Со песна, во еден глас, пееја глумците, но и целиот персонал на НУЦК „Антон Панов“ во чест на големиот јубилеј – 70 години Народен театар во Струмица. „Немам мило, немам драго“, ја почна Ванчо Мелев, па по него сите, го означија крајот на свеченоста по повод јубилејот.

За Струмичкиот Народен театар, за неговите 70 години е издадена монографија од авторот Ацо Гогов. Сречко Гунчев одбра 40-тина фотографии од претстави кои тој ги направил во последните 20 години, од 50-годишниот јубилеј до 70-от, а костимографот Ванчо Василев подготви изложба на костими од театарски претстави одиграни во Струмичкиот Народен театар. Кратко видео со колаж од фотографии, но и видео кадри од претстави беше прикажано на свеченоста во фоајето на Центарот за култура, а сите актери сегашни и поранешни, техничкиот персонал, но и поддржувачи, добија медали со логото „70 години Народен театар“.

На 1 мај 1949-та година почна со работа Струмичкиот Народен театар, прва претстава „Бегалка“ од Васил Илјоски, во режија на Димитар Колчаков. Од тогаш, па до денес, на сцената се поставени 393 премиери, одиграни се 4938 претстави, а ги следеле вкупно 1.303.442 гледачи, според статистиката од продадени влезници во изминатите 70 години.

„Од 70-те години на нашиот театар, мои 50 се вложени во него. Активно 35 години, формално само заминав во пензија во 2005 година, но и оттогаш постојано играм. Никогаш нема да го заборавам ноември 1969 година кога дојдов и почнав со улогата на Донка во „Бегалка“, а годинава завршив со Аманда во „Стаклена менажерија“ – ни кажа пензионираната актерка Тинка Ристевска, која на свеченоста и беше доделено специјално признание за полувековниот непрекинат настап на театарската сцена.

По свеченоста се одржа здравица во чест на големиот јубилеј, а актерите си посакаа една желба, што поскоро да заиграт на новата сцена во новиот храм на театарот кој се гради на местото на стариот Струмички театар од 2014 година, а требаше да биде готов за 18 месеци. /Р.Ѓ./

ФОТОГАЛЕРИЈА

Во Струмица се отвора Дом за жртви од семејно насилство, односно Шелтер центар за прифаќање и престој на жртви од семејно насилство.

Домот со површина од околу 200 метри квадратни, со капацитет за 8 лица од кои две за итна интервенција и 24-часовно згрижување, го отвора Здружението „Скај Плус“ со поддршка на Општина Струмица и 35 компании од Струмичкиот регион.

Домот е готов, ќе биде ставен во функција веднаш по добивањето на дозволата од Министерството за труд и социјална политика, каде постапката е при крај.

Синоќа во Центарот за култура беше промовиран од страна на претседателката на Здружението „Скај Плус“, психологот Стојна Митева и градоначалникот на Струмица, Коста Јаневски.

Според Стојна Митева, 35 компании со над 2 милиони денари и Општина Струмица со 1,2 милиони денари буџетски средства за 2020 година ќе ја поддржуваат работата на оваа хумана установа која ќе биде привремен дом за тие кои ќе имаат потреба од него.

„Ова е дом во кој ќе можат да се чувствуваат сигурно, безбедно со сето она што значи социјална поддршка за крајната цел да биде од нашиот дом да излезат посигурни, постабилни и едноставно да застанат на свои нозе“ - кажа Митева.

На промовирањето на Шелтер центарот, градоначалникот на Струмица, Коста Јаневски рече дека секој човек, секоја жена треба да се чувствува безбедно во својот дом и средината во која живее. Ова е основно право кое ние како држава и општина мора да го гарантираме.

„За да ја реализираме оваа цел, мора да работиме сите заедно и да воспоставиме ефикасни механизми, но и тесна соработка со невладиниот сектор и сите засегнати страни. Овој Шелтер центар е потврда дека може да се успее ако се работи така“ – кажа градоначалникот Јаневски. /Р.Ѓ./

ФОТОГАЛЕРИЈА

Новогодишна песна снимија дел од учесниците на Балканското шоу „Никад није касно“, песна со порака да бидеме секогаш сестри и браќа, љубовта со љубов да ни се враќа...

„Среќна ти Нова Балкане стари“ е песна за која текстот го напиша струмичанецот Ѓорги Калајџиев, музиката е на Мирзад Перваниќ Мигос, додека аранжманот го направија Горан Алиќ и Иван Кукиќ. Музиката е снимена од членовите на струмичкиот бенд „Јупитер“, а видеото е во продукција на „SHOWTIME“ од Струмица, под режисерската палка на Кире Пиличев и Ѓеорги Кончалиев, кое го снимаа на неколку локации во Белград и во Струмица.

Новогодишната песна „Среќна ти Нова Балкане стари“ ја пеат: Ленче и Горан Кукиќ, Гордана Костиќ Чириќ, Марко Жигмановиќ, Билјана Прокиќ, Мирзад Перваниќ Мигос, Југослав Шијачки, Јасмина Мима Шијачки, Даниела Станковиќ Костиќ и членовите на „Јупитер“. /Р.Ѓ./

Струмичанецот Никола Ѓоргиев, капитен на македонската одбојкарска репрезентација, доби признание за посебни достигнувања во спортот за 2019 година од страна на Агенцијата за млади и спорт на манифестацијата „Спортист на годината 2019“.

Главниот мотиватор на одбојкарската репрезентација на деби-настапот на ЕП 2019 и воедно нашиот најуспешен одбојкар, од говорницата се заблагодари за признанието и истото им го посвети на сите негови блиски, односно семејството, соиграчите, пријателите, неговата секојдневна поддршка.

„Мора да се заблагодарам за оваа награда за Агенцијата за млади и спорт. Чест и привилегија е да се биде тука. Благодарност до моето семејство, таа е 15 години моја поддршка, благодарност до Одбојкарската Федерација на Македонија, која ни овозможи да дојдеме од трње до ѕвезди. Исто така оваа награда не е само моја, туку и на сите соиграчи. 2019 беше феноменална година за нас, се надевам дека во 2020 ќе продолжиме во ист ритам. Имаме Европска лига, имаме квалификации и се надевам дека пак заедно ќе се радуваме“ - кажа Ѓоргиев.

Инаку, во Најдобрите на изборот на Агенцијата за млади и спорт, спортскиот клуб на Основното училиште „Видое Подгорец“ од Струмица е прогласен за Најдобар училишен клуб.

Вечерва во Музичкото училиште „Боро Џони“ во Струмица се одржа традиционалниот Новогодишен концерт на кој учествуваа најуспешните ученици и струмички таленти во пеење и во инструментална изведба на пијано, виолина, хармоника, флејта, кларинет, труба, тамбура, кавал и тапан.

На програмата беа застапени дела од Моцарт, Шопен, Бах и многу други познати светски уметници, но и македонски песни и ора интерпретирани на народни инструменти.

„Вечерва преку музика ја испраќаме годината која ни дари, некому повеќе, некому помалку, од се по нешто. Да ја паметиме по радосните мигови оваа веќе стара година, а да си посакаме уште повеќе во Новата 2020 година. Желбите ќе станат реалност ако во мигот кога ги замислуваме, музиката е дел од нив“ – кажа Клара Патарова, директор на ООМУ „Боро Џони“.

ФОТОГАЛЕРИЈА

Денеска Општинската организација на Црвен крст во Струмица со поддршка на ЕВН Македонија – КЕЦ Струмица организираше заедничко дружење со деца со попреченост, во рамките на акцијата на ЕВН Македонија „Да споделиме радост“, на која беа доделени новогодишни пакетчиња.

И Дедо Мраз дојде, тој им ги додели пакетчињата на дваесеттина деца од Струмица, членови на Здружението за помош и поддршка на лица со Даунов синдром „ВЕРА“. Им посака среќни Новогодишни и Божиќни празници и Новата 2020 година да им донесе здравје, љубов и радости.

Струмица за „Нова година“ на плоштадот „Гоце Делчев“ ќе има лизгалиште, дознава Радио СтрумицаНет.

Според нашите информации, монтажното спортско лизгалиште би требало да почне да се поставува попладне или од утре предпладне и ќе биде готово до вторник, во пресрет на Новата година.

Станува збор за проект на Агенцијата за млади и спорт, кој освен во Струмица се поставуваат или се поставија и во уште шест градови во нашата држава, а струмичкото лизгалиште ќе се користи до крајот на месец февруари, односно до Струмичкиот карневал 2020.

Лизгалиштето ќе биде опремено според светски стандарди, со машини за острење на лизгалките, машини за одржување и мазнење на мразот, со панели од поцинкуван челик, а ќе биде оградено со алуминиумска ограда.

На плоштадот во Струмица за прв пат беше поставено лизгалиште во 2011-та година, тогаш како проект на поранешниот Младински Совет на општина Струмица. /Р.Ѓ./

Еколошкото друштво „Планетум“ од Струмица го постави првиот паметен соларен држач за велосипеди, кој е инсталиран во дворот на Средното општинско училиште „Јане Сандански“ во Струмица.

Станува збор за инсталација, која е прв пат поставена во нашата држава и која има четири соларни панели и сончевата енергија ја претвараат во електрична енергија, со што се придонесува за зачувување на животната средина.

„Соларниот паркинг за велосипеди не е само обичен паркинг за 13 велосипеди, туку паметен уред, каде може да се наполни батеријата на паметен телефон, лап топ, таблет, како и можност за безжично полнење. Ја има можноста преку WiFi рутер да се добијат локални податоци и активно мерење на температурата и квалитетот на воздухот. Соларниот држач има свое LED осветлување, шанк подлога. Конструкцијата е галванизиран челик и е АNTI VANDAL производ“ – велат од ЕД „Планетум“.

Поставувањето на оваа паметна урбана опрема, како проект на ЕД „Планетум“ од Струмица, финансиски е поддржан од Општина Струмица преку Г1 програмата, во партнетство со ЈПКД „Комуналец Струмица, одговорен за изведбата на бетонската плоча, како и за монтажата на конструкцијата. Дополнителоно во соработка со директорката на  СОУ „Јане Сандански“, Невенка Стојанова се обезбеди монтажа, преку приватна компанија, која изврши инсталација на соларниот систем.

ЕД „Планетум“ и овојпат покажа иновативен пристап, преку кој би ја подигнале свеста кај младите и граѓаните и би ги мотивирале и другите институции, општински и државни, да размислуваат како Струмица да ја претвоирме во „штедлив“ град и да биде прва и пример за останатите градови.

Јавното претпријатие „Паркиралишта Струмица“ продолжува со модернизирањето на уличното осветлување во градот.

Деновиве се работи на ново енергетски ефикасно 240 ЛЕД арматури на булеварот „Климент Охридски“ на потегот од кружниот тек на влезот во градот од кај Добрејци до излезот кон Валандово и на булеварот „Гоце Делчев“, од кружниот тек кај „Анска река“ до излезот кон Дабиле. Половина од овие светлосни арматури се веќе поставени, останатите во наредниот период, а во новата година на повеќе локации во Струмица ќе биде поставено ново ЛЕД осветлување.

Новите ЛЕД светилки се поквалитетни и енергетски поефикасни од тие што досега беа во употреба, велат од ЈП „Паркиралишта Струмица“.

Во последните денови од веќе старата година и пред почетокот на Новата 2020 година струмичкиот бренд „РАЗНОПРОМЕТ АС“, кој секогаш е во акција за своите потрошувачи, ги намали цените до 30% на своите артикли во Продажно-изложбениот салон на излезот од Струмица кон Дабиље.

Попустот ќе важи до сабота 28 декември... „РАЗНОПРОМЕТ АС“ е отворен од 08:00 до 19:00 часот, во сабота до 18:00 часот.

СВР Струмица информира дека е поднесена Кривична пријава против полициски службеник А.Б. (47) од Струмица, кој на 2 декември сторил кривично дело „Загрозување на сигурноста“, предвидено во Кривичниот Законик, на начин што при разминување на скалите во внатрешноста од зградата на СВР Струмица, без претходно да биде предизвикан, почнал да му се заканува вербално по животот и телото на помошник началникот на Одделение за полиција и во еден момент го удрил во пределот на градите.

На денешната прес конференција, Хризантема Рендевска, портпарол на СВР Струмица информираше и дека за истото лице до Основното јавно обвинителство за гонење на организиран криминал и корупција - Одделение за истражување и гонење кривични дела сторени од лица со полициски овластувања и припадници на затворската полиција Скопје, е поднесена и кривична пријава против него поради постоење основано сомнение дека пријавениот сторил кривично дело „Злоупотреба на службена положба и овластување“.

„Имено, на ден 06.11.2019 година, во времето кога пријавениот требало да ги извршува работните обврски на работното место, односно во времето од 15:45 до 16:00 часот бил во Спортска обложувалница во Валандово, приложувајќи добитен тикет за исплата. Но од страна на вработената во обложувалницата согласно Законот за игри на среќа и забавните игри, од пријавениот бил побаран документ за идентификација за да добитниот тикет биде исплатен, по што пријавениот одбил да се легитимира, заканувајќи и се по животот, на дрзок начин обраќајки и се со висок тон, ја присилил да изврши исплата на добитниот тикет, спротивно на правилата на обложувалницата. Пријавениот изреволтиран од  барањето на вработената да се идентификува, злоупотребувајќи ја, односно искористувајќи ја својата службена положба во два наврати извадил службена легитимација, притоа заканувајќи се дека така лесно нема да поминат ниту вработените ниту кладилницата“ – рече Рендевска.

По завршувањето на 31-та седница на Советот на општина Струмица на која главна тема беше Буџетот за 2020 година, советниците на ВМРО-ДПМНЕ одржаа прес конференција.

„По трет пат во овој мандат општината распределува Буџет со речиси слична сума, но во него за жал, нема нови и нема капитални инвестиции. По трет пат Буџетот на Струмица ги нема главните ветувања на градоначалникот. Го нема новиот транзитен пат, ниту растеретениот Булевар „Св. Климент Охридски“ доби проширување со четири ленти“ – кажа Ели Панова, член на Советот на општина Струмица од редовите на ВМРО-ДПМНЕ.

Таа вели дека денешната седница на Советот на општина Струмица помина во знак на големо разочарување за сите граѓани на општина Струмица.

„Средства за проектот Урбан мост речиси и нема предвидено, односно, повторно не е предвиден Детален урбанистички план за месноста Софилар, каде што, замислете, во 21 век на само 500 метри од центарот на градот неколку илјади жители немат канализација, немаат водовод и немаат патна инсфраструктура. Во Буџетот за 2020-та ги нема ниту инвестициите за Проектот „Ново турско маало“, нема нов парк во Турското маало, го нема ниту игралиштето“ – истакна Панова.

Панова говореше и за најавуваниот проект „Субвенции за енергетска ефикасност“, кој, како што кажа, се појавува симболично со две фасади од јавни станбени згради, за кои ниту има методологија, ниту имаат претстава како ќе бидат распределени.

„Почитувани сограѓани! Слабиот менаџмент на општинската администрација, заморот на кадрите и занимавање со бизниси и партиски работи на локалната власт за нас граѓаните на Струмица значи уште една изгубена година во партиски вработувања, крпење на дупки, залажување, фарбање и одржување“ – заврши Ели Панова.

Буџетот на општина Струмица за наредната година ќе тежи 1.228.237.635 денари или околу 20 милиони евра. Советот на општина Струмица на денешната последна седница за тековната година го усвои буџетот за 2020 година со 12 гласа „за“ и 7 воздржани и е за околу 2 милиони евра повеќе од тековниот за 2019-та.

„Станува збор за структурно избалансиран буџет, кој освен што обезбедува непречено извршување на основните услуги кон заедницата, како што се комуналните служби, детските градинки, образовните институции, противпожарната служба, предвидува и вложување во булевари, улици, тротоари, канализации, гасоводна мрежа, детски игралишта, спортски терени, урбана опрема, но и активности во областа на културата, спортот, социјалната заштита кои се директно насочени кон граѓаните“ - кажа градоначалникот Јаневски.

Градоначалникот на Струмица вели дека основниот буџет кој го полнат струмичани е околу 400 милиони денари или помалку од 7 милиони евра, додека останатите 13 милиони евра се дотации и донации од државата и Европски фондови.

Советниците на ВМРО-ДПМНЕ со забелешки за новиот буџет, според нив, во него требало да се најдат одредени ветени проекти од страна на градоначалникот и да се посвети внимание на подетално опишување на одредени позиции во буџетот. /Р.Ѓ./

Екипата на ФК „Академија Пандев“ од Струмица на гала свеченоста за најдобрите во спортот за сезоната 2018/2019 е избрана за најдобрата фер плеј екипа.

Екипата на Горан Пандев е избрана пред се зарада најмалиот број на жолти и црвени картони во последната натпреварувачка сезона.

Наградата ја прими Ристе Ристов од управата на Струмичкиот фудбалски прволигаш, кој играл најкоректно минатата сезона.

Марјан Гоцевски од Струмица е избран за најдобар судија во мак-фудбалот за сезоната 2018/2019, на гала свеченоста која синоќа традиционално се организираше од страна на ФФМ.

Марјан Гоцевски е еден од плејадата наши помлади судии кои уште сега се на исто ниво со „интернационалците“, Ставрев, Мечкаровски и Јакимовски, кои долго време беа неприкосновени и долго време го носеа епитетот  најдобри наши делители на правдата во мак-фудбaлот.

Советот на општина Струмица утре ќе ја одржи 31-та седница на која ќе се расправа по предлог Буџетот на општината за наредната 2020 година.

Освен за новиот предлог Буџет и одлуката за негово извршување, членовите на Советот на општина Струмица ќе расправаат и за уште 40-тина точки од дневниот ред на ова седница. Предлог програмите за 2020 година за активностите на општина Струмица во областа на локалниот економски развој и туризмот, за активностите поврзани со спроведување на проекти финансирани од фондовите на Европската Унија, за активностите во областа на меѓународна соработка за 2020 година, предлог Програмата за уредување на градежното земјиште, за изградба, реконструкција, одржување и заштита на локални патишта и улици на територијата на општина Струмица, за изградба и одржување на јавното осветлување, предлог програма за изработка на урбанистички планови во општина Струмица за 2020 година и уште многу други програми кои се и составен дел на новиот Буџет.

На утрешната седница советниците ќе расправаат и по предлог одлуката за основање на Општински совет за социјална заштита, за предлог одлуката за измена на Одлуката за авто-такси превоз на патниците на подрачјето на општина Струмица, а ќе се разгледуваат и програмите за работа на јавните општински претпријатија, како и извештајот за реализацијата на годинашното издание на Струмичкиот карневал.