Вечерва во Центарот за култура „Антон Панов“ во Струмица, беше промовирана стихозбирката „Чекор помеѓу“ на струмичанецот Ице Беличев.

Станува збор за книга поезија која содржи 50 песни со најразлични теми и мотиви, песни за сечиј вкус. Рецензијата на книгата „Чекор помеѓу“ во издание на издавачката куќа „Феникс“ од Скопје, е на м-р Вања Изова Велева, која ја промовираше пред големиот број љубители на пишаниот збор.

Вања Изова Велева вели дека стихозбирката „Чекор помеѓу“ отвора многу дилеми, многу размислувања, многу исчекувања. Што значи да се биде помеѓу. Постои простор помеѓу нештата, дали всушност тоа е нашиот комфор каде бегаме од неодлучноста и незнаењето. Кога се наоѓаме помеѓу две нешта, логично е да се пронајдеме помеѓу нив, но дали чекорот ќе не однесе на едната или другата страна, зависи колку сакаме и колку можеме.

„Беличев во својата втора збирка поезија „Чекор помеѓу“ исчекорува со поетска зрелост, празничен восклик и отворено писмо низ кој бара сопствен пат. Негови сопатници се спомените, мислата, прашината на сокачето. Меланхоличното доспевање низ стихозбирката црта слика збор на читателот, оставајќи го да разоткрива хоризонти зачинети со љубовна патетика, мисла на изгубен патник, копнеж во минатото. Беличев знае скокум преку споменот на коренот и битисувањето да го спастри минатото… и така пред читателот да остави трага од она што поминало, од она што се памети. Сакајќи да побара спокој за неспокојот тој всушност останува заробен во светот на спомените, негувајќи ги како предуслов за тивка иднина“ – кажа поетесета и книжевен критичар, м-р Вања Изова Велева, директор на Педагошката служба при Министерството за образование и наука.

На вечерашната промоција на втората стихозбирка на Ице Беличев, стихови читаа Сузана Мицева, Мариета Дукиќ и Катерина Панов Кожаров, а модератор на промотивната вечер беше новинарот и поет Ѓорги Калајџиев.

ФОТОГАЛЕРИЈА

Градоначалникот на Струмица, Коста Јаневски бара ЈПКД „Комуналец“ да го поништи договорот со приватната фирма „Дасмак“ за собирање на ѓубрето, вреден 1.200.000 евра и да се најдат други решенија.

Тој на прес конференција која ја одржа доцна попладнево, информираше дека изминативе денови и усно и писмено побарал од менаџментот на струмички „Комуналец“ да го поништи договорот со струмичката приватна фирма за собирање ѓубре од територијата на општина Струмица, бидејќи не е во интерес на општината.

„Веднаш штом дознав за овој договор реагирав кај „Комуналец“, ја изразив мојата уверност дека ваквиот начин на решавање на проблемот не е соодветен и дека ваквиот договор треба да се поништи. Сигурен сум дека има подобри решенија за решавање на овој наш проблем“ – кажа градоначалникот Јаневски.

Деновиве ЈПКД „Комуналец“ склучи договор со струмичката фирма за собирање на ѓубрето од територијата на општина Струмица за период од една година, вреден 1.200.000 евра. Директорот на „Комуналец“ во интервју за ТВ ВИС кажа дека економскиот оператор ќе се ангажирал по потреба, што не мора да значи дека ќе му бидат исплатени сите пари, туку според извршената услуга.

По повод Денот на полициската превенција 9-ти декември, во рамките на активностите на Отсекот  за превенција при СВР Струмица, денеска во Полициската станица во Струмица, се одржа годишна средба на полициски службеници заедно со ученици од основните училишта „Сандо Масев“ од Струмица и „Атанас Нивичански“ од Висока Маала, општина Василево.

На средбата беа презентирани реализираните проекти во областа на превенцијата, како во намалување на малолетничкото насилство, спречување на малолетничката деликвениција и зголемување на безбедноста во сообракајот на младата популација.

Децата од двете училишта пред гостите рецитираа песнички на тема сообраќај, полиција, а од страна на секретарот на Републичкиот совет за безбедност на сообраќајот на патиштата, Владимир Лазарев, добија флуросценти елеци, кои во овој временски период, во овие временски услови ќе им бидат најпотребни, поради намалена видливост на улиците, облачното време и претставуваат најризична категорија учесници во сообраќајот.

Владимир Лазарев вели дека оваа година Републичкиот совет за безбедност на сообраќајот на патиштата во соработка со Секторите за внатрешни работи и општините, реализираше голем број на едукативни кампањи низ целата држава, се со цел зголемување на безбедноста во сообраќајот.

„Се намалува бројот на загинати во сообраќајни несреќи. Ако минатата година имавме 166 загинати лица во сообраќајни несреќи, годинава таа бројка изнесува 133 лица“ – кажа Лазарев.

Хризантема Рендевска, началник на Отсекот за превенција најави дека кампањите продолжуваат и во наредниот период. Веќе во вторник, со поддршка на Републичкиот совет и Општинскиот совет за безбедност во сообраќајот на патиштата, ќе се реализираат активности во основните училишта „Св. Кирил и Методиј“ во Дабиље, „Никола Вапцаров“ и „Маршал Тито“ во Струмица.

ФОТОГАЛЕРИЈА

Екипи од Одделението за одржување и управување со јавно зеленило при ЈПКД „Комуналец“ Струмица, за време на продолжениот викенд (недела и понеделник, 8 и 9 декември), ќе продолжат со есенско кроење на дрворедите во градот Струмица.

Ќе се работи на улицата „Ленинова“, од кружниот тек кај „Макпетрол“, па се до хотел „Централ“.

Поради присуство на механизација, се молат граѓаните да ги отстранат и да не ги паркират своите возила на 8 и 9 декември од 09:00 до 15:00 часот. Во истиот период булеварот „Ленинова“ од едната страна ќе биде затворен и за сообраќај.

На денешен ден пред 8 години, (6 декември 2011), Македонија се прости со најголемата фолк ѕвезда... со секогаш насмеаниот, пријателски расположен за песна и дружба и секогаш подготвен да им помогне на сите... Гоце Арнаудов.

Неговите песни се пееја, се пејат и ќе се пејат, тој на секоја песна и даваше душа и ја пееше од душа и со неговата интерпретација беше и ќе остане незаменлив. Тој голем човек на македонскиот народ му го остави своето најголемо богатство, своите песни.

Една од последните негови песни е темата „Песно моја“ во која тој пее:

Песно моја биди жива

Кога мене ќе ме нема

Кога ќе се јавам јас пред Бога

Може лесно да ме бришат

Можат грешки да ми пишат

Но, сведок ти ќе останеш.

Без сомнение песните кои ги отпеа со многу љубов, ќе продолжат да живеат и ќе бидат сведок за еден голем човек и пејач со неверојатна енергија.

Гоце Арнаудов е роден во Струмица на 19 август 1959 година. Уште на десетгодишна возраст почнува да свири на гитара и да пее во групата на неговиот татко. По завршувањето на средното образование ја формира групата „Крик“, со која се претставувале низ цела поранешна Југославија. Гоце се враќа во Македонија во 1993 година и за кратко време ги освојува симпатиите и признанијата на својата публика и на музичката критика и каде и да учествува предизвикува еуфорија, а речиси на сите фестивали ги освојува првите места.

Во 1994 година на Фолк Фест „Валандово“ со песната „Дали чекаш стара мајциче“ ги освојува сите можни награди, а таа песна се уште е меѓу омилените фолк песни на македонската публика.

Тој зад себе остави 200 песни, учествувал на стотина фестивали, од кои на преку 60 има добиено прво место. Пет години е прогласуван за најпопуларната личност на Македонија. Учествата на фестивалот Фолк Фест „Валандово“ му донеле 22 награди, а неговите песни многу пати ги имаат добиено наградите на публиката и на телевизискиот аудиториум.

Неколку пати станува сопственик на наградата за интерпретација на најголемиот пејач Никола Бадев на фестивалот „Гоце Фест“. Редовно и гостуваше на публиката во Европа, Америка и Австралија. Учествуваше редовно и на добротворни концерти. Во 2000-та година во својот роден град Струмица, Гоце прави концерт на стадионот „Младост“ и собра 10 илјади публика, а првите луѓе на градот му ја дават наградата „Свети Петнаесет Тивериополски свештеномаченици“ и за почесен граѓанин на Струмица.

Денеска и утре во хотелот „Сириус“, во организација на НУ Завод за заштита на спомениците на културата и Музеј Струмица, по втор пат се одржува Научен собир во чест на покровителите и заштитници на градот Струмица, Светите Петнаесет Тивериополски свештеномаченици

Деветнаесет истакнати истражувачи од неколку универзитетски и културни центри во Македонија, како што се МАНУ, Универзитетот „Св. Кирил и Методиј“, Институтот за национална историја, Македонското грбословно друштво од Скопје, од музеите на Струмица и Прилеп, ќе имат свои излагања на овој дводневен Научен собир на тема „Христофoр Жефарович и неговото време“.

Васил Ѓоргиев – Ликин од Заводот и Музеј во Струмица вели дека за догодина планираат овој Научен собир биде и од меѓународен карактер со учество на еминентни научни работници од балканот, а ќе се обработува темата „Балканот и балканските народи – паралели во историјата и современоста“.

„Тоа е една широка тема која дава можност за учество на повеќе истражувачи од различни научни области. Се надеваме дека Министерството за култура, како и досега, ќе има разбирање за нашите проекти, ќе го финансира тој проект и на тој начин можеме да поканиме истакнати истражувачи од соседните земји, балканските земји, па и пошироко, така да оваа манифестација прерасне во интернационална манифестација“ – кажа Васил Ѓоргиев Ликин.

На денешното отворање на Научниот собир, проф. д-р Александар Атанасовски од Филозофски факултет - Институт за историја, Универзитет „Св. Кирил и Методиј“ во Скопје го помовираше зборникот на трудови „Култот за Св. Петнаесет Тивериополски свештеномаченици во средновековната и во поновата епоха – историја, култура и традиција“, материјали од првиот Научен собир во чест на Светите Петнаесет, одржан минатата година.

ФОТОГАЛЕРИЈА

Под мотото „Јас сум фаца... не повредувам никого“, ученици од Општинското основно училиште „Сандо Масев“ од Струмица, денеска во Домот на АРМ одржаа „Отворен ден по граѓанско образование“, каде изведоа неколку музички перформансии.

Преку презентирање на сите успешни активности пренесоа многу важни пораки поврзани со насилството: „Ти си фаца... кога ги штитиш послабите од себе! Ти си фаца... кога им помагаш на другите кога се во неволја! Ти си фаца... кога зборуваш вистина! Ти си фаца... кога не молчиш за насилството! Ти си фаца... Кога не повредуваш никого“.

„Учениците ја избраа оваа тема и во соработка со наставничката по граѓанско образование и стручната служба од училиштето изработија акционен план во кој ги зацртаа сите активности, со цел учениците да покажат дека може да бидат важни креатори во политиката на нашето граѓанско општество, а воедно да придонесат да се креира нивна демократска партиципација во животот и работата на училиштето“ – вели директорката на училиштето, Драгица Спасова.

Претседателот на ОК на ВМРО-ДПМНЕ во Струмица, Александар Донев, на денешната прес конференција го повика градоначалникот на Струмица, Коста Јаневски да се произнесе за договорот на „Комуналец“ со приватна фирма за собирање смет и да ја утврди и понесе одговорноста.

Интегрален текст од прес конференцијата:

Пред десет дена јавното претпријатие „Комуналец“ Струмица потпиша скандалозен договор. Иако веднаш реагиравме, до сега нема одговор ниту од повиканите институции, ниту пак од градоначалникот.

Да потсетиме: фамозен договор со кој јавното претпријатие „Комуналец“ ангажира приватна фирма од Струмица да собира смет од територијата на општината за фантастични 1.200.000 евра.

Станува збор за приватната фирма „Дасмак“, која во периодот од 2014 до 2018 година била во мирување, додека во 2018 година имала само 4 вработени лица, непосредно по потпишувањето на договорот вработени се нови 7 лица.

„Комуналец“ чија основна дејност е да собира смет има околу 420 вработени. Замислете 15 луѓе да придонесат за ефикасноста на половина илјада професионално ангажирани лица. Само месец дена пред потпишување на договорот фирмата основа подружница за собирање на безопасен смет.

Затоа, ги повикавме надлежните да утврдат кога и од каде е набавена опремата на правното лице и какви биле нивните претходни сознанија за тендерот, со оглед дека во претходна соработка добиле два тендери со вкупна вредност од околу 16 милиони денари од „Комуналец“.

Инаку, јавното претпријатие „Комуналец“ Струмица веќе должи 1.300.000 евра на претпријатието „Струмичко поле“. Во меѓувреме се одобруваше кредит од околу 2 милиони евра за обнова на водомерите, а цената на водата за граѓаните е покачена. До скоро поранешната управна зграда на „Комуналец“ беше под хипотека заради неплатен данок. „И баклавата изедена и тепсијата ја нема“.

Бидејќи ова лошо менаџирање очигледно ќе го платиме повторно ние граѓаните со сметките, го повикуваме градоначалнкот да се произнесе за овој случај и да ја утврди и понесе одговорноста.

Денеска околу 06:40 часот на магистралниот пат Штип – Велес, кај местото викано „Три чешми“, штипско, полициски службеници го лишиле од слобода В.Г. од Струмица поради тоа што во товарно возило „Нисан“ превезувал 19 лица мигранти од Авганистан и Пакистан – информира МВР.

Претходно, В.Г. не застанал на знак за запирање од полициските службеници и се обидел да побегне, но набргу потоа возилото било запрено и В.Г. бил лишен од слобода.

По целосно документирање на случајот против возачот ќе биде поднесена соодветна пријава.

Денеска и утре во хотелот „Сириус“, во организација на НУ Завод и Музеј Струмица, по втор пат ќе се одржи Научен собир во чест на покровителите и заштитници на градот Струмица, Светите Петнаесет Тивериополски свештеномаченици, со специјална тема: „Христофoр Жефарович и неговото време“.

На отворањето на Научниот собир ќе биде промовиран Зборник на трудови „Култот за Св. Петнаесет Тивериополски свештеномаченици во средновековната и во поновата епоха – историја, култура и традиција“, материјали од првиот Научен собир во чест на Светите Петнаесет, одржан минатата година, а промотор ќе биде проф. д-р Александар Атанасовски од Филозофски факултет - Институт за историја, Универзитет „Св. Кирил и Методиј“ во Скопје.

На дводневниот Научен собир свое излагање ќе имат еминентни професори и научни работници од МАНУ, Универзитетот „Св. Кирил и Методиј“, Институтот за национална историја, Македонското грбословно друштво од Скопје и од неколку национални музеи во државата.

Во петок, 6-ти декември со почеток во 18:00 часот, во малата сала на Центарот за култура „Антон Панов“ во Струмица, ќе се одржи промоција на книгата „Симфонија од бои“ од струмичкиот писател, поет, драматург, долгогодишен новинар и уредник, Никола Д. Сарајлија – Македонски.

Промотор на книгата „Симфонија од бои“ ќе биде д-р Марина Мијаковска, презентер актерката Јулија Милкова, а модератор на вечерта Ѓорги Калајџиев.

Девојките на студиото за модерен балет „Газели“ – Подружница Струмица, со кореографот Изабела Ангелова, беа дел од меѓународниот АРТ фестивал – Фестивал на уметностите „Morning Star“, кој се одржа викендот во Банско, Бугарија.

Тие се натпреваруваа во три танцови категории, а најдобри, односно првото место го освоија во категоријата „Шоу танци – МИНИ со корегорафија Мравки.

Во конкуренција на учесници од неколку држави меѓу кои и од Бугарија, Украина, Грција, Македонија, струмичките „газели“ го освоија и третото место во категоријата Модерен балет - група до 13-годишна возраст со кореографијата „Fight Song“. Трети беа и во категоријата Open - група до 13-годишна возраст со кореографијата „Milion dreams“.

Фудбалерите на „Академија Пандев“ со победа од 1:0 се враќат во Струмица од Чаир, на првиот четвртфинален натпревар од Купот на Македонија против тимот на „Шкупи“.

Стрелец на единствениот гол беше Ристе Темелков, кој за прв пат оваа сезона настапи по операцијата на коленото.

Реваншот во Струмица ќе се одигра во март. За „пандевци“ останува само уште еден првенствен натпревар до крајот на оваа полусезона против „Силекс“ во Кратово, кој ќе се одигра во сабота со почеток од 13:00 часот.

Вчера во 17:00 часот на крстосницата на улиците „Младинска“, „Братство Единство“ и „24 Октомври“ во Струмица, патничко моторно возило „Мерцедес 220“, со струмички регистарски ознаки, управувано од А.Д. (23) од Сачево, удрило во В.А. (75) од Струмица – информираат од СВР Струмица.

Во незгодата со тешки телесни повреди се здобила В.А., која била пренесена во ЈЗУ „Општа Болница“ Струмица за укажување на лекарска помош. Увид на местото на настанот извршила екипа од СВР Струмица.

Во петок, 6-ти декември со почеток во 19:30 часот во малата сала на Центарот за култура „Антон Панов“ во Струмица, ќе се одржи промоција на стихозбирката „Чекор помеѓу“ на струмичанецот Ице Беличев.

Станува збор за книга поезија која содржи 50 песни со најразлични теми и мотиви, песни за сечиј вкус. Рецензијата на книгата „Чекор помеѓу“ во издание на издавачката куќа „Феникс“ од Скопје, е на м-р Вања Изова Велева, која и ќе ја промовира во петокот.

Времето минува крај нас, а ние сме само негови повремени сопатници... Патуваме низ својот живот понекогаш како странци, единствено реално место каде секогаш се враќаме е топлото огниште на домот. Куќата може да биде дом за повеќе генерации, за сите нив, длабоко во душата е врежана токму адресата на нивното раѓање, на нивниот дом. Врежани се спомени на љубов, радост, солзи, и куфер полн со надеж. Ајде да патуваме заедно до Мојата Улица ... Каде јавето е исполнет сон…

Васил Гарванлиев