Лидерите на двете најголеми политички партии во нашата земја, Зоран Заев и Христијан Мицкоски од денеска се во задолжителна домашна изолација, по информацијата која ја доби Министерството за здравство дека еден новинар од телевизиски медиум е позитивен на Ковид-19 вирусот. Тој новинар во текот на минатата недела имаше ТВ интервјуа со лидерите на ВМРО ДПМНЕ и СДСМ, и Мицкоски и Заев се тестирани на коронавирусот.

Резултатот на Христијан Мицкоски, кој беше изработен доцна синоќа е негативен, но тој ќе биде во задолжителна самоизолација до истекот на 14 дена од последниот контакт со заболениот. Во овој момент нема потреба од посебни епидемиолошки анкети за неговите контакти. Резултатот на претседателот на СДСМ, Зоран Заев, со оглед на тоа што тој синоќа веќе беше заминат за Струмица, ќе биде готов во текот на денешниот ден, но и тој веднаш по добивање на информациите е ставен во домашна изолација.

Новинарот е во стабилна здравствена состојба и во моментов е на лекување во болницата „8 Септември“. Во текот на утрото и денот ќе се направат епидемиолошки анкети со неговите контаки за да се утврди точниот наод и бројка на лицата, кои евентуално би оделе во самоизолација.

За сите овие информации, како и за резултатот од тестот на лидерот на СДСМ, Зоран Заев, министерот за здравство, Венко Филипче ќе информира на следната прес конференција во текот на денот.

Неформалното Здружение на трговци од Струмица „Фер Есап“, бара од Владата итно да излезе со нов сет на економски мерки со кои ќе се опфатат како посебна и најзагрозена група трговци од трговските центри, кои од 14-ти март се затворени.

„Итно бараме да се исплатат минимални бруто плати на сите вработени вклучително и управителите, од 15-ти март, па се до кога е важечка одлуката за затворање на моловите, односно додека не се повлече оваа мерка. Покрај тоа, бараме да се доделат според големината на секој трговец неповратни средства - грантови со кои ќе може да се санираат веќе направените штети“, стои во писменото обраќање на трговците.

Во барањата додаваат, новите мерки да не се условени со условите од досегашните мерки кои ниеден трговец не можел да ги исполни. Освен тоа, од надлежните бараат и укинување на исплатата на „К-15“ за оваа година, како и прогласување на статус на виша сила за оваа посебна и најзагрозена група трговци од трговските центри со што овие правни субјекти ќе можаат согласно Законот за облигациони односи правилно да ги регулираат своите обврски.

На крајот од барањата е наведено поради статус на виша сила со указ да им се наложи на банките, наемодавачите и други дека за оваа посебна и најзагрозена група трговците од трговските центри за периодот до кога трае мерката забрана за работа, обврските да мируваат.

Министерството за внатрешни работи информира дека лицата кои овој викендот го напуштат државниот карантин треба да достават податоци за лицето и возилото кои ќе дојдат по нив.

„Лицата сместени во државен карантин, а кои треба да го напуштат државниот карантин, за време на викенд, кога е ограничено движењето, или пак се од градови каде има ограничување на движење преку целата седмица, ќе бидат прашани од страна на полициски службеник за име и презиме на лице и податоци за возило кое ќе дојде да го изврши транспортот. Полициските службеници имаат списоци на дневна основа кој граѓанин кога го напушта државниот карантин и тие ги најавуваат лицето и возилото кое ќе дојде по нив“ – стои во соопштението на МВР.

Во изминатото деноноќие се потврдени 46 нови случаи на Ковид-19. Со ова бројката на дијагностицирани случаи во државата е 663 лица.

Новопотврдените случаи се во градовите: Скопје –12, Куманово – 13, Прилеп – 8, Тетово -1, Струга - 2 , Велес – 8, Кочани – 1, Пробиштип – 1.

Во изминатото деноноќие направени се 341 теста. Досега во земјата се направени 6.571 тестирања на Ковид-19.

Починатата родилка од Куманово, за која што вчера попладне информираше Министерството за здравство, ќе биде евидентирана во денешниот извештај на ИЈЗ.

Општина Ново Село пред малку на својата официјална Фејсбук страница објави дека на територијата на својата општина го има регистрирано првиот случај на заболена личност од Covid-19

„За жал, вирусот кој во моментот владее со целиот свет не ја одмина Општина Ново Село, и го имаме првиот регистриран случај на заболена личност од Covid-19 во општината. Оваа информација не треба да биде причина за паника, меѓутоа треба да биде апел сите строго да се придржуваат кон мерките и да покажат одговорност во заштита на јавното здравје“ – стои во објавата на Општина Ново Село.

Тие упатуваат апел до сите граѓани, а особено до младите, да покажат поголема одговорност и да ги почитуваат сите мерки за заштита од коронавирусот Covid-19. Во последните неколку денови се забележани поголеми групирања на граѓани пред различни институции, маркети и ресторани.

„Ве потсетуваме дека сите граѓани треба да се движат на соодветно растојание од два метри, да практикуваат лична и респираторна хигиена, да не ги напуштаат своите домови без поголема потреба и строго да се придржуваат кон ограничувањата за движење според возрасните групи. Со Одлука на Влада е забрането движењето на граѓаните на јавни места и јавни површини во групи поголеми од две лица, при што дозволено е родител да биде во поголема група со своите деца до 14 години“ – стои во апелот на општината.

Од Општина Струмица информираат дека општината во координација со ЈПКД „Комуналец“ уште на почетокот на кризата започна со дезинфекцијата на улиците, тротоарите, јавните површини, урбаната опрема во градот и во населените места, која што се спроведе согласно препораките кои докажуваат ефикасност. Тоа значи дека се врши на одреден временски период и со средства според искуствата и согледувањата од земјите кои први се соочија со овој предизвик.

Почитувајќи ги позитивните искуства од примена на средства и временски интервали, вчера по започнувањето на полицискиот час, ЈПКД „Комуналец“ направи дезинфекција на улиците во градот, а посебен третман е спроведен на улиците во периферните делови на градот. Рачно се дезинфицираат и тротоарите и урбаната опрема, а од денеска дезинфекцијата продолжува и по населените места по следниот распоред:

(Четврток, 9 април, од 16:00 часот) - Дезинфекција на населените места: Дабиле, Просениково и Добрејци.

(Петок, 10 април, од 16:00 часот) - Дезинфекција на централното градско подрачје (градот Струмица) и рачна дезинфекција на тротоари и урбана опрема. Дезинфекција на населените места: Баница, Водоча и Вељуса.

(Сабота, 11 април, од 09:00 часот) - Дезинфекција на населените места: Муртино, Сачево, Куклиш, Свидовица, Банско, и Габрово.

(Недела, 12 април, од 09:00 часот) - Дезинфекција на населените места: Костурино, Раборци, Попчево и Рич.

Се молат сите граѓани во текот на овој период да ги отстранат паркираните возила од тесните улички како би цистерната со дезинфекциониот материјал може непречено да поминува.

Од општината уште еднаш апелираат до сите граѓани да ја почитуваат забраната за движење како и да ги следат најновите препораки на Владата за преземање дополнителни и заострени мерки и активности за превенција од ширење на коронавирусот, согласно препораките на Комисијата за заразни болести при Министерството за здравство.

Општинскиот штаб за заштита и спасување на општина Струмица во континуитет спроведува мерки за заштита на јавното здравје од корона вирусот – велат од Општина Струмица во денешното известување до медиумите.

Од таму информираат дека по првото комплетно дезинфекцирање коешто беше извршено на 17 март, денеска за време на полицискиот час со специјално средство ќе се реализира второ комплетно дезинфекцирање на улиците, тротоарите, јавните површини и урбаната опрема во градот, а дезинфекција ќе се врши и во населените места.

Јавното здравје е заедничка одговорност. Сите да го дадеме својот придонес, граѓаните со почитување на мерките и препораките за заштита на нивното здравје, а ние, институциите со исполнување на нашите обврски во одржувањето на јавната хигиена другите мерки за заштита од корона вирусот – стои во информацијата од Општина Струмица.

Секторот за внатрешни работи во Струмица упатува апел до сите граѓани на подрачјето строго да ја почитуваат одлуката на Владата за забрана на движењето, почнувајќи од денеска, од понеделник до петок во временскиот период од 16:00 до 05:00 часот наредниот ден, а за време на викендот од петок од 16:00 часот до 05:00 часот во понеделник, како и забраните за граѓаните над 67 години старост и за младите до 18 години, информираат од полицијата.

„Се забранува собирање во група на повеќе од две лица, во паркови и на други јавни места и површини. Апелираме граѓаните да го задржат минимум потребното растојание од останатите лица и да не се групираат на јавни места и површини (банки, маркети и слично)“ - стои во информацијата.

Се додава дека сите оние кои ги прекршуваат донесените одлуки на Влада и дадените препораки, ќе бидат санкционирани согласно член 205 и 206 од Кривичниот законик, доколку пак се утврди дека сторената активност има елементи на прекршок ќе биде поднесена соодветна прекршочна пријава против сторителот.

Во информацијата се наведува дека СВР Струмица не издава дозволи за движење за време на забрана за движење на населението и се потсетува дека дозволи издава Министерството за информатичко општество и администрација, додека надлежноста на полицијата е во спроведувањето на мерките и препораките на Владата на РСМ.

За Дијаконија Македонија, Мис Стон Центар во Струмица обезбедени се прехранбени продукти за подготвување храна, кој овој центар долги години подготвува секој ден готвени јадења за ранливите категории на граѓани, посебно за стари и изнемоштени лица и истите ги доставува до нивните домови.

Донацијата со прехранбени продукти за приготвување храна за овој Мис Стон Центар се од поранешниот пратеник Коста Костадинов и „Јанев Компани“ од Струмица.

„Кога зборуваме за солидарноста, мора да мислиме и на мотивирањето на сите оние кои имаат повеќе да дадат за доброто на државата и граѓаните особено во таква криза во која сега се наоѓаме.

Јас, мојата фамилија, како секогаш имаме помогнато финансиски на бројни семејства од социјален ризик, имаме стипендирано студенти, имаме плаќано за сместувачки трошоци.

Во овие моменти ми се јавува гласот на мојот покоен татко, кој секогаш помагал на оние на кои помошта им е најпотребна, независно од ситуацијата во која ние се наоѓаме.

Ако можеш да помогнеш, помогни, но немој никако да одмагаш. Е, па, татко, токму тоа и го правам, да знаеш...

Огромна благодарност до компанијата „Јанев компани“, која прва се јави да донира, ги повикувам и сите останати, колку што можат да излезат во пресрет во оваа криза. Заедно можеме да се избориме против ова зло“ – напиша Костадинов на својот Фејсбук профил.

Од Дијаконија Македонија, Мис Стон Центар информираат дека е добиена поголема донација на производи кои во наредниот период ќе бидат употребени за готвење на храна за најранливата категорија на граѓани во Струмица и Радовиш.

„Нека овој настан биде поттик и за сите останати политичари, јавни личности, компании и земјоделци, па да ја покажат својата хумана страна и сите заедно да се бориме против гладот на немоќните граѓани“ – велат од Мис Стон Центарот во Струмица, упатувајќи јавна благодарност до Коста Костадинов и сопствениците на фирмата „Јанев Компани“, но и за сите идни хумани граѓани.

„Не можеме сите да правиме големи работи, но сите заедно можеме да правиме мали работи со многу љубов. Затоа ајде да направиме нешто убаво заедно“ – стои во пораката на Дијаконија Македонија, Мис Стон Центар Струмица.

Во изминатите 24 часа, регистрирани се 18 нови случаи, позитивни на коронавирусот. По градови: Скопје – 7, Куманово – 2, Прилеп – 4, Битола – 2, Кавадарци -1 (починатиот), Крушево – 1 и Кочани -1. Со ова вкупната бројка на дијагностицирани пациенти со Ковид-19 во нашата земја изнесува 617 лица.

На Клиниката за инфективни и фебрилни состојби во Скопје почина едно лице од Куманово на возраст од 73 години. Во својот стан во Кавадарци е пронајдено починато лице на возраст од 44 години, кај кого постсмртно е земен брис и истиот вчера потврдил присуство на вирусот. Во денешната статистика е вметнат и пациентот кој вчера почина на пат кон болницата „8 Септември“.

Од Клиниката за инфективни и фебрилни состојби во Скопје денеска се испишани 5 оздравени пациенти, кои по два негативни контролни бриса, во добра општа состојба заминуваат дома. На оваа Клиника примени се 4 нови пациенти, а во моментов се хоспитализирани вкупно 66 пациенти, од кои 7 пациенти се на механичка вентилација.

Во болницата „8 септември“ примени се 4 нови суспектни пациенти на коронавирус. Вкупната бројка на позитивни и суспектни на Ковид-19 во оваа болница е 26 пациенти, од кои 8 се во тешка состојба, а 3 пациенти се на респираторна машина.

Во болницата во Штип нема нови примени пациенти на болничко лекување. Во моментов се хоспитализирани 4 пациенти, од кои 1 пациент со средно –тешка клиничка слика со пневмонија и 3 стабилни.

Во болницата во Битола исто така нема прием на нови пациенти. Во моментов 4 пациенти кои се на хоспитален третман се стабилни.

Во изминатите 24 часа, регистрирани се 18 нови случаи, позитивни на коронавирусот. По градови: Скопје – 7, Куманово – 2, Прилеп – 4, Битола – 2, Кавадарци -1 (починатиот), Крушево – 1 и Кочани -1. Со ова вкупната бројка на дијагностицирани пациенти со Ковид-19 во нашата земја изнесува 617 лица.

Во изминатото деноноќие направени се 351 тест. Досега во земјата се направени 6.230 тестирања на Ковид-19.

Денеска нема да се одржи редовната прес-конференција, но одделението за односи со јавност е отворено за сите новинарски прашања и истите ќе бидат одговорени во најкус можен рок.

Хуман и несебичен гест од страна на неколку Струмички компании и Стоматолошки ординации до ЈЗУ „Здравствен дом“ во Струмица, во време кога се бориме со најголемата зараза во светот, КОВИД-19.

Донација од заштитни маски, визири, скафандери, средства за дезинфекција, заштитни ракавици, детергенти и други продукти за персоналот во ова здравствена организација, во која се наоѓа и Итната медицинска помош.

Директорката на ЈЗУ „Здравствен дом“, д-р Љубица Митева упатува јавна благодарност за донацијата до: „ТРИТЕКС ТРЕЈД“, „Kolid S Team“, „Тимас“ ДООЕЛ Струмица, „Фико Пласт“, „Златен Даб“ Прилепска пиварница АД во Струмица, ПЗУ „Д-р Марина Абрашева“, „Изолмак Фибран“ ДОО, ПЗУ „АМИ“, ПЗУ „Д-р Бајректаров“ Струмица, „А-Дент“, ПЗУ „Д-р Гудица Малинова“, „Dentomak“ (Д-р Рони Банова), ПЗУ „Д-р Кирил Ахтаров“, ПЗУ „Зебеков“ Струмица, ПЗУ „Д-р Билјана Проданова“, ПЗУ „Д-р Мери Матушко“, ПЗУ „Д-р Жан“, „Индустри Сервис“ Скопје, „Мултихем“ Струмица и Комората на стоматолози на РСМ.

„Голема благодарност за хуманиот и несебичен гест од страна на сите компании и стоматолози коишто направија хумана донација со достава на заштитни маски, визири, скафандери, средства за дезинфекција, заштитни ракавици, сјаеви и ред други реквизити за нашите вработени, кои во овие моменти се нашите херојски ангели“ – стои во благодарноста на директорката Митева до донаторите, со надеж дека, како што вели, ваквите хумани гестови ќе ги поттикнат и другите компании да ги следат овие чекори.

Согласно задолжението на Владата на Република Северена Македонија, се повикуваат сите економски оператори – маркети кои се заинтересирани да ги стават на располагање своите маркети со цел обезбедување на НАЈНЕОПХОДНИТЕ НАМИРНИЦИ согласно приоритетните барања на граѓаните за времетраењето на забраната за движње во претстојниот викенд 11 и 12 април (сабота и недела), своите ПРИЈАВИ да ги достават на следната е-маил адреса: Оваа е-адреса е заштитена од спамботови. Треба да ви е овозможено JavaScript за да ја видите..

Рок за достава на пријавата е до петок 10.04.2020 година, до 12:00 часот.

Во пријавата потребно е да се наведе целосен назив на фирмата.

Економскиот оператор потребно е лицето кое ќе ја врши доставата да го најави во Секторот за внатрешни работи Струмица, со цел непречено да ја врши доставата за време на забраната за движење.

Старите и изнемоштени лица да ги користат телефонските броеви на волонтерите на општина Струмица (071 345 901 и 075 271 710), со што мобилните екипи ќе им излезат во пресрет за нивна помош во пазарување на основни намирници и лекови, како и плаќање на сметки.

Градоначалникот на општина Струмица, Коста Јаневски доцна вечерва со молба до струмичани, за разум и почитување на мерките, а по денешната слика во Струмица, посебно пред институциите, каде голем број граѓани, еден до друг чекат за да си завршат работа.

Почитувани сограѓани, мои струмичани,

Во овие доцни вечерни часови ви се обраќам не со апел, туку со најголема МОЛБА да ги почитуваме мерките за заштита од Ковид 19.

Денешната слика по улиците, а посебно пред одредени институции, ме загрижува како градоначалник, а пред се како лекар. Тоа што досега нема регистрирано случај на заболување од коронавирусот на територијата на општина Струмица, не ни дава за право да се однесуваме комотно и недисциплинирано. Само од нас зависи дали така ќе остане. Убеден сум дека наша заедничка желба е така да остане и затоа ве замолувам да се вразумиме и најсериозно да ги почитуваме мерките од надлежните институции.

Почитувани сограѓани останете во вашите домови, ќе дојде време и за прошетки по парковите и улиците, а ако треба да излезете и завршите некоја работа држете соодветно растојание меѓу вас, не се групирајте и почитувајте ги другите мерки за лична заштита.

Ги повикувам и институциите пред кои деновиве се забележани поголеми групи на граѓани, да покажат поголема одговорност со почитување на мерките за нивно работење во овие вонредни околности.

На денешната средба со претставниците на СВР Струмица, ја разгледувавме актуелната состојба и заклучивме дека при вакво однесување на граѓаните е потребно поголемо полициско присуство на терен, но и нивните капацитети се ограничени.

Ајде, сите заедно, да покажеме поголема одговорност и сериозност за состојбата во којашто се наоѓаме, да им олесниме на сите коишто се грижат за нашето здравје со тоа што ние самите ќе покажеме поголема грижа за него.

Синоќа на подрачјето на СВР Струмица пет граѓани ја прекршиле наредбата од страна Владата и Министерството за здравство за време на епидемија, односно ги прекршиле предвидените забрани за движење во определен период. Четири лица се затекнати на подрачјето на Полициска станица Струмица и едно на подрачје на Полициска станица Валандово – информираат од СВР Струмица.

Во текот на вчерашниот ден до надлежните основни Јавни обвинителства се поднесени 27 кривични пријави против 29 лица кои во претходниот период ја прекршиле забраната за движење, од кои 25 пријави против 27 лица се поднесени до Основно јавно обвинителство Струмица и 2 пријави против 2 лица до Основно јавно обвинителство Радовиш.

Со Решенија од Државен санитарен и здравствен инспекторат 3 нови лица се во домашна изолација, од кои 2 во Радовиш и 1 во Гевгелија, а воедно на подрачјето на Секторот за внатрешни работи Струмица се евидирани и 3 нови лица во самоизолација.

На Клиниката за инфективни и фебрилни состојби во Скопје починаа 4 пациенти заболени од коронавирус: пациент од Куманово (52г), пациентка од Лабуништа-Струга (65г), пациентка од Челопек – Тетово (62г) и една пациентка од Штип (81г). Во Куманово дома почина уште еден пациент потврден на вирусот на возраст од 53 години.

Во изминатите 24 часа, регистрирани се 29 нови случаи, позитивни на коронавирусот. По градови: Скопје – 15, Куманово -7, Прилеп – 1, Струга 3 и Кочани – 3.

Со ова, вкупната бројка на дијагностицирани пациенти со Ковид-19 во нашата земја изнесува 599 лица.

Градоначалникот на општина Струмица, Коста Јаневски, кој по професија е лекар, по повод денешниот светски Ден на здравјето упати честитка до здравствените работници од неговата општина.

Почитувани колеги – здравствени работници од општина Струмица.

Секоја година 7-ми април се одбележува како Светски ден на здравјето и здравствените работници, но годинава, како никогаш досега, овој ден немал толку големо значење и „тежина“.

Целиот свет соочен со големото зло наречено Ковид 19 ја препозна вистинската потреба и значењето на најхуманата професија. Бидете горди на таа ваша професија, бидете истрајни во предизвикот за чување и унапредување на здравјето на граѓаните, но чувајте го и своето здравје, затоа што и вие сте луѓе. Бидете на висина на работните задачи и чувајте го достоинството на вашиот животен повик.

Горд сум на Вас и горд сум што сум дел од Вас. Нека ви е честит и вековит Светскиот ден на здравјето и здравствените работници.