На денешен ден е родена најголемата македонска фудбалска ѕвезда на денешницата, Горан Пандев, кој сега полни 39 години.

Родум од Струмица, кариерата на Пандев се менува кога на 18-години настапувајќи во дресот на Беласица на турнир во Вијареџо го забележуваат од Интер. Со „Нераѕурите“ ја освојува младинската лига во Италија, а своето деби во Серија А го има како позајмен во тимот на Анкона каде го прославува и првиот гол. Се сели во Лацио каде се етаблира како голгетер и несебичен напаѓач, за во јануари 2010 да се врати во Интер на инсистирање на Жозе Мурињо. Ја освојува Серија А, Копа Италија, Лигата на шампиони и Светското клупско првенство за потоа да се пресели во Наполи. По три сезони таму оди на едногодишна аватура во Галатасарај, а од 2015 ги брани боите на Џеноа во чиј дрес го прослави и стотиот гол во Серија А.

За репрезентацијата на Македонија одигра 122 натпревари и постигна 38 голови, со што е рекордер и по број на одиграни натпревари и по постигнати голови. Воедно, го постигна голот со кој Македонија ја совлада Грузија во баражот и се пласираше на историското ЕУРО 2020, а таму го постигна и првиот историски гол за „Рисовите“ на едно големо натпреварување. Се пензионираше од дресот со националниот грб на дуелот со Холандија кога доби громогласен аплауз од сите присутни на „Амстердам Арена“.