Во хотелот „Етерно“ во Струмица денеска се одржа завршната конференција на проектот Your JOB II, што го спроведува Македонски Каритас. Настанот ги обедини претставниците на повеќе институции, локални самоуправи, средни училишта, приватниот сектор и младите корисници на проектот, со цел да се сумираат резултатите и постигнувањата во рамки на неговата имплементација.
Конференцијата ја отвори директорот на Македонски Каритас, протојереј ставрофор д-р Зоран И. Стојанов, кој ја нагласи важноста на поддршката за младите и улогата на Каритас во создавањето можности за нивна поголема вработливост и самостојност. На настанот присуствуваа и претставници од општините Струмица, Босилово, Богданци и Гевгелија, како и локални претприемачи и организации кои соработуваа во реализацијата на активностите.
Во текот на конференцијата беа презентирани резултатите од проектот – спроведени работилници за меки вештини, индивидуални советувања, практикантства, курсеви за дополнителна обука и доделени грантови за млади претприемачи. Дел од учесниците споделија лични искуства и придобивки, а во панел-дискусијата говореа грантистката Наташа Трајков, експертот за млади претприемачи Дејан Стојановиќ, маркетинг менаџерот Митко Андонов и корисничката на курсеви Ружица Ѓоргиева.
Завршната реч ја одржа претседателот на Македонски Каритас, монс. д-р Киро Стојанов, кој изрази благодарност до сите партнери и нагласи дека проектот претставува важен чекор во градењето на општество кое ги поддржува младите во нивниот професионален развој и општа благосостојба.
Проектот Your JOB II започна во ноември 2023 година како продолжение на иницијативата Youth Overcoming Unemployment Regionally – Your JOB, која има за цел да ги поттикне младите лица да ги развиваат своите професионални и претприемачки способности. Преку обуки, менторства и поддршка во основање мали бизниси, проектот придонесува за намалување на невработеноста меѓу младите и подобрување на нивните перспективи во Македонија и регионот.
