Кафе барот „Концепт“ од Струмица, како општествено одговорен правен субјект, во соработка со „Диа2“, се вклучи во хуманата акција за собирање на донации за лекување на 7-годишната Нина Димитриевска.

Овој кафе бар, кој претходно во рамките на акцијата на сметката на семејството донираше 20.000 денари, вчера организираше и „after Work Party“ за малата Нина.

Станува збор за четиричасовен период за кој „Концепт“ се откажа од сите наплатени средства од гостите кои уживале во локалот после работното време, односно од 16:00 до 20:00 часот. Целиот пазар од посетителите планира да го додели за потребното лекување на Нина на кои и се потребни 65.000 долари во САД.

Според информациите од „Концепт“ за четири часа посетителите направиле пазар од 42.000 денари со нарачаните пијалоци и кафиња, средства кои „Концепт“ ќе ги донира во понеделник на семејството.

Од овој кафе бар инфомираат дека и во иднина се планираат разновидни хумани акции, се со цел да се помогне на деца на кои им се потребни средства за лекување во странство, бидејќи како што велат, треба да постои врска и соработка меѓу фирмите и локалната заедница со цел да се поттикне општествената хумана одговорност на сите чинители.