Организацијата на жени од Струмица, заедно со активистки од женските кружоци од Сачево и Ново Село и претставнички на уште осум локални женски организации, вчера остварија работна средба со Клубот на пратенички во македонското Собрание. На средбата учествуваа 16 активистки од руралните средини, кои ги изложија своите ставови, предлози и искуства со цел унапредување на локалната демократија и поголема застапеност на жените во процесите на одлучување.
Учесничките истакнаа дека за да се обезбеди реално учество на жените во планирањето и креирањето локални политики, неопходни се измени во Законот за локална самоуправа, со воведување повеќестепена постапка за учество на граѓаните и конкретни гаранции за родова застапеност. Притоа беше потенцирана и потребата од формализирање и зајакнување на месната самоуправа преку обезбедување просторни и финансиски ресурси, како предуслов жените реално да се вклучат во заедницата.
Средбата ја отворија претседателката на Клубот на пратенички, Јована Тренчевска, заменичката-претседателка на Комисијата за еднакви можности, Весна Ѓорѓиева, и извршната директорка на Акција Здруженска, Марија Савовска. Савовска нагласи дека женското лидерство мора да биде достапно за сите жени, вклучително и за оние од руралните и социо-економски помалку развиени подрачја.
Ленче Христова од Организацијата на жени од Струмица укажа дека жените систематски се исклучувани од локалните процеси, а тоа може да се надмине само преку јасни и трајни механизми кои гарантираат транспарентност и рамноправност. Таа ги повика пратеничките да ја поддржат иницијативата за закажување на 52-та пленарна седница за усвојување на измените во Законот за локална самоуправа.
Елизабета Стојанова од женскиот кружок во Сачево истакна дека без рушење на стереотипите во домот, без отворени институции и сигурни простори за женско дејствување, не може да се очекува вистинска вклученост. Фадрије Мустафовска од Радика-Де предупреди дека жените од руралните средини остануваат „невидливи“ за дел од постојните програми, бидејќи критериумите не ги препознаваат реалните услови во кои тие живеат.
На средбата беа презентирани и податоци од истражување во три рурални општини, кое покажува висок интерес кај жените за вклучување во заедницата, но и сериозни финансиски и структурни пречки. Дополнително, Ивана Цветковиќ Стојчева од Хуманитарното здружение „Мајка“ Куманово ја алармираше ситуацијата со недостигот на чиста вода и нерешените системи за отпадни води во руралните места, проблем кој, како што нагласи, е „прашање на опстанок“ и бара итна национална интервенција.
За секојдневниот товар што го носат семејствата во вакви услови зборуваше и Жељка Диклиќ Илиевска од женскиот кружок Пчиња, истакнувајќи дека дел од домаќинствата трошат значителни средства за основни потреби како флаширана вода, поради недоволна безбедност и квалитет на водоснабдувањето.
Женските организации порачаа дека проблемите како водоснабдување, пристап до услуги, економска активност и учество во одлучување се прашања од национален интерес, кои не можат да се решаваат само локално. Тие побараа системски политики што ќе ги препознаат и адресираат специфичните потреби на жените во руралните средини, со цел создавање одржливи и правични заедници.
