Пред 13 години, на 23 јули, над Струмица избувна пожар што се прошири на поголемиот дел од ридот, во кој трагично загинаа браќата Блажо Стојков и Пено Стојанов од Рич, Мите Ѓоргиев од Струмица и Војо Гркљанов од Вељуса, а 11-мина беа повредени.
Големиот шумски пожар предизвика голема трагедија што вечно ќе ја паметат струмичани. Огнената стихија напиша злокобно сценарио и ја зави Струмица во црно.
Денеска пред спомен обележјето што Општина Струмица го подигна во чест на четворицата храбри граѓани кои животите ги загубија во борбата со огнената стихија, се одржа чествување по повод 13-годишнината од овој трагичен настан.
Претседателот на Советот на општина Струмица, Марјан Даскаловски во своето обраќање кажа дека огнената стихија, предизвикана од човечки фактор, имаше дотогаш невидени размери. Во таа битка со огнот, покрај пожарникарите, учествуваа и многу граѓани кои несебично, со ризик по сопствените животи, се бореа за да го заштитат градот.
„Денеска пред споменикот им оддаваме почит на хероите: Пено Стојанов, Блажо Стојков, Војо Гркљанов и Мите Ѓеоргиев. Нивната храброст и пожртвуваност се врежани во срцата на струмичани. Никогаш нема да заборавиме што направија за нас! Одбележувањето на оваа годишнина нека биде потсетник дека со оган нема играчка – особено во летните, сушни денови. Бидете внимателни. Една искра може да значи нова трагедија. Вечна слава и благодарност за нашите херои“ – кажа Даскаловски.
