Синоќа на реконструираното спортско игралиште во Чифлик маало, спроти главниот влез на поранешната касарна во Струмица започна одржувањето на турнирот во мал фудбал „Струмица 2022“.

24 екипи од повеќе градови во нашата држава, поделени во 6 групи од по четири екипи во наредните 20 дена ќе се натпреваруваат за освојување на првите три места и наградите од 110.000 денари, 60.000 и 30.000 денари, а во финалето ќе се доделат и наградите за најдобар играч, најдобар стрелец и најдобар голман.

„После многу години, го имаме задоволството да уживаме во зародишот на уште еден турнир во мал фудбал, со надеж дека убавата традиција ќе се врати на голема врата. Струмица, струмичкиот фудбал и струмичките љубители на спортот тоа го заслужуваат“ – кажа покровителот на овој турнир, градоначалникот на Струмица, Костадин Костадинов на синоќешното отворање и почетокот на ова спортска манифестација за која организаторите најавуваат дека ќе прерасне во традиција.

Тие очекуваат силен и квалитетен турнир во мал фудбал секоја вечер на игралиштето во Чифлик мало, бидејќи според имињата на играчите, во пријавените екипи се забележуваат и имиња на футсал репрезентативци.

Инаку во шесте групи сите четири екипи ќе играат „секој со секого“, а најдобро пласираните две екипи од секоја група и четирите најдобри третопласирани екипи ќе влезат во елиманационата фаза, почнуваајќи со осминафиналето.

Вечерва од 20:00 часот на струмичкото корзо ќе биде поставена фотографска изложба на струмичанецот Марјан Ѕингаров, насловена „Птиците во Градскиот парк“.

Оваа прекрасна серија фотографии е правена во Градскиот парк во Струмица во подолг временски период, и на неа се претставени портрети на суштества од еден сосема различен свет кој постои паралелно со нашиот.

Фотографиите на Марјан Sингаров ќе нè воведат во свет кој најчесто не го забележуваме, повлечени во виорот на секојдневните грижи и обврски.

Низ окото на својот фотоапарат, авторот на изложбата го оживува естетскиот миг среде обичноста на просторот и времето, но едновремено тој прави и едно многу важно научно документирање на видовите птици кои живеат или се само на поминување низ нашата средина во еден краток временски пресек.

Оваа фотографска серија покрај визуалното уживање, нуди и сериозна едукативна содржина која е толку важна и неопходна за сите нас кои ја сакаме и почитуваме природата околу Струмица, велат организаторите, Здружението за култура и визуелни уметности „КАДРО“ од Струмица.

South Side Cocktail Bar е прв и единствен крипто коктел бар во Македонија, сместен во срцето на Струмица и место коешто има за цел да ја промовира крипто културата во Македонија и да ги едуцира луѓето за можностите што ги носи крипто светот.

„Крипто валутите сè уште се табу тема во Македонија. Затоа, решивме да направиме место каде што ќе може да се конектираме со истомисленици и да споделуваме информации за крипто светот додека пиеме уникатни коктели. Ова е локацијата кадешто ќе ги добиеш одговорите на сите прашања поврзани со крипто валути”, вели Нена Панова, ко-основач и менаџер на компанијата Crypto Dive In.

Како дел од новото мени на South Side, ќе може да ги пробате првите коктели инспирирани од крипто валутите и крипто светот. 

Уникатноста на пијачките, стилот, опуштената атмосфера и позитивните луѓе што се наши редовни посетители, го прават коктел барот must-visit локација за секој што ќе ја посети Струмица.

Од компанијата велат дека поради големиот интерес, во план е во рамки на коктел барот, да се организираат обуки, работилници и презентации на крипто проекти за инвестирање. Во иднина ќе ја има и можноста да се плаќа за коктел во крипто валути.

„Со самото социјализирање во South Side Cocktail Bar, разговарајќи на теми од крипто светот, заклучивме дека на Струмица, воедно и на Македонија, ѝ треба место каде што истомисленици би можеле да разговараат за можностите што ги носи крипто светот, да разменуваат мислења и споделуваат искуства”, вели Иван Христов, основач и менаџер на South Side Cocktail Bar.

South Side Cocktail Bar ги поканува сите коишто имаат желба да навлезат во светот на крипто валутите без разлика на нивото на знаење, да дојдат на коктел во крипто барот за да ја стекнат финансиска слобода преку инвестирање во крипто валути.

South Side Cocktail Bar се наоѓа на Плоштад „Маршал Тито” број 7 во Струмица.

МВР информира дека полициски службеници од Полициската станица за Граничен премин Табановце и Полициската станица за граничен премин Долно Блаце извршиле контрола на пет автобуси и три патнички возила кои вршеле меѓународен превоз на патници.

На Граничен премин Табановце, при контрола на автобус управуван од В.Л. од Струмица, на автобус управуван од А.М. од Кочани, на автобус управуван од Р.К. од Струмица, сите три со струмички регистарски ознаки, на автобус со гостиварски регистарски ознаки, управуван од Ф.А. од с.Шемшево, на автобус со скопски регистарски ознаки, управуван од Г.Р. од Скопје, и на три патнички возила со струмички регистарски ознаки: „мерцедес“ управуван од В.Н., „фиат дукато“, управуван од К.С., двајцата од струмичко и „мерцедес“ управувано од К.А. од Струмица било констатирано дека вршеле меѓународен превоз на патници без поседување на соодветна документација. Од страна на Државниот инспекторат за транспорт изречени се соодветни санкции за возачите и возилата.

ЕВН Македонија – КЕЦ Струмица за утре (вторник, 28 Јуни) најавува прекин на електричната енергија од 09:00 до 15:00 часот во населените места: Добрашинци, Висока Маала и Нова Маала (општина Василево).

Советот на општина Струмица на денешната 11-та седница како надополнување на дневниот ред стави предлог одлука за основање на нова Јавна општинска установа за деца „Виножито“ Струмица. Струмичките советници, едногласно со 20 гласа ја поддржаа ова одлука.

Покрај сегашната ЈОУДГ „Детска радост“, која управува со седум клонови, односно детски градинки во градот Струмица и во селата Куклиш и Муртино, Општина Струмица ќе има уште една ЈУ за деца, а според нашите информации, како посебен правен субјект ќе управува со новата детска градинка која се изгради во кругот на поранешната касарна и е со капацитет за околу 300 деца, а ќе започне со работа од Септември.

Во наредниот период се очекува градоначалникот и Советот да ги донесат правните акти на ова установа, да се именуваат раководни лица и да се вработат воспитувачи, негуватели и технички персонал кои ќе работат во новиот правен субјект ЈОУ за деца „Виножито“.

Вчера околу 16:00 часот на локалниот пат од село Трибичино кон село Едрениково, струмичко, на место викано „Бресто“, трактор „ИМТ 533“, со струмички регистарски ознаки, управуван од З.С.(51) од село Дабиле, излетал од патот. Од здобиените повреди на местото на несреќата починал З.С., а со повреди се здобил К.К.(74) од село Владевци, кој бил пренесен во болницата во Струмица каде подоцна им подлегнал на повредите, информираат од СВР Струмица.

Увид на местото извршиле Јавен обвинител и увидна екипа од СВР Струмица.

Струмица ја одбележа 66-та година од раѓањето на трагично загинатиот претседател на Република Македонија, Борис Трајковски.

Споменикот „Македонија“ поставен во Струмичкиот парк во чест на Трајковски беше местото кое го посетија голем број струмичани, положија свежо цвеќе и се потсетија за животот и делото на претседателот, но и нивниот роднина, пријател и сограѓанин.

Во чест на претседателот Борис Трајковски цвеќе положија и членови на семејството Трајковски, претставници на локалната самоуправа, политички партии и претставници на институции и здруженија.

За претседателот Борис Трајковски говореше градоначалникот на општина Струмица, Костадин Костадинов.

„Претседателот Трајковски беше на рамништето на најистакнатите архитекти и неимари на мирот во европски и светски рамки, но и олицетворение на политичката мудрост. Беше исклучително редок поклоник и поддржувач на постулатите на дијалог, доверба, разбирање, соработка и толеранција, но и иницијатор за изнаоѓање на разрешници дури и за најгорливите прашања кои ги тиштат македонските граѓани. До самиот крај на неговиот живот беше на страната на вистината, па во името на таа вистина го градеше својот политички став, ставајќи се и самиот себе како влог и гаранција за негова безрезервна одбрана. Силната верба во татковината најчесто ја поткрепуваше со вербата во човековата вредност, без разлика на националната, политичката и верската припадност“ – кажа Костадинов.

На 23.06.2022 година во 00:15 часот во Струмица, полициски службеници од СВР Струмица го лишиле од слобода И.С.(60) од Струмица, затоа што кај него била пронајдена марихуана, информираат од струмичката полиција. По целосно документирање на случајот ќе биде поднесен соодветен поднесок.

Од ЕВН Македонија – КЕЦ Струмица информираат дека утре (петок, 24-ти Јуни) во периодот од 09:00 до 13:00 ќасот ќе има прекин на електричната енергија на дел од селото Баница, односно од центарот на селото кон ТС Баница 2.

СВР Струмица информира дека на 21.06.2022 година околу 22:30 часот во Полициската станица Струмица, Ѓ.И.(41) од Струмица пријавила дека околу 19:20 часот во село Старо Балдовци, струмичко, по претходна физичка пресметка на нејзината малолетна ќерка со друга малолетничка, нејзината ќерка била физички нападната од таткото на другата малолетничка. Се преземаат мерки за расчистување на случајот.

Претседателот на Република Северна Македонија, Стево Пендаровски денеска на Манифестацијата „Инженерски прстен“ им го додели признанието на 12 најуспешни студенти кои дипломирале на факултетите што негуваат инженерски дисциплини во Република Северна Македонија. Меѓу 12-те студенти вакво признание од претседателот Пендаровски доби и Ана Тодорова од Струмица.

Претседателот Пендаровски во своето обраќање истакна дека со доделувањето на ова признание, придонесуваме за афирмирање на инженерските професии, а и самата оваа манифестација придонесува за промоција на инженерството.

„Машинци, архитекти, информатичари, технолози, електротехничари, градежни, земјоделски и шумарски инженери, добитници на инженерскиот прстен, но и сите останати инженери се движечка сила на секоја држава. Тие млади луѓе веќе суштински придонесуваат за македонската економија, а со тоа и за благосостојбата на сите наши граѓани“ - кажа претседателот Пендаровски на церемонијата на доделувањето на признанието „Инженерски прстен“, која се одржа во дворот на претседателската резиденција.

Манифестацијата „Инженерски прстен“ се одржува по 19-ти пат во организација на Инженерската институција на Македонија и Комората на овластени архитекти и овластени инженери, а под покровителство на претседателот на Република Северна Македонија.

Пред Споменикот на загинатите бранители Кољо Китанов и Атанас Јанев на булеварот „Маршал Тито“ во Струмица, денеска беше одбележана 21-годишнина од загинувањето на младиот македонски бранител, специјалец во ПЕП, Атанас Јанев од Струмица, учесник во воениот конфликт во Република Македонија во 2001 година, кој загина во битката за Арачиново на возраст од 25 години.

Пред споменикот на загинатите бранители свежо цвеќе положија членови на семејството на Атанас Јанев, претседателот и членови на Советот на општина Струмица, началникот на СВР Струмица, од политичките партии СДСМ и ВМРО-ДПМНЕ и здруженија на граѓани, а за двајцата бранители говореше претседателот на Советот на општина Струмица, Марјан Даскаловски.

Атанас Јанев е роден на 23 август 1976 година во Струмица. Неговата фамилија потекнува од струмичкото село Мокриево. Во детството секогаш сакал со постарите да муабети и да слуша за минатото на својот народ и земја. Уште тогаш го имал патриотскиот дух. При секое минување низ градскиот плоштад, застанувал и се поклонувал пред споменикот на Гоце Делчев, не претпостувајќи дека и самиот ќе го прифати татковинскиот позив и ќе замине на бранителската задача. Премногу го почитувал и споменувал ликот и делото на Гоце Делчев. После полнолетството, Атанас имал силни желби да и служи на татковината и да се приклучи во специјалците. Откако е вработен како полицаец, тој брзо напредувал и станал припадник на струмичката Посебна единица на полиција. Кога започнал воениот конфликт во 2001 година, го прифати татковинскиот позив и останаа достоен и верен на заклетвата. Неколку месеци пред да почне војната во 2001 година, во декември 2000 година тој стапил во брак со неговата сопруга Зорица, која веќе била бремена и очекувале прво дете. Атанас не доживеа да си го дочека и да го фати во раце своето чедо, кое денес го носи и неговото име, Атанас, има 21 година и присуствуваше на денешниот помен во чест на неговиот татко. Атанас Јанев загинал во битката за Арачиново на денешен ден, 23 јуни 2001 година.

Кољо Китанов е роден на 2 септември 1981 година во струмичкото село Сарај. Кољо во себе носеше комитска крв и беше патриотски настроен. Неговиот прадедо бил соработник на Даме Груев и сведок на неговото убиство кај Петлец, близу Русиново, беровско. Неговиот дедо Јаким Китанов за време на Втората светска војна активно се борел против балистичките чети на Шар Планина, каде што неговиот внук ќе загине во 2001 година. На 6 јуни 2001 година, Кољо е убиен од терористичка банда во близина на тетовското село Гајре, заедно со неговиот старешина, водникот Исак Руфати. Беа пречекани во заседа и изрешетани во военото „пик-ап“ возило со кое носеле храна до своите колеги на Шар Планина. Имаше само 19 години.

Вчера околу 10:30 часот на локалниот пат од село Нова Маала кон село Чанаклија, струмичко, се случила сообраќајна незгода помеѓу мопед без регистарски ознаки, управуван од Г.О.(63) од Чанаклија и патничко моторно возило „Фолксваген Голф“ со струмички регистарски ознаки, управувано од Е.Ј.(39) од Струмица, информираат од струмичката полиција. Во незгодата со тешки телесни повреди се здобил возачот на мопедот Г.О. кои му биле констатирани во болницата во Струмица. Увид на местото на настанот извршила екипа од СВР Струмица.

Жените припаднички на турската националност во Василево се информираа за специјализираните советувалишни услуги и можностите како жртвите на родово засновано и семејно насилство да се справат со истото.

Неформалната средба на жените од турска националност  се одржа вчера попладне  со активистки на здружението Скај плус, координаторката за еднакви можности во општина Струмица и претставничка од организацијата Хера. Тие разговараа за различните форми на насилство, како да го препознаваат, каде да се обратат за информации, како да постапат?

Координаторката за еднакви можности во општина Струмица, Нела Масалковска, смета дека заедницата мора да соработува меѓусебно за важните прашања какво што е решавањето на родово-базираното насилство. Стручниот тим од здружението на граѓани „Скај плус“ подели и флаери со информации за услугите на Советувалиштето.

Скај плус од крајот на 2021 година ја обезбедува бесплатната услуга - советување на жртви на родово засновано и семејно насилство.

Вакви средби ќе се одржат во повеќе населени места со цел услугите да се доближат до што поголем број жени, а особено до оние кои живеат во руралните средини, лица со попречености и припаднички на етничките малцинства.

Промотивните активности се дел од проектот „Обезбедување бесплатна правна помош и психосоцијална поддршка за најмалку 200 жени припаднички на малцинствата и ранливите групи’’, финансиран од Европската Унија и имплементиран од страна на УН ВОМЕН и ХЕРА.

120 празни столчиња на Булеварот пред македонското Собрание во Скопје, по еден за секој пратеник, утрово поставија од Сојузот на синдикатите на Македонија (ССМ) на првиот ден од Генералниот штрајк со кој работниците во јавниот сектор бараат поголеми плати.

Штрајкуваа и членовите на синдикалните организации на јавните претпријатија и државни институции во Струмица. Денеска од 10 до 11 часот пред просториите на претпријатијата и институциите штрајкуваа вработените во Општина Струмица, „Комуналец“, „Струмица Гас“, „Паркиралишта Струмица“, „Национални шуми“ – Подружница „Беласица“ Струмица, Основниот Суд во Струмица.

Синдикалците бараат зголемување на платите на вработените во јавниот сектор за 2.806 денари и утврдено право на регрес за годишен одмор во висина од 30% до 100% од основицата.

Регионалниот координатор на ССМ за Струмица, Бранко Ѓоргиев вели дека за време на штрајкот ССМ води сметка и во сложени услови на генерален штрајк да бидат запазени правилата со цел за вршење на работите кои се неопходно потребни заради спречување на загрозување на животот, личната сигурност или здравјето на граѓаните, односно 10% од вработените ги извршуваат своите работни обврски за производно-одржувачки и нужни работи кои не смеат да се прекинуваат за време на штрајк. Ѓоргиев најави дека штрајкот продолжува и утре.