младите лица до 18 години се забранува движењето во текот на сите работни денови, од понеделник до петок, освен во периодот од 13:00 до 15:00 часот.

За време на викендот се забранува движењето за сите граѓани од петок во 16:00 часот до 05:00 часот во понеделник.

Според Одлуката, се забранува движењето на граѓаните на јавни места и јавни површини во групи поголеми од две лица, при што тука не се вбројуваат лицата помали од 14 години, доколку се деца на родител кој е дел од групата од двајца.

Новите ограничувања стапуваат на сила во среда, 8 април 2020 година во 16:00 часот.

За земјоделските активности, дозволено е движење во рамки на територијата (атарот) на селата, исклучиво за работните потреби.

Аптеките ќе работат непречено, а Министерството за здравство ќе изработи план за непречена работа и на здравствените установи.

Исклучоците од забраната за движење важат за полицијата, армијата, здравствените работници (во ЈЗУ и ПЗИ, како и матичните лекари) и за маркетите и рестораните кои вршат достава на производи, при што тие своите ангажмани ќе ги реализираат непречено.

Новата книга за деца од познатиот македонски илустратор и уметник од Струмица, Ване Костуранов, насловена „Девојчето и градот“, излезе од печат во издание на „Либи“, дел од „Арс Ламина – публикации“. Станува збор за трета сликовница од Костуранов, по успешните и наградувани: „Ѕвездено дете“ и „Девојче и мече“.

Во новата книга на Ване Костуранов се раскажува приказна за едно девојче, кое живее во еден сивкав град, во кој веќе одамна не доаѓаат сонцето, птиците, пеперугите… Еден ден, талкајќи по улиците полни со луѓе, девојчето ќе се загуби и сосема неочекувано ќе се најде пред една огромна шума, во која ќе открие работи што ќе ѝ го променат животот од корен.

„Оваа приказна со години ми се моткаше во главата и почна да се појавува на моите слики уште пред неколку години, но, еве, сега дојде ред да ја раскажам и во форма на книга“ - вели Костуранов.

Според најновите информации од Институтот за јавно здравје, по направената епидемиолошка анкета на двете лица пријавени во Гостивар е утврдено дека едното лице е повратник од Словенија, сместено во државен карантин во регионот на Гостивар, а е со место на живеење во Струмица.

Исто така, по направената епидемиолошка анкета на лицата пријавени денеска од Тетово е утврдено дека едно лице е повратник од странство, сместен во државен карантин во регионот на Тетово, а е со место на живеење во Радовиш.

Согласно ова, ИЈЗ ги објави корегираните податоци за позитивните случаи, потврдени и кумулативните бројки.

Од вкупно 72 потврдени денеска, по градови: Куманово – 21, Скопје – 14, Тетово – 11, Прилеп – 9, Кочани – 7, Битола – 2, Радовиш – 2, Крушево – 2, Штип – 1, Велес – 1, Струга – 1 и Гостивар – 1.

Вкупно по градови заклучно со денеска: Скопје - 235, Куманово - 114, Дебар - 49, Штип - 19, Прилеп - 33, Тетово - 28, Струга - 24, Кочани – 14, Велес – 10, Битола – 6, Гостивар – 4, Гевгелија – 4, Радовиш - 4, Охрид – 3, Кавадарци – 2, Крива Паланка – 2, Крушево – 2 и Струмица – 2.

Министерството за здравство во вкупната бројка на заболени по градови, денеска објави дека во Струмица има двајца позитивни на коронавирусот, до вчера беше само еден, иако во денешниот извештај за изминатите 24 часа од 72 позитивни во државата, по градови во Струмица нема.

Веднаш по објавувањето на информацијата побаравме одговор од Министерството за здравство, но до овој момент се уште нема информација од каде дополнително уште еден денеска е на листата позитивни со коронавирус во Струмица.

Одговор на ова пред малку на Фејсбук објави градоначалникот на општина Струмица, Коста Јаневски. Вели дека во неговата општина нема ниту еден докажан позитивен пациент со коронавирус, ниту првиот од пред една недела не е од општината Струмица.

„Двата случаи регистрирани во статистиката на Министерството за здравство, се од други две општини во поширокиот регион. Едната пациентка е во домашна изолација и е во добра здравствена состојба, а другиот позитивен пациент се наоѓа во државен карантин во Маврово“ – напиша градоначалникот Јаневски.

Тој на своите сограѓани им се заблагодарува за дисциплината и одговорноста кои ги покажаваат во овие вонредни околности. Ги охрабрува и понатаму да се однесуваат уште подисциплинирано и поодговорно кон сите препораки.

„Со мерките коишто ги презема општина Струмица и Вашата поддршка, заедно ќе успееме полесно да го надминеме критичниот период којшто се очекува“ – напиша Јаневски со апел да се почитуваат мерките и препораките од надлежните институции кои се најсилното оружје во борбата со коронавирусот.

За 24 часа регистрирани се 72 нови случаи на коронавирус во земјата.

По градови: Скопје – 14, Куманово -21, Штип – 1, Прилеп – 9, Тетово-12, Струга- 1, Велес – 1, Битола – 2, Гостивар – 1, Радовиш – 1, Крушево – 2, Кочани – 7. Со ова, вкупната бројка на дијагностицирани пациенти со КОВИД-19 до денеска изнесува 555 лица - објави Министерството за здравство.

Од Клиниката за инфективни болести и фебрилни состојби со два контролни негативни теста, денеска заминуваат тројца пациенти. На клиниката неколку часа по приемот во болница, почина маж од Лабуништа (Струга) на 63-годишна возраст донесен на клиниката со тешка клиничка слика.

Во моментов на Инфективната клиника се хоспитализирани 74 пациенти, 15 со тешка клиничка слика, 11 на механичка вентилација, другите пациенти се стабилни.

Според местото на живеење, досега случаи на КОВИД-19 се регистрирани во: Скопје – 235, Куманово -114, Дебар – 49, Штип-19, Прилеп –33, Тетово – 29, Струга – 24, Велес – 10, Битола – 6, Охрид – 3, Кавадарци –2, Гостивар – 4, Гевгелија – 4, Струмица – 2, Крива Паланка- 2, Радовиш -3, Крушево – 2 и Кочани – 14 лица.

Петнаесет граѓани од земјава кои до 31 март скенирале фискални сметки, вечерва добија по 100.000 денари. Станува збор за четвртото коло од наградната игра  МојДДВ #МојаНаграда, што ја реализира Министерствоо за финансии откако Владата донесе одлука за поврат на 15% од ДДВ.

Меѓу добитниците кои вечерва беа извлечени се и две лица од Струмица, односно Славко Јанковски и Лика Митева, кои добија по 100.000 денари.

Наградната игра стартуваше на 15 декември и ќе трае една година. За да учествува во наградната игра, лицето треба да е регистрирано на системот е-Персонален данок, да е корисник на апликацијата МојДДВ, како и да ги прифати условите за учество во МојДДВ #МојаНаграда.