Денеска во Струмица беше „Олимписки ден“. Се играше кошарка, футсал, имаше Ноќни трки низ центарот на Струмица, изложба на цртежи на тема „Олимпизам“ и читање поезија на истата тема, а спортиските работници учествуваа и на предавање за спортските организации и нивно менаџирање.

„Денеска го славиме Олимпискиот ден за 2019-та година, кој се слави во 206 земји во светот, така да Струмица е една од тие плус 205 градови во светот во којшто се слави олимпизмот“ – рече Сашо Поповски, генерален секретар на МОК, кој беше дел од предавањето на тема: „Стратешки менаџмент во спортските организации“, што се одржа во Домот на АРМ, а на кое учествуваа спортски работници и спортисти.

Свеченото отворање на Олимпискиот ден беше во Спортската сала на СОУ „Никола Карев“, а учесниците и гостите ги поздравија, претседателот на Македонскиот олимписки комитет, Васил Тупурковски и градоначалникот на Струмица, Коста Јаневски. Тупурковски претходно со членови на МОК имаа средба во кабинетот на градоначалникот на Струмица на која се разговарало за актуелните состојби и новите предизвици во спортот.

Вечерва во рамките на Олимпискиот ден се одржаа традиционалните Ноќни крос трки на кои учествуваа над 500 ученици од основните и средните училишта од Струмичкиот регион, со старт од кружен тек кај новата зграда на „Г’на“, до целта на крстосницата кај ТЦ „Глобал“, а на плоштадот „Гоце Делчев“ беа доделени медаљите на најбрзите ученици.

Денеска во Струмица се собраа градоначалниците од Југоисточниот регион, заедно со претставници на комуналните претпријатија, Министерството за животна средина и просторно планирање, Министерството за финансии, претставници од Европската банка за обнова и развој и експертска група, и расправаа за иницијативата што ја покрена Владата за изградба на Регионална депонија.

„На денешната седница на Советот на градоначалници започнавме постапката за менаџирање на Регионална депонија. Добро што тргна иницијативата за решавање на овој горлив проблем, сите сме едногласни дека овој проблем конечно треба да се реши“ – вели градоначалникот на Струмица, Коста Јаневски.

Откако првичниот проект од пред повеќе од 5 години пропадна, најмногу поради неусогласеноста околу цената која домаќинствата требаше да ја плаќат за собирање на сметот, Владата на Република Северна Македонија покрена иницијатива - проект за четири региони, Југоисточниот, Пелагонискиот, Југозападниот и Вардарскиот регион за изградба на Регионална депонија.

„Се надеваме дека ќе утврдиме соодветни модели за управување со отпадот во секој од регионите. Не значи дека ќе се уврди еден модел, кој ќе биде идентичен за сите четири региони, туку ќе зависи од демографијата на регионите, од количините на отпад кои што се собираат, значи ќе зависи од многу аспекти“ - рече Каја Шукова од Министерството за животна средина и просторно планирање.

Градоначалниците од десетте општини во Југоисточниот регион се едногласни дека конечно треба да се реши проблемот со изградба на Регионална депонија.

По повод „Детската недела“, денеска на свечен начин првачињата од струмичките училишта и официјално беа примени во Детската организација.

Возбудени и весели беа 530-те првачињата на свеченоста во Центарот за културата „Антон Панов“ во Струмица, по повод приемот во организацијата. Ова за нив беше вистинско доживување што им го подготвија повозрасните другарчиња од Домот за деца и млади „Благој Мучето“, со сценско-музичките изведби. Тие дадоа и свечена заклетва со која се обврзуваат дека ќе учат вредно и ќе постигнат резултати во учебната година.

Првачињата ги поздрави градоначалникот на општина Струмица, Коста Јаневски, кој им го честиташе приемот во Детската организација.

„Вие сте наше најголемо богатство, наша најголема гордост и радост, наша иднина. Она што треба да го знаете е дека сите имате еднакви права, кои се загарантирани со Конвенцијата за правата на детето, и дека сите ја заслужувате неопходната поддршка од сите нас за да имате еднакви можности. Ние мораме да знаеме дека светот останува на вас и дека наш предизвик е да ви помогнеме да ги спознаете вистинските вредности во животот. Во таа смисла, Општина Струмица и јас како ваш градоначалник, пријател и другар, ви ја гарантираме сета љубов и поддршка. Да сте ми живи, здрави, успешни, безгрижни и среќни. Нека ви е со со среќа зачленувањето во Детската организација“ – им порача градоначалникот Јаневски.

По свеченоста претставници на првачињата од деветте основни училишта на територијата на општина Струмица, заедно со нивните учителки беа на традиционалниот прием во кабинетот на градоначалникот Коста Јаневски.

Приемот на првачињата во Детската организација традиционално се случува во рамките на Детската недела, која годинава во Македонија се одржува од 7 до 13 октомври, под мотото: „Детски права за наше детство“.

Во Центарот за култура „Антон Панов“ во Струмица, новинарот и писател Синишта Станковиќ имаше средба со читателите и промоција на книгата „Маалски прикаски (1+2)“.

Станува збор за книга која содржи 65 прикаски или, како што ги нарекува авторот, „белешки на случајниот минувач“, подготвени како мезе за муабет, во семејното бифе „Носталгија“ во Скопје. Во книгата се објавени и дваесеттина фотографии на тема „Маалски прикаски“, на познатите македонски фоторепортери: Ѓорѓи Личовски, Огнен Теофиловски, Роберт Атанасовски, Томислав Георгиев, Борис Грдановски, Наке Батев, Маја Златевска, Андреј Гиновски и Радован Вујовиќ.

На книжевната вечер, Синиша Станковиќ раскажуваше за создавањето на прикаските, а новинарот и писател Ѓорѓи Калајџиев, читаше дел од прикаските на авторот, но и тој пренесе неколку маалски приказни од неговата младост во Струмица.

Вечерта беше збогатена и со музиката од гитарите на Горан Алиќ и Иван Кукиќ, но и нивната прекрасна вокална изведба на познати македонски евергрини, на што публиката беше посебно воодушевена и добиваа долготрајни аплаузи.

Синишта Станковиќ последните две децении е дописник на Гласот на Америка на македонски јазик, а „Маалски прикаски (1+2) е негова седма книга.

ФОТОГАЛЕРИЈА

СОУ „Јане Сандански“ од Струмица успешно го спроведува Еразмус+ КА2 проектот: [p]:ROBOT (Учење на програмирање со помош на робот), кој се имплементира заедно со уште пет средни училишта од Европските држави, Полска, Италија, Словенија, Литванија и Грција, а од Македонија е Струмичката гимназија. Носител на проектот е факултетот од Катовице, Полска.

Со наставниците од основните и средните училиште од Струмица во СОУ „Јане Сандански“ се одржа работилница, односно десименација на резултатите од проектот „Пробот“ [p]:ROBOT.

Проектот започна во ноември 2017, а треба да заврши во август 2020. Оваа година се работеше на развој на лекции кои се нови и иновативни, а наставниците по информатика, математика и физика можат да ги користат во наставата, при што се користи програмирање како основна врска меѓу лекциите и роботот Лего Mindstorm EV3, кој СОУ „Јане Сандански“ го набави за потребите на проектот.

Одбојкарскиот клуб „ЏИО Струмица“ на 11 и 12 октомври во Спортската сала „Парк“ ќе организира Меѓународен меморијален одбојкарски турнир „Горан Панов – Близнако“.

Носителот на двојната круна одлучи да го слави ликот и делото на струмичкиот одбојкар кој лани замина во легендите. На првиот турнир во чест на Горан Панов, покрај домаќиот ќе настапат екипите на: „Будуќност“ од Подгорица, Црна Гора, „Борац“ од Бања Лука, Босна и Херцеговина, како и „Пирин“ од Разлог, Бугарија.

Во петок во 17:00 часот, во првото полуфинале ќе играат „Пирин“ со „Будуќност“, додека „ЏИО Струмица“ ќе игра со „Борац“ од 19:30 часот. Натпреварот за третото место и финалето се играт во сабота од 17:00 часот.

Во организација на Македонскиот олимписки комитет, а со поддршка на Општина Струмица и Сојузот на училишен спорт од Струмица, утре ќе се одржи „Олимписки ден во Струмица“.

Утре во 09:30 часот во Домот на АРМ ќе се одржи предавање на тема: „Стратешки менаџмент во спортските организации“, на кое ќе учествуваат спортски работници и спортисти.

Во 16:00 часот во Спортската сала на СОУ „Никола Карев“ ќе биде свеченото отворање на Олимпискиот ден во Струмица каде свое обраќање ќе имат претседателот на МОК, Васил Тупурковски и градоначалникот на Струмица, Коста Јаневски. Ќе биде претставена ликовна изложба на ученици на темата „олимпизам“, а ќе се чита и поезија на истата тема. Следуваат два натпревари, во кошарка за мажи и футсал за жени.

Во 18:00 часот се традиционалните Ноќни трки низ улиците на Струмица, на која се очекува да учествуваат над 500 ученици од основните и средни училишта од Струмичкиот регион, а ќе се одржат од кружен тек кај новата зграда на „Г’на“, до крстосницата кај ТЦ „Глобал“, потоа следува доделување на медалите на плоштадот „Гоце Делчев“.

Седум лица од Заводот за заштита и рехабилитација „Бања Банско“ кај Струмица од денеска се преселија во сопствени станови и ќе продолжат да живеат самостојно.

Становите, кои им ги обезбеди Министерството за труд и социјална политика се во градот Струмица со површина од околу 30-тина метри квадратни на приземје, прилагодени за нивните потреби и се комплетно опремени со мебел и бела техника. Имат дневна соба, спална соба, кујна, купатило и тераса.

Клучевите на новите станари им ги предаде министерката за труд и социјална политика, Мила Царовска, која истакна дека процесот на деинституционализација тече непречено и се одвива со забрзана динамика.

„Сето тоа кажува дека можеме да понудиме различни форми на трансформација на институциите - малите единици се тие кои немаат свој стан и куќи, а тие кои што имаат каде да се вратат можеме да обезбедиме поддршка и да се реконструираат одредени нивни куќи или дел од куќи каде понатаму ќе можат да живеат. Овој процес е долгорочен и трае. Но, важно е дека со голема мотивација и ентузијазам го водиме целиот процес и да видете дека не застануваме“ - рече Царовска.

Градоначалникот на Струмица, Коста Јаневски го поздрави процесот на деинституционализација на институциите каде беа згрижени овие лица.

„Мислам дека овој концепт на извлекување на овие луѓе надвор во нормалната средина дава една голема можност за нивно искажување како личности, можност да се покаже нивната индивидуалност, креативност, можност да делуваат на општеството, а секако и општеството кон нив и сето тоа заеднички не збогатува“ - рече Јаневски.

На примошредавањето на становите присуствуваше и претставничката на Обединетите Нации во Македонија, Росана Дуџак која го истакна своето задоволство од напредокот на процесот на деинституционализација во изминатиот период.

„Искрено славиме и честитаме за посветеноста на Министерството и на целата Влада во спроведувањето на овие реформи. Потребни се многу напори и посветеност за да се осигура дека лицата со попреченост може да ги реализираат своите права да живеат независно и да бидат вклучени во заедницата. Затоа, сакам да ги уверам Владата и заедницата дека целото ОН семејство е достапно и одлучно да ја обезбеди сета неопходна поддршка за во овој процес никој да не заостане”, рече Росана Дуџак, резидентен координатор на Обединетите нации (ОН).

ФОТОГАЛЕРИЈА

Познатата поетеса и сликарка со телесен хендикеп, Роза Мојсовска, по 43 години престој во Заводот за заштита и рехабилитација „Бања Банско“, од денеска е во сопствен стан во Струмица, кој и го додели државата. Освен Роза, стан добија и уште шест штитеници од Заводот за рехабилитација, кои трајно се исселија од таму и од денеска ќе живеат во новите станови.

Клучевите на Роза и ги предаде министерката за труд и социјална политика, Мила Царовска, а таа во знак на благодарност и подари уметничка слика нацртана од неа и книги со нејзината поезија.

„Сега имам нов живот и треба да се борам за тој живот, зашто сакам да им покажам на луѓето дека и ние имаме потреби, дека и ние можеме да живееме како секој нормален човек. Изразувам голема благодарност до УНДП, до Министерството за труд и социјална политика и на сите пријатели кои ми даваат голема поддршка за да можам да живеам во станбената единица овде во Струмица“ - рече Роза.

Заводот за заштита и рехабилитација „Бања Банско“, повеќе од четири децении беше дом на 52-годишната штитеничка Роза Мојсовска. Судбината ја оставила во количка. Уште од шестиот месец во својот живот е низ болници, а првите зборови „мамо“ и „тато“ не биле за нејзините родители, туку – за лекарите. Имала дури седум операции, за жал, неуспешни. Родена е во Скопје со телесен хендикеп. Од 1976 година е во Заводот во Банско.

Во Заводот се школувала и тука ù се најблиските пријатели. Секако и пријателката Тоше (Тодорка), која ù помага во секојдневните активности, таа сега ќе и биде и личен асистен со финансиска поддршка на Министерството за труд и социјална политика.

Легендарната Неда Арнериќ, српска и поранешна југословенска филмска, театарска и тв-глумица која ја знаеме и ние од многу македонски филмови, а најмногу од филмот „Исправи се, Делфина“ доаѓа во Струмица.

Таа по подолго време се врати на сцената, но се врати и во вистинскиот живот.

Со новата театарска претстава „Се извинуваме, многу се извинуваме“, на 14 октомври (понеделник), ќе настапи во големата сала на Центарот за култура „Антон Панов“ во Струмица. За оваа претстава Неда Арнериќ добива бурни и долги ракоплескања од публиката ширум регионот.

„Текстот на претставата се однесува на луѓето во постари години кои бараат сродни души. Јас од своето животно искуство би порачала: „Луѓе, не се откажувајте од животот, дури и кога ви е најтешко, кога сте оставени сами, кога никому не му требате. А, тоа е само привидно. Бидејќи повторно ќе најдете некој со кој ќе го поминете остатокот од животот, со кого ќе ви биде убаво“ - вели Неда за претставата.

Билетите по цена од 250 денари се пуштени во продажба на билетарата во НУЦК „Антон Панов“.

Лидерот на ВМРО-ДПМНЕ, Христијан Мицкоски, утре доаѓа во Струмица на „Разговори за обнова на Македонија“ со струмичани, информираше денеска портпаролката на ОК на ВМРО-ДПМНЕ, Александра Митева.

Настанот ќе се одржи на 10-ти октомври (четврток), пред споменикот на загинатите струмичани во пожарот, кај маркетот „Тинекс“. Собирање на идеите и разговори за проблемите на граѓаните и средбите со лидерот и членовите ќе започнат во 16:00 часот, а лидерот на ВМРО-ДПМНЕ, Христијан Мицкоски на присутните ќе им се обрати во 18:00 часот.

„Поминува мандатот на власта што остава пустош од првиот до последниот ден од своето работење. Понижување и разграбување на сето она што го граделе генерациите пред нас и уништување на условите за работа и живот на сограѓаните е дефиниција за секоја власт на СДСМ. За среќа нашата татковина ја има нашата генерација која покрај сите притисоци и закани ја прифаќа задачата повторно да се зафати со обнова. ВМРО- ДПМНЕ на чело со Христијан Мицкоски, никогаш не се откажа од борбата за подобра Македонија и поубава и економски посилна Струмица“ – истакна Митева, упатувајќи јавна покана до струмичани на „Разговори за онова на Македонија“.

Утре, среда, со почеток во 12:00 часот, во Центарот за култура „Антон Панов“ во Струмица, ќе се одржи Промотивно пладне на литература за деца. Ќе бидат промовирани едицијата во десет книги НАЈДОБРАТА КИНЕСКА ЛИТЕРАТУРА ЗА ДЕЦА, и најновата прозна книга на Киро Донев – „ДАРКО ВО ЗОО ПАРКОТ“.

Во претставувањето на книгите, изданија на „Македоника литера“, ќе учествуваат: Ацо Гогов, Ана Витанова-Рингачева, Киро Донев и Нове Цветаноски. Актер: Јулија Милкова.

Антологиската едиција „Најдобрата кинеска литература за деца“, „Македоника литера“ ја реализираше како копродукциски проект со издавачката куќа „Делфин букс“ од Пекинг, НР Кина. Во едицијата се застапени најпознатите и најчитаните современи кинески писатели за деца и за млади. Во овие книги се вклучени најдобрите дела на авторите, избрани од самите автори. Изборите содржат бајки, басни, раскази или новели. Како прилог, во книгите се објавени и текстови на авторите кои го образложуваат својот избор и се осврнуваат на своето творештво.

Едицијата ги содржи следните избори: „Тајната на слатките јагоди“ од Танг Сулан, „Мирисливата птица“ од Ѓин Бо, „Легенда за мечето Панда“ од Сун Јоуѓун, „Магичниот папагал“ од Ге Бинг, „Персискиот мачор Пек“ од Гао Хонгбо, „Малиот ној рицар“ од Лиу Сианпинг, „Божјиот фенер на морето“ од Донг Хонгјоу, „Приказни големи колку дланка“ од Џанг Ќуишенг, „Братучед ми доаѓа“ од Ќин Венѓун и „Вкусот на сонцето“ од Џанг Џилу.

Најновата прозна книга на Киро Донев „Дарко во зоо паркот“ е поделена во два дела. Во првиот – „Дарко во зоо паркот“ се објавени триесетина текстови во кои се претставени исто толку животни. Претставени се преку разговор што го води главниот лик – младиот новинар Дарко. Всушност, најпопуларните животни за децата се претставени низ дијалози од аспект на самите животни. На овој начин Киро Донев ги потенцира хуманите односи меѓу човекот и животните.

Вториот дел на книгата е насловен со „Приказни за годишните времиња“. Објавени се триесетина текстови кои се однесуваат на четирите годишни времиња, но во сите нив основната тема се животните и природата.

Денеска во Владата на Република Северна Македонија, градоначалникот на општина Струмица, Коста Јаневски и министерката за труд и социјална политика, Мила Царовска потпишаа Договор за грант за изградба на нова градинка во Струмица.

Новата Детска градинка, која треба да започне да се гради во почетокот на идната година ќе биде со капацитет за 300 деца, ќе се гради во просторот на поранешната касарна.

„Со изградбата на новата градинка и останатите активности кои што ги реализираме и планираме во оваа област, решаваме голем проблем со сместувачките капацитети на децата од предучилишна возраст. Нашите најмлади сограѓани се и остануваат наш приоритет“ – вели градоначалникот Јаневски.

Со средствата од овие грантови, обезбедени со поддршка од Светска банка, ќе се изградат нови градинки во Крива Паланка со капацитет за 100 деца, во Ѓорче Петров со простор за 175 деца и во Струмица за 300 деца. Исто така ќе се адаптира нов простор за градинка во Боговиње со капацитет за 105 деца. Министерството за труд и социјална политика ќе обезбеди и дополнителни средства за опремување на новите градинки.

Унија на млади сили при ОК на ВМРО-ДПМНЕ во Струмица, денеска одржаа прес конференција пред Ученичкиот дом на СОУ „Димитар Влахов“ во Струмица, од каде го прашаа градоначалникот на Струмица, Коста Јаневски, кога ќе започне изградбата на ветениот нов Средношколски дом во Струмица.

„Да прашаме, кога ќе биде изградена зграда на три спрата со нови простории за живот и учење со капацитет од 200 ученици. Здружените сили на локална и национална власт на сдсм обезбедиле инвестиција за подобрување на условите . Во превод обезбедиле повеќе нови кревети за во една спална. Иако и самите напишале дека Ученичкиот дом сместен во центарот на градот поради сообраќајот и кафичите не нуди мирни услови за извршување на ученичките задачи. Бидејќи младите заслужуват пристојни услови за раст, развој и еднакви можности за образование бараме овој и слични проекти да започнат наскоро“ – велат од УМС.

Од Унијата на млади сили во Струмица најавија дека наскоро ќе одржат „Разговори за обнова на Македонија”, и ги покануваат сите млади од регионот да дојдат и да ги кажат своите проблеми и идеи за подобра иднина.

Денеска во хотел „Сириус“ во Струмица, во организација на Центарот за развој на Југоисточниот плански регион се одржа првиот Инфо-ден за промоција на проектот „Интергриран оперативен центар за хуманитарна помош – HELP“, ко-финансиран од Европска Унија и Националните Фондови на земјите учеснички, преку Интеррег ИПА Програмата за прекугранична соработка помеѓу Грција и Македонија.

Станува збор за проект чија цел е да ги зголеми капацитетот и подготвеноста на хуманитарната помош во прекуграничната област, стремејќи се кон ефективна и ефикасна превенција, ублажување и управување со непогоди. Преку имплементација на одредени активности, ќе ги развие постоечките средства во двете земји во поглед на искуство и знаење на вклучените чинители и заеднички ќе го прошири овој капацитет во однос на инфраструктурата, опремата и управувањето.

„Главна активност на проектот е дизајнирање и изработка на контенјер, опремен со најсовремена опрема за комуникација. Ваквиот контејнер наречен како Центар за команди, контрола, комуникација, компјутери и интелигенција ќе овозможи подобрување на квалитетот на управување на јавната администрација во справување со елементарни непогоди и кризи во прекугранична област Грција – Северна Македонија што е и всушност главна цел на проектот“ – истакна Данче Поп Иванова-Илиева, координатор на проектот.

Таа најави дека при самиот крај на проектот, во летото 2020-та година, планирани се пилот акции, една во Серес, Грција и една во Струмица на која ќе бидат претставени и тестирани контејнерите како и нивната поврзаност помеѓу двата региони пред сите засегнати страни.

На првиот Инфо-ден присуствуваа претставници на општините од регионот, од Дирекцијата за заштита и спасување, регионалниот Центар за управување со кризи, Црвениот крст, Противпожарната единица, Итната медицинска помош.

Актерите од Струмичкиот народен театар, денеска напладне излегоа пред Центарот за култура „Антон Панов“ во Струмица на предупредувачки протест и поддршка на Синдикатот за култура на Република Македонија (СКРМ), кои исто така денеска напладне протестираа пред Министерството за култура.

Тие го изразија нивното незадоволство и разочарување од згазените социјални права на вработените во културата, поради отсуството на општ колективен договор повеќе од 14 години. Бараат да се потпише Колективен договор со кој ќе се уредат платите, коефициентите според сложеноста на работните места и условите за надоместоците на плата.